யாழ்ப்பாண மாவட்ட விவசாயக் குழுக் கூட்டம் யாழ்ப்பாண மாவட்ட அரசாங்க அதிபர் திரு.மருதலிங்கம் பிரதீபன் அவர்களின் தலைமையில் இன்றைய தினம்(07.04.2026) காலை 9.00 மணிக்கு யாழ்ப்பாண மாவட்ட செயலக கேட்போர் கூடத்தில் நடைபெற்றது. இக் கூட்டத்தில் தலைமையுரையாற்றிய அரசாங்க அதிபர் அவர்கள், கடந்த 13.11.2025 நடைபெற்ற விவசாய குழுக் கூட்டம், உணவுப்பாதுகாப்பு கூட்டம் ஆகியவற்றின் முன்னேற்றங்கள் தொடர்பாக ஆராய்வதை நோக்காக கொண்டு இக் கூட்டம் ஒழுங்குபடுத்தப்பட்டுள்ளதாகவும், மாவட்டத்தில் விவசாயம் சார்ந்த செயற்பாடுகளில் எவ்வாறான விடயங்களை கையாள வேண்டும் என்ற கருத்துக்களை முன்வைக்குமாறும் கேட்டுக் கொண்டார். மேலும், யாழ்ப்பாண மாவட்டத்தில் விவசாய மற்றும் கடற்றொழில் சார்ந்த பிரச்சினைகளையும் தேவைப்பாடுகளையும் இக் கூட்டத்தில் ஆராய்வதுடன், மாவட்ட விவசாய அபிவிருத்தியில் மாவட்ட உத்தியோகத்தர்கள் என்ற ரீதியில் எவ்வாறான சேவைகளை மேற்கொள்ள வேண்டும் எனவும் ஆராய்வதுடன், விவசாயிகள் விவசாயத்தில் காத்திரமான பங்களிப்பை வழங்கியதன் மூலம் யாழ்ப்பாண மாவட்டத்தின் விவசாய தேவைகளை தன்னிறைவு எட்டக்கூடியதாக உள்ளமையும் மாவட்டத்திற்கு வெளியே ஏற்றுமதி செய்யக்கூடியதாக இருப்பதும் மகிழ்ச்சிக்குரிய விடயமாகவும் காணப்படுவதாகவும் அரசாங்க அதிபர் தெரிவித்து, மாவட்ட விவசாயிகளுக்கான பிரச்சினைகளை ஆராய்ந்து அதற்குரிய ஆலோசனைகளையும், விவசாயிகளை தமது கருத்துக்களையும் முன்வைக்குமாறும் கேட்டுக்கொண்டார்.

நடப்பாண்டின் முதலாம் காலாண்டுக்கான கணக்காய்வு முகாமைத்துவக் குழுக்கூட்டமானது யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்களின் தலைமையில், இன்றைய தினம் (31.03.2026) பி.ப 2.00 மணிக்கு மாவட்டச் செயலக கேட்போர் கூடத்தில் நடைபெற்றது. இக் கலந்துரையாடலில் தலைமையுரையாற்றிய அரசாங்க அதிபர் அவர்கள், இவ் வருடத்துக்கான முதலாவது கணக்காய்வு முகாமைத்துவ குழுக் கூட்டமாக இது அமைந்ததுள்ளதாகவும், கணக்காய்வு முகாமைத்துவ நடவடிக்கைகளின் நோக்கம் வினைத்திறனான செயற்பாட்டிற்கானதே எனவும், ஆரம்ப கட்ட நடவடிக்கையாக உள்ளகக் கணக்காய்வு பிரிவு ஸ்தாபிக்கப்பட்டு அதனுடைய செயற்பாடுகள் முன்னெடுக்கப்பட்டு வருவதாகவும், அதனை ஒத்த அதற்கு நிகரான செயற்பாடுகளை பிரதேச செயலகங்களில் முன்னெடுக்குமாறும் பிரதேச செயலாளர்களுக்கு அறிவுறுத்தல்கள் வழங்கப்பட்டது எனவும், உள்ளகக் கணக்காய்வு செயற்பாடுகளை முன்னெடுப்பதன் நோக்கம் தேசிய கணக்காய்வு முகாமைத்துவத்திற்கு செல்ல முன்னர் இருக்கின்ற பிரச்சினைகளை அடையாளம் கண்டு ஆற்றுப்படுத்துவதே இதன் நோக்கமாகும் எனவும், அதற்கான சரியான வழிமுறையை பின்பற்ற வேண்டும் எனவும், கணக்காய்வு தொடர்பான ஐய வினாக்கள் எழும்போது அதற்கு விடயத்துக்கு பொறுப்பான உத்தியோகத்தர்கள் பொறுப்பு கூற வேண்டும் எனவும், சரியான நிதி நடைமுறைகளை பின்பற்றுவதன் ஊடாக சரியான நிர்வாக நடவடிக்கை மேற்கொள்ள முடியும் எனவும் தெரிவித்தார்.

சக்திவளத்தை சிக்கனமாக பயன்படுத்துவதற்கு பொதுமக்களை ஊக்குவிக்கும் நோக்கில் உருவாக்கப்பட்ட "சுரகிமு லங்கா" (இலங்கையை காப்போம்) தேசிய திட்டம் உத்தியோகபூர்வமாக ஆரம்பித்து வைக்கப்பட்டுள்ளது. மின்சக்தி வளங்களை மிகவும் பொறுப்புடன் பாதுகாக்கும் ஒரு சமூகத்தை உருவாக்குவதே இதன் முதன்மை நோக்கமாகும். மத்திய கிழக்கு பிராந்தியத்தில் நிலவும் போர் சூழலினால் நாட்டின் மின்சாரம் மற்றும் எரிபொருள் விநியோகத்திற்கு ஏற்படக்கூடிய தடைகள் மற்றும் எதிர்காலத்தில் ஏற்படக்கூடிய வானிலை மாற்றங்கள் குறித்த கணிப்புகளைக் கருத்திற்கொண்டு, அரசாங்கம் இந்தத் திட்டத்தை நடைமுறைப்படுத்துவதாக ஜனாதிபதி ஊடகப் பிரிவு அறிவித்துள்ளது. அரச வளங்களை மிக சிக்கனமாகவும் வெளிப்படைத்தன்மையுடனும் பயன்படுத்த வேண்டியதன் அவசியத்தை சுட்டிக்காட்டியுள்ள அரசாங்கம், தேசிய வலுசக்தி பாதுகாப்பிற்காக பொதுமக்களை நேரடியாகப் பங்களிக்கச் செய்வதே இதன் பிரதான எதிர்பார்ப்பு எனத் தெரிவித்துள்ளது. இந்தத் திட்டம் அடுத்த ஐந்து மாத காலத்திற்கு நடைமுறைப்படுத்தப்படவுள்ளது. “செல்வச் செழிப்புமிக்க நாடு – அழகான வாழ்க்கை” எனும் தொலைநோக்கின் கீழ் முன்னெடுக்கப்படும் ‘Clean Sri Lanka’ திட்டத்தின் ஒரு பகுதியாக, “சுரகிமு லங்கா – ஒன்றிணைவோம் – ஒளியூட்டுவோம்” என்ற தொனிப்பொருளில் இது செயற்படுத்தப்படுகிறது. இதற்காக அரச, அரச அனுசரணை மற்றும் தனியார் துறையினருடன் சிவில் சமூகம் மற்றும் பொதுமக்களின் ஒத்துழைப்பும் எதிர்பார்க்கப்படுகிறது.

இலங்கை பெண்கள் பணியகமும் யாழ்ப்பாணம் மாவட்டச் செயலகமும் இணைந்து நடாத்திய சர்வதேச மகளிர் தினம் இன்றைய தினம் (31.03.2026) மு.ப 09.00 மணிக்கு யாழ்ப்பாண மாவட்ட அரசாங்க அதிபர் திரு மருதலிங்கம் பிரதீபன் அவர்கள் தலைமையில் "பெண்களின் தலைமைத்துவம் செழிப்பான தேசத்தின் பெருமை"எனும் தொனிப்பொருளில் மாவட்டச் செயலக கேட்போர் கூடத்தில் நடைபெற்றது. இந் நிகழ்வில் பிரதம விருந்தினராக வடமாகாண பிரதம செயலாளர் திருமதி தனுஜா முருகேசன் அவர்களும், சிறப்பு விருந்தினராக வடமாகாண நகர அபிவிருத்தி சபை பிரதிப் பணிப்பாளர் திருமதி.க.கஜீவன் அவர்களும், கெளரவ விருந்தினராக பாலம் செயற்றிட்டம் முகாமையாளர் சுவீற்ரி தேவராஜா. அவர்களும் கலந்து கொண்டார்கள். பெண் தொழில் முயற்சியாளர்களை ஊக்கப்படுத்தும் நோக்கிலும் அவர்களுக்கான சந்தை வாய்ப்பினை ஏற்படுத்திக் கொடுக்கும் முகமாகவும் மட்டுப்படுத்தப்பட்ட அளவிலான பெண் தொழில் முயற்சியாளர்களுக்கான விற்பனை கண்காட்சி கலந்து கொண்டிருந்த விருந்தினர்களால் திறந்து வைக்கப்பட்டது. தொடர்ந்து மாவட்டச் செயலக கேட்போர் கூடத்தில் சர்வதேச மகளிர் தின நிகழ்வுகள் மங்கல விளக்கேற்றல், வரவேற்பு நடனம், வரவேற்புரை என்பவற்றுடன் ஆரம்பமானது. இந் நிகழ்வில் தலைமையுரையாற்றிய அரசாங்க அதிபர் அவர்கள், 2026 ஆம் ஆண்டுக்கான சர்வதேச மகளிர் தின நிகழ்வு இன்றைய தினம் நடைபெறுவதாகவும், இன்றைய நிகழ்விற்கு இலங்கை நிர்வாக சேவையின் உயரிய பதவியில் உள்ள ஒருவரை அழைத்திருப்பதாகவும் மற்றும் மாகாணத்தில் அபிவிருத்திக்கான செயற்பாடுகளை வெளிப்படுத்தி மாகாணத்தை நகரம் சார்ந்த பொருளாதார ரீதியாக மாற்ற தனது பங்களிப்பை வழங்கியவர்களயும் அழைத்து இருப்பதாகவும் அந்த வகையில் நிர்வாக ரீதியான ஆளுமை கொண்டவர்களும் உயரிய பதவிகளையும் வகிக்கும் பெண் சமுதாய மூத்த அரச உத்தியோகத்தர்களை அழைத்து கெளரவப்படுத்தும் வகையிலும், பெண்களின் நிலைப்பாட்டை அல்லது வளர்ச்சி போக்கினை சமூகத்திற்கு எடுத்துரைப்பதற்காகவும் இந் நிகழ்வு ஏற்பாடு செய்யப்பட்டுள்ளதாகவும் தெரிவித்தார்.