விருந்தினர்கள் 28 பண்பாட்டு ஊர்திகள் மற்றும் பண்பாட்டு ஊர்வலத்துடன் வரவேற்கப்பட்டதையடுத்து, மங்கல விளக்கேற்றல் இடம்பெற்றது. தொடர்ந்து தமிழ்த்தாய் வாழ்த்து, இசை, நடனம், கும்மி, அம்மன் கௌத்துவம், புத்தாக்கப்பாடல், தப்பாட்டம், கிராமியப்பாடல், வான்நடனம் மற்றும் நாட்டியநாடகம் உள்ளிட்ட பல்வேறு கலை நிகழ்வுகள் இடம்பெற்றன. சிவசக்தி சங்கீத நர்த்தனாலய மாணவர்கள், மாயோன் இசைக்கல்லூரி மாணவர்கள், இயல்ச்சேத்ரா நடனப்பள்ளி மாணவர்கள், வரணி கலாசார மத்திய நிலைய மாணவர்கள், லை நாட்டிய நடனப்பள்ளி மாணவர்கள் மற்றும் வரணி மத்திய கல்லூரி மாணவர்கள் தமது கலைத்திறமைகளை வெளிப்படுத்தி விழாவை சிறப்பித்தனர். இந்நிகழ்வில் தென்மராட்சி பிரதேச பண்பாட்டுப் பேரவை உறுப்பினர் திரு. கார்த்திகேசு கமலநாதன் அரங்கத்திறப்புரையையும், உதவி பிரதேச செயலாளர் திருமதி லாகினி நிருபராஜ் வரவேற்புரையையும், பிரதேச செயலாளர் திரு. பிரான்சிஸ் சந்திரா சத்தியசோதி தலைமையுரையையும் ஆற்றினர். சிறப்பு விருந்தினர் உரையையும் பிரதம விருந்தினர் உரையையும் தொடர்ந்து கலைஞர்கள் கௌரவிக்கப்பட்டனர்.

பண்பாட்டுத்துறைக்கு ஆற்றிய பங்களிப்பைப் பாராட்டும் வகையில் “கலைச்சாகரம் விருது – 2026” வழங்கப்பட்டதுடன்,

திருமதி. சுபத்திராதேவி சிறீஸ்கந்தராசா – இசை

திரு. ஜெயக்கன் ரவீந்திரன் – இசை

திருமதி. ஜானகி ஆனந்தகிருபன் – ஓவியம்

ஆகியோர் கௌரவிக்கப்பட்டனர். அதேவேளை, வளர்ந்துவரும் இளம் கலைஞர்களை ஊக்குவிக்கும் வகையில் “இளம் கலைஞர் விருது – 2026” வழங்கப்பட்டு,

திரு. விக்னேஸ்வரன் பிரசித்தன் – நாதஸ்வரம்

திருமதி. மகேஸ்வரன் சசிலா – நடனம்

திருமதி. பிரியதர்ஷினி ஸ்ரீபன் – குறும்படம்

ஆகியோர் கௌரவிக்கப்பட்டனர்.

நிகழ்வின் நிறைவில் கலாசார உத்தியோகத்தர் திருமதி சசிகுமார் சர்மினா நன்றியுரை வழங்கினார். இந்நிகழ்வில் கலைஞர்கள், கலை ஆர்வலர்கள், அரச உத்தியோகத்தர்கள் மற்றும் பொதுமக்கள் எனப் பலரும் கலந்துகொண்டு விழாவை சிறப்பித்தனர்.