யாழ்ப்பாண மாவட்ட செயலக நலன்புரிக் கழகத்தின் ஏற்பாட்டில் 2024ஆம் ஆண்டிற்கான ஒளிவிழா நிகழ்வானது மாவட்ட செயலக நலன்புரிக் கழகத்தின் தலைவரும் உதவி மாவட்ட செயலாளருமான செல்வி உ.தர்சினி அவர்களின் தலைமையில் மாவட்ட செயலக கேட்போர் கூடத்தில் நேற்றைய தினம் (17.12.2024) பி. ப. 2.30 மணிக்கு ஆரம்பமாகி சிறப்பாக நடைபெற்றது .

நத்தார் தீப ஔியூட்டலுடன் ஆரம்பமான நிகழ்வுக்கு பிரதம அதிதியாக மாவட்ட அரசாங்க அதிபரும் மாவட்ட செயலக நலன்புரிக் கழகத்தின் போசகருமான திரு மருதலிங்கம் பிரதீபன் அவர்கள் கலந்துகொண்டு சிறப்பித்ததோடு, ஆசியுரையினை சுண்டுக்குளி சென்ஜோன்ஸ் ஆலய முகாமைக்குரு வணக்கத்திற்குரிய J.ஸ்ரிபன் ஜெபச்செல்வன் அவர்களும், கிறிஸ்துமஸ் செய்தியை பங்குத்தந்தை அருட்பணி எஸ். அஜந்தன் அவர்களும் வழங்கினார்கள்.

இவ் நிகழ்வில் பிரதம விருந்தினர் உரையாற்றிய அரசாங்க அதிபர் அவர்கள், நலன்புரிச் சங்கத்தின் இவ் ஔி விழா ஒழுங்கமைப்பு எளிமையாகவும், சிறப்பாகவும் உள்ளமைக்கு பாராட்டுக்களை தெரிவித்ததுடன்,இந்து, கிறிஸ்தவம் ,பௌத்தம், இஸ்லாம் ஆகிய எல்லா மதங்களின் நிகழ்வுகளும் ஔியை போற்றுவதாகவும்ஏற்றுவதாகவும் மேம்படுத்தாவதாகவும் அமைந்திருப்பதால், அரச பணியாளர்கள் என்ற ரீதியில் எமது நோக்கமும் மற்றவர்கள் வாழ்வில் ஔியூட்டுவதாக இருக்க வேண்டும் எனவும் அந்த வகையில் இறைவன் எல்லோரையும் வல்லமை பொருந்தியவர்களாக படைத்திருக்கிறாா் எனத் தெரிவித்ததுடன், எமது பணியும் மக்கள் நலன் சாா்ந்த விடயங்களையும் அவர்கள் தேவைப்பாடுகளையும் நிறைவேற்றுவதாகவும் இருக்கும் போது அதன் பிரதிபலிப்பு எங்கள் வாழ்விலும் ஏற்படும் எனவும் அரசாங்க அதிபர் தெரிவித்தார்.

குறித்த நிகழ்வில் சிறுவர்களின் வரவேற்பு நடனம், மாவட்டச் செயலக உத்தியோகத்தர்களின் கரோல் கீதங்கள், பாடல், நாடகம் ,பேச்சு மற்றும் நடன நிகழ்வுகள் இடம்பெற்றதுடன், நத்தாா் தாத்தா வருகையுடன் சிறுவர்களுக்கான பரிசில்களும் வழங்கப்பட்டு கிறிஸ்மஸ் நத்தார் இசையுடன் விழா சிறப்பாக இனிதே நிறைவு பெற்றது.

மேலும் குறித்த நிகழ்வில் மாவட்டச் செயலக பதவிநிலை உத்தியோகத்தர்கள் மற்றும் மாவட்ட செயலக உத்தியோகத்தர்கள் மற்றும் சிறுவர்களும் கலந்து கொண்டிருந்தனர்.