போதைப் பொருள் அச்சுறுத்தலை தோற்கடிக்கும் "முழு நாடுமே ஒன்றாக " தேசிய அங்குரார்பண நிகழ்வு - நிகழ்நிலை மூலமாக சமநேரத்தில் யாழ்ப்பாண மாவட்டச் செயலகத்தில் ஆரம்பித்துவைக்கப்பட்டது. போதைப்பொருள் அச்சுறுத்தலை தோற்கடிக்கும் "முழு நாடுமே ஒன்றாக " தேசிய அங்குரார்பண நிகழ்வு மாண்புமிகு ஜனாதிபதி அநுர குமார திசாநாயக்க அவர்களின் தலைமையில் இன்றைய தினம் (30.10.2025 ) காலை 10.00 மணிக்கு கொழும்பு சுகதாச உள்ளக விளையாட்டரங்கில் உத்தியோகபூர்வமாக ஆரம்பித்து வைக்கப்பட்டது. போதைப்பொருள் பாவனையின் அச்சுறுத்தல் மற்றும் அதன் பரவலின் ஆழத்தையும் கருத்தில் கொண்டு "முழு நாடுமே ஒன்றாக" என்ற தொனிப்பொருளில் முழு நாட்டையும் ஒண்றிணைத்த வகையிலான இந்த தேசிய திட்டம் நிகழ்நிலை மூலமாக சமநேரத்தில் சகல மாவட்ட ங்களிலும் ஆரம்பிக்கப்பட்டது. யாழ்ப்பாண மாவட்டத்தில் அரசாங்க அதிபர் திரு மருதலிங்கம் பிரதீபன் அவர்களின் தலைமையில் மாவட்ட செயலக மாநாட்டு மண்டபத்தில் நிகழ்நிலை மூலமான சமநேரத்தில் நடைபெற்றது. கௌரவ ஜனாதிபதி அவர்களால் முன்னெடுக்கப்படுகின்ற "அகன்று செல்" போதைப்பொருளுக்கு எதிரான தேசிய வேலைத்திட்ட நிகழ்வில் போதைப்பொருள் அச்சுறுத்தலை முற்றாக இல்லாதொழிப்பதற்கு பங்களிக்கும் பொறுப்பொன்றாக அனைத்து உத்தியோகத்தர்களாலும் சத்தியப்பிரமாண உறுதி எடுக்கப்பட்டமை குறிப்பிடத்தக்கது. இந் நிகழ்வில் மாவட்ட மேலதிக அரசாங்க அதிபர் , மாவட்ட மேலதிக அரசாங்க அதிபர் (காணி), மாவட்ட செயலக பதவிநிலை உத்தியோகத்தர்கள் மற்றும் மாவட்ட செயலக உத்தியோகத்தர்கள் கலந்து கொண்டனர்.

 

உலக உணவு தினத்தினை முன்னிட்டு - கரித்தாஸ் - கீயூடெக் நிறுவனத்தினால் இரசாயன பாவனையற்ற வீட்டுத் தோட்ட உற்பத்திகளின் கண்காட்சியும் விற்பனை நிகழ்வும் இன்றைய தினம் (30.10.2025)காலை 09.30 மணிக்கு நிறுவனத்தின் இயக்குநர் அருட்பணி அ. அன்ரோ டெனிசியஸ் அவர்கள் தலைமையில் யாழ்ப்பாணம் புனித மாட்டீன் குருமடத்திற்கு முன்பாக நடைபெற்றது. இந் நிகழ்வில் பிரதம விருந்தினராக யாழ்ப்பாண மாவட்ட அரசாங்க அதிபர் திரு மருதலிங்கம் பிரதீபன் அவர்கள் கலந்து கொண்டு கண்காட்சி மற்றும் விற்பனையினை ஆரம்பித்து வைத்தார்.

சிறுவர், பெண்கள் விவகார அமைச்சின் அனுசரணையுடன் யாழ் மாவட்டத்தில் பால்நிலைசார் வன்முறைகளால் (SGBA) பாதிப்புக்குள்ளான சேவை நாடிகளுக்கான அவசர சேவை வழங்குதல் தொடர்பான பயிற்சிப் பட்டறை மாவட்ட மேலதிக அரசாங்க அதிபர் திரு. கே. சிவகரன் அவர்களின் தலைமையில் இன்றையதினம் (30.10.2025 ) YMCA மண்டபத்தில் காலை 8.30 மணிக்கு ஆரம்பமாகி நடைபெற்றது. இந்நிகழ்வில் கருத்து தெரிவித்த மாவட்ட மேலதிக அரசாங்க அதிபர் அவர்கள் பெண்கள் தொடர்பான பால்நிலைசார் வன்முறைகள் நாளுக்கு நாள் அதிகரித்து வருகின்றது.இவ்வன்முறை செயற்பாடுகளை இலகுவாக வெளிக்கொணர்வதற்காக கிராம மட்டத்தில் குழுக்கள் உருவாக்கப்பட்டுள்ளன. இக்குழுக்கள் அனைத்தையும் ஒன்றிணைத்து அதன் மூலமாக வன்முறைகளை வெளிக்கொணர வேண்டுமெனவும், அத்துடன் இன்றைய தினம் முன்னெடுக்கப்படும் அவசர சேவை வழங்குதல் தொடர்பான இப்பயிற்சி பட்டறை மூலமாக வன்முறைகளை இலகுவாக கையாளக்கூடிய திறனை பெற்றுக் கொள்ள வேண்டும் என கேட்டுக் கொண்டார்.

ஆசிரியத்துவத்தின் செயற்பாடுகள் பிள்ளைகளின் முழுமையான நன்மை நோக்கியதாக ஆரோக்கியமான முறையில் அமையப்பெற்றால் பள்ளிப் பருவப் பிள்ளைகள் ஆசிரியர்களை தம் மனதிலே நிலையான இடத்தில் வைத்திருப்பார்கள் - அரசாங்க அதிபர் தெரிவிப்புசிறுவர் பாதுகாப்பு தொடர்பாக தேசிய கல்வியற் கல்லூரியின் ஆசிரிய மாணவர்களை விழிப்புணர்வூட்டும் தேசிய நிகழ்ச்சித் திட்டம் தேசிய கல்வியற் கல்லூரி பீடாதிபதி திரு. ஆர். லோகேஸ்வரன் அவர்களின் தலைமையில் இன்றைய தினம் (30.10.2025) காலை 8.30 மணிக்கு கோப்பாய் தேசிய கல்வியற் கல்லூரி கேட்போர் கூடத்தில் நடைபெற்றது. இவ் விழிப்புணர்வின் தொடக்க நிகழ்வில் பிரதம விருந்தினராக யாழ்ப்பாண மாவட்ட அரசாஙக அதிபர் திரு.மருதலிங்கம் பிரதீபன் அவர்கள் கலந்து கொண்டு கருத்து தெரிவிக்கும்போது தேசிய கல்வியியல் கல்லூரி மிகச் சிறப்பான வகையில் தொடர்ச்சியாக செயற்பட்டு பல ஆயிரக்கணக்கான ஆசிரியர்களை உருவாக்கி சமூகத்திற்கு வழங்கிக் கொண்டிருப்பதாகவும், அந்த வகையில் பீடாதிபதி மற்றும் சிரேஷ்ட விரிவுரையாளர்களின் அர்ப்பணிப்பான காத்திரமான பங்களிப்பினாலேயே நல்ல தலைவர்களை சமூகத்துக்கு உருவாகிக் கொண்டிருப்பதாகவும், பாராட்டியதுடன், இவ் ஒருங்கிணைந்த செயற்பாட்டின் மூலமாக முன்னாள் ஸ்தாபகர் திருவாளர் கமலநாதன் ஆசிரியர் அவர்களை தான் கற்ற ஆசியராக நினைவு கூறுவதற்காக சந்தர்ப்பத்தை இந் நிகழ்வு அமைத்திருப்பதாகவும் தெரிவித்தார்.