யாழ்ப்பாண மாவட்ட விவசாயக் குழுக் கூட்டம் யாழ்ப்பாண மாவட்ட அரசாங்க அதிபர் திரு.மருதலிங்கம் பிரதீபன் அவர்களின் தலைமையில் இன்றைய தினம் (22.10.2026) மு. ப 11.30 மணிக்கு யாழ்ப்பாண மாவட்ட செயலக கேட்போர் கூடத்தில் நடைபெற்றது. இக் கூட்டத்தில் தலைமையுரையாற்றிய அரசாங்க அதிபர் அவர்கள், யாழ்ப்பாண மாவட்ட விவசாயத்துறையின் முன்னேற்றத்திற்கு ஒருங்கிணைந்த செயற்பாடுகள் அவசியம் எனவும், விவசாயிகளுக்கு உரிய ஆலோசனைகளையும் வழிகாட்டல்களையும் வழங்கி, யாழ்ப்பாண மாவட்டத்தின் விவசாய உற்பத்தியை மேம்படுத்துவதற்கு விவசாயத்துறை சார்ந்த அனைத்து உத்தியோகத்தர்களும் ஒருங்கிணைந்து செயற்பட வேண்டும் என வலியுறுத்தினார். மாவட்டத்தின் விவசாயத்துறை சார்ந்த உத்தியோகத்தர்களுடனான கூட்டத்தில் தலைமையுரையாற்றியபோதே அவர் இவ்வாறு தெரிவித்தார். அவர் மேலும் தெரிவிக்கையில், விவசாயிகளின் உற்பத்திச் செயற்பாடுகளை மேம்படுத்துவதற்கும், அவர்கள் எதிர்கொள்ளும் பிரச்சினைகளுக்குத் தீர்வுகளைப் பெற்றுக்கொடுப்பதற்கும் உரிய நடவடிக்கைகள் முன்னெடுக்கப்பட வேண்டும். இதன் ஒரு பகுதியாக, விவசாயக் காப்புறுதி தொடர்பாக நிலவும் பிரச்சினைகள் குறித்து நேற்றைய தினம் கொழும்பிலிருந்து வருகை தந்த விவசாயக் காப்புறுதிச் சபையின் உயர் அதிகாரிகளுடன் விரிவான கலந்துரையாடல் மேற்கொள்ளப்பட்டது. இதன்மூலம் மாவட்டத்தில் விவசாயக் காப்புறுதி தொடர்பான நடவடிக்கைகளை மேலும் வலுப்படுத்துவதற்கான வழிமுறைகள் ஆராயப்பட்டன. தற்போதைய காலநிலை மாற்றங்கள் விவசாயத்துறையில் பல்வேறு தாக்கங்களை ஏற்படுத்தக்கூடிய சூழல் காணப்படுவதால், விவசாயிகள் எதிர்கொள்ளும் சவால்களைக் கருத்திற்கொண்டு உரிய வழிகாட்டல்களையும் ஆதரவையும் வழங்குவது அவசியமாகும். விவசாய உற்பத்தி தொடர்பான புள்ளிவிபரங்களைத் திரட்டுதல் உள்ளிட்ட பல்வேறு நடவடிக்கைகள் முன்னெடுக்கப்பட்டு வருகின்றன. எனினும், மாவட்டத்தின் விவசாய உற்பத்தியை மேலும் உயர்த்துவதற்கும், விவசாயிகளின் வாழ்வாதாரத்தை மேம்படுத்துவதற்கும் தொடர்ச்சியான முயற்சிகள் தேவைப்படுகின்றன.