யாழ்ப்பாணம் மயிலிட்டி மீன்பிடித் துறைமுகத்தின் 300 மில்லியன் ரூபாவிலான மூன்றாம் கட்ட அபிவிருத்திப் பணிகள் இன்றைய தினம் (01.09.2025) திங்கட்கிழமை காலை 09.30 மணிக்கு உத்தியோகபூர்வமாக மாண்புமிகு ஜனாதிபதி

அநுர குமார திசாநாயக்க அவர்களினால் ஆரம்பித்து வைக்கப்பட்டது.

இந் நிகழ்வில் கடற்றொழி்ல் நீரியல் மற்றும் கடல் வளங்கள் அமைச்சரும் யாழ்ப்பாண மாவட்ட ஒருங்கிணைப்புக் குழுவின் தலைவருமான கௌரவ இராமலிங்கம் சந்திரசேகர், வடமாகாண ஆளுநர் கெளரவ நாகலிங்கம் வேதநாயகன், கூட்டுறவு அபிவிருத்தி திணைக்கள பிரதி அமைச்சர் கௌரவ உபாலி சமரசிங்க, பிரதி அமைச்சர் கெளரவ சுனில் வட்டஹல, பாராளுமன்ற உறுப்பினர் கெளரவ கருணநாதன் இளங்குமரன், கெளரவ ஜெயசந்திரமூர்த்தி றஜீவன், கெளரவ சண்முகநாதன் சிறிபவானந்தராஜா, பிரதம செயலாளர், அரசாங்க அதிகாரிகள் மற்றும் பொதுமக்கள் பங்குபற்றினார்கள்.

 

        

நெவாட் நிர்வாக கட்டடத் திறப்பு விழாவானது கியூடெக் - கரித்தாஸ் நிறுவனத்தின் இயக்குநர் யாழ்ப்பாணம் அருட்பணி அன்ரோ டெனிசியஸ் அவர்கள் தலைமையில் இன்றைய தினம் (29.08.2025) வெள்ளிக்கிழமை மு.ப 10.00 மணிக்கு கடற்கரை வீதி, யாழ்ப்பாணத்தில் நடைபெற்றது .

இந் நிகழ்வில் பிரதம விருந்தினராக யாழ்ப்பாண மாவட்ட அரசாங்க அதிபர் திரு மருதலிங்கம் பிரதீபன் அவர்களும், சிறப்பு விருந்தினராக யாழ் பல்கலைக்கழக மீன்பிடியல் துறைத் தலைவர் கலாநிதி திருமதி எஸ். சுதர்சினி அவர்களும், கெளரவ விருந்தினர்களாக அருட்பணி கி . ஜெயக்குமார் அவர்களும் மற்றும் அருட்பணி ச. இயூஜின் பிரான்சிஸ் அவர்களும் பங்குபற்றினார்கள்.

இந் நிகழ்வானது யாழ் மறை மாவட்ட ஆயர் பேர்ருட் கலாநிதி யஸ்ரின் பேணாட் ஞானப்பிரகாசம் ஆண்டகை அவர்களின் ஆசியுரை யுடன் நடைபெற்றது குறிப்பிடத்தக்கது. 

 

       

கோப்பாய் பிரதேச செயலகத்திற்கு நியமிக்கப்பட்ட திரு. ஈ. தயாரூபன் அவர்களும், சாவகச்சேரி பிரதேச செயலாளராக நியமிக்கப்பட்ட திரு F. C. சத்தியசோதி அவர்களும் இன்றைய தினம் (01.09.2025) காலை 08.30 மணிக்கு அரசாங்க அதிபர் திரு. மருதலிங்கம் பிரதீபன் அவர்களிடம் தமக்கான நியமனக்கடிதங்களை பெற்றுக்கொண்டனர்.

மேலும் இன்றைய தினமே புதிதாக நியமிக்கப்பட்ட கோப்பாய் மற்றும் சாவகச்சேரி பிரதேச செயலாளர்கள் தமது கடமையினை பொறுப்பேற்றார்கள் என்பது குறிப்பிடத்தக்கது.

 

 

 

உணவு பாதுகாப்பு தொடர்பான செயலமர்வு யாழ்ப்பாண மாவட்ட அரசாங்க அதிபர் திரு மருதலிங்கம் பிரதீபன் அவர்கள் தலைமையில் மாவட்ட செயலக மாநாட்டு மண்டபத்தில் இன்றைய தினம் (29.08.2025) காலை 09.00 மணிக்கு நடைபெற்றது.

இக் கலந்துரையாடலில் தலைமையுரையாற்றிய அரசாங்க அதிபர் அவர்கள், உணவு பாதுகாப்பு வலையமைப்பினை மேம்படுத்தல் மூலம் வறுமை நிலைமையினையும், உணவுப் பாதுகாப்பற்ற விடயங்களையும் அடையாளப்படுத்தி தரவுகளை சேகரிப்பதாகும் எனவும், திட்டங்களை நடைமுறைப்படுத்தும் போது சரியான தரவுகள் அவசியம் எனவும், தரவுகள் சேகரிப்பு முழுமையடைந்து ஆய்வு செய்யப்பட்டு இவ்வருடத்திற்கான முதலாவது அறிக்கை வெளியிடப்படும் எனவும் தெரிவித்தார். ஆய்வின் மூலம் உரிய திட்டங்களை நடைமுறைப்படுத்த உதவியாகவிருக்கும் எனவும் தெரிவித்தார். மேலும் யாழ்ப்பாண மாவட்டத்தில் உலக உணவுத் திட்டம் பல ஆண்டுகளாக பாரிய பங்களிப்புக்களை வழங்கிவருவதாகவும், அந்த வகையில் வடக்கு கிழக்கில் உலக உணவுத் திட்டத்தினை கையாண்ட அதிகாரி திரு. நியூமத் அவர்களின் பங்களிப்பினையும் பாராட்டியதுடன் கொழும்பிலிருந்து வருகை தந்த உத்தியோகத்தர்களுக்கும் தமது நன்றியினைத் தெரிவித்ததுடன்,

உணவு பாதுகாப்பு தொடர்பான திட்டங்களை நடைமுறைப்படுத்த அனைவரது ஒத்துழைப்பினையும் நல்குமாறும் அரசாங்க அதிபரால் கேட்டுக் கொள்ளப்பட்டது.

இக் கலந்துரையாடலில் அமைச்சின் உதவிப் பணிப்பாளர், மாவட்ட திட்டமிடல் பணிப்பாளர், மாவட்ட புள்ளிவிபர பிரதிப் பணிப்பாளர், பிரதி திட்டமிடல் பணிப்பாளர் உள்ளிட்டவர்கள் கலந்து கொண்டார்கள்.