பால்நிலைக்கு எதிரான வன்முறை மற்றும் பாதுகாப்பு தொடர்பான விழிப்புணர்வு செயலமர்வு யாழ். மாவட்ட அரசாங்க அதிபர் கணபதிப்பிள்ளை மகேசன் தலைமையில் நேற்று (12.10.2022) காலை 9.30 மணிக்கு மாவட்ட செயலக மாநாட்டு மண்டபத்தில் நடைபெற்றது.
ஆரோக்கியமான பால்நிலை, வன்முறையற்ற வேலைத்தளங்களை உருவாக்குதல் மற்றும் பால்நிலை தொடர்பான விழிப்புணர்வை அனைத்து ஊழியர்கள் மட்டத்திலும் ஏற்படுத்தல் தொடர்பாக இதன்போது தெளிவுபடுத்தப்பட்டது.ஆரோக்கியமான வேலைச்சூழலும் உளநல மேம்பாடும் தொடர்பாக உளவளத்துறை உத்தியோகத்தர் என்.உதயகுமார் கருத்துரை வழங்கினார்.
அத்துடன் வேலைத்தளங்களில் பால் மற்றும் பால்நிலை அடிப்படையிலான வன்முறையற்ற ஆராக்கியமான வேலைச்சூழலை உருவாக்குதல் தொடர்பாகவும், பெண்கள் அபிவிருத்தி உத்தியோகத்தர் கி.தயாபரியினால் விளக்கமளிக்கப்பட்டது.

யாழ்ப்பாண மாவட்ட செயலகத்தின் ஏற்பாட்டில் பதிவாளர் நாயகம் திணைக்களத்தினால் (10.10.2022) பிறப்பு பதிவு செய்யாத பிள்ளைகளிற்கான பிறப்பு பதிவு செய்யும் விஷேட நிகழ்வு மாவட்ட செயலக மாநாட்டு மண்டபத்தில் நடைபெற்றது.
மாவட்ட சிறுவர் அபிவிருத்தி குழுக் கூட்டத்தில் மேற்கொள்ளப்பட்ட தீர்மானத்திற்கு அமைவாக மாவட்ட மேலதிக அரசாங்க அதிபர் திரு.மருதலிங்கம் பிரதீபன் தலைமையில் இந் நிகழ்வு நடைபெற்றது.
இதில், பிரதி பதிவாளர் நாயகம் திரு.கே.நடராஜா அவர்கள் இதுவரை பிறப்பு பதிவினை செய்யாத பிள்ளைகளிற்கான பிறப்பு பதிவினை மேற்கொண்டார். இவ் விஷேட நிகழ்வில் 25 பேரிற்கு பிறப்பு பதிவு மேற்கொள்ளப்பட்டது.

நலன்புரி நன்மைகள் செலுத்துதல் தொடர்பில் தகுதியான நபர்களை கண்டறியும் செயற்திட்டம் தொடர்பான கலந்துரையாடல் மாவட்ட அரசாங்க அதிபர் கணபதிப்பிள்ளை மகேசன் தலைமையில் 30.09.2022 பி.ப 12.30 மணிக்கு மாவட்ட செயலக கேட்போர் கூடத்தில் நடைபெற்றது.
இக் கலந்துரையாடலில் மாவட்ட அரசாங்க அதிபர் கருத்துத் தெரிவிக்கும் போது நலன்புரி நன்மைகள் செலுத்துதல் தொடர்பான சுயமான விண்ணப்பங்களை ஒப்படைக்காத பொதுமக்கள் விரைவாக பிரதேச செயலகங்களில் ஒப்படைக்க வேண்டும் என தெரிவித்துள்ளார்.
அத்தோடு, நலன்புரி நன்மைகள் செலுத்துதல் தொடர்பில் தகுதியான நபர்களை கண்டறியும் செயற்திட்டம் தொடர்பில் மக்களுக்கான விண்ணப்பங்களை விண்ணப்பிப்பதற்கான விழிப்புணர்வூட்டல், பிரதேச மட்டங்களில் விண்ணப்பங்களை தரவுத்தளங்களில் பதிவு செய்தல், மக்களுக்கு நலன்புரி நன்மைகள் செலுத்துதல் தொடர்பான செய்தி சென்றடைந்தமையை உறுதிப்படுத்துதல், தகுதியான நபர்களை கண்டறியும் செயற்திட்டம் தொடர்பில் வினைத்திறனான தகவல்களை பெற்றுக்கொள்ளுதல் என்பன தொடர்பாக ஆராயப்பட்டன.

யாழ்ப்பாண மாவட்ட செயலக நலன்புரிக்கழகத்தினால் ஏற்பாடு செய்யப்பட்ட வாணி விழா நிகழ்வுகள் மாவட்ட செயலக நலன்புரிச்சங்க தலைவரும் கணக்காளருமான திரு. அ. நிர்மல் தலைமையில் இன்று (04) காலை 9.00 மணிக்கு மாவட்ட செயலக கேட்போர் கூடத்தில் நடைபெற்றது.
இந்த நிகழ்வின் பிரதம விருந்தினராக மாவட்ட அரசாங்க அதிபர் கணபதிப்பிள்ளை மகேசன் கலந்து கொண்டதோடு, நாம் தற்போது வாழ்ந்துகொண்டிருக்கும் இயந்திரமயமான இந்த வாழ்க்கைக்கு இவ்வாறான ஆன்மிக செயற்பாடுகள் மிகவும் முக்கியமானதாகும் என்றும்,
நவராத்திரி பூஜையின் சிறப்பு மற்றும் முக்கியத்துவம் பற்றியும் கருத்து தெரிவித்தார்.
இந் நிகழ்வின் சிறப்பு விருந்தினராக கலந்துகொண்ட செஞ்சொற்செல்வர் கலாநிதி ஆறுதிருமுருகனினால் வாழ்க்கையின் தத்துவங்கள், பெண்களின் சிறப்பு குறித்து சொற்பொழிவு ஆற்றப்பட்டது.

யாழ்ப்பாண மாவட்ட டெங்கு கட்டுப்பாட்டுக் குழுக்கூட்டம் தொடர்பான கலந்துரையாடல் மாவட்ட அரசாங்க அதிபர் கணபதிப்பிள்ளை மகேசன் தலைமையில் 30.09.2022 காலை 11.00 மணிக்கு மாவட்ட செயலக கேட்போர் கூடத்தில் நடைபெற்றது.
இக் கலந்துரையாடலில் யாழ்.மாவட்டத்தில் டெங்கு நுளம்பின் தாக்கம் அதிகரித்து காணப்படுகின்றமையினால் அதனைத் தடுப்பதற்கான முற்காப்பு நடவடிக்கைகளை மேற்கொள்ளல், மாவட்ட, பிரதேச ,கிராம மட்டங்களில் குழுக்களை நியமித்து கண்காணிப்பு மற்றும் விழிப்புணர்வு நடவடிக்கைகளை மேற்கொள்ளல், கழிவகற்றல் முகாமைத்துவத்தினை வினைத்திறனாக மேற்கொள்வதன் ஊடாக டெங்கை கடடுப்படுத்தல், பராமரிக்கப்படாத காணிகளில் பயிர்ச்செய்கை நடவடிக்கைளுக்கு உட்படுத்தல், பொது சுகாதார பரிசோதகர்கள் எதிர்நோக்கும் சவால்கள், டெங்கு கட்டுப்பாட்டு வாரத்தை பிரகடனப்படுத்தி விழிப்புணர்வை ஏற்படுத்தல், டெங்கு கட்டுப்பாடு தொடர்பான முப்படையினரின் பங்களிப்பு, அதிகூடிய டெங்கு பரவும் இடங்களை தெரிவு செய்து நேரடிக்கண்காணிப்பில் கூட்டுப்பங்களிப்புடன் ஈடுபடுதல்,டெங்கு கட்டுப்பாடு தொடர்டபான சட்ட நடவடிக்கைகளை மேற்கொள்ளல் தொடர்பாக கலந்துரையாடப்பட்டன.

  1. இலங்கை சமூக பாதுகாப்பு சபையின் விருது வழங்கும் நிகழ்வில் அகில இலங்கை ரீதியில் யாழ்ப்பாண மாவட்ட செயலகம் முதலிடம்.
  2. தகவல் அறியும் சட்டத்தினை கையாளுகையில் ஊடகவியலாளர்களுக்கு உள்ள சவால்கள்
  3. கிராமத்திற்கு தகவல்கள் அறியும் உரிமைச் சட்டம் தொடர்பான நிகழ்ச்சித்திட்டம்
  4. மீள்குடியேற்ற சமூக நல்லிணக்கம் மற்றும் வாழ்வாதார உதவித் திட்டங்களை வழங்குதல் தொடர்பான கலந்துரையாடல்