கிராமிய வீதி அபிவிருத்தி நிகழ்ச்சித் திட்டம் தொடர்பான கலந்துரையாடல் யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்கள் தலைமையில் இன்றைய தினம் (21.03.2025) காலை 09.00 மணிக்கு மாவட்டச் செயலக கேட்போர் கூடத்தில் நடைபெற்றது.

இக் கூட்டத்தில் தலைமையுரையாற்றிய அரசாங்க அதிபர் அவர்கள், வீதி புனரமைப்பு பணிகளில் ஈடுபடும் திணைக்களத்துடன் இணைந்த வகையில் கமநலசேவைகள் திணைக்களம் நீர்ப்பாசனத் திணைக்களம் போன்ற ஏனைய தொடர்புடைய திணைக்களங்களின் ஆலோசனைகளையும் பெற்று ஒருங்கிணைந்தவகையில் நடைமுறைப்படுத்த வேண்டும் எனவும், குறிப்பாக அண்மையில் ஏற்பட்ட வெள்ள அனர்த்தத்தினை தான் நேரடியாக ஆய்வு செய்த போது பொதுமக்கள் பல கருத்துக்களை முன்வைத்தார்கள் எனவும், குறிப்பாக வெள்ளம் தரித்த இடத்தில் மதகு அமைத்திருந்தால் வெள்ளம் தரித்து நிற்காது என பல பெறுமதியான கருத்துக்களை முன்வைத்தார்கள் எனவும் குறிப்பிட்டதுடன், இதன் மூலம் வீதிப் புனரமைப்பிற்குசிறந்த பொறிமுறையின் அவசியம் கட்டாயம் தேவை எனவும், ஆதலால் அனைவரினதும் ஆலோசனைகளை கூட்டுப் பொறுப்புடன் இனி வருங்காலங்களில் வீதி புனரமைப்பு வேலைகளை நிறைவேற்ற வேண்டும் என வலியுறுத்தினார். மேலும், அரசாங்கமானது வரவு செலவுத் திட்டத்தின் ஊடாக வடமாகாணத்தின் வீதிகளைப் புனரமைப்பதற்காக நிதி ஒதுக்கீடு செய்துள்ளதாகவும், அதற்கமைய யாழ்ப்பாண மாவட்டத்தின் வீதிகளையும் புனரமைப்பதற்கும் நிதி ஒதுக்கீடு செய்துள்ளதாகவும் குறிப்பிட்டார். மேலும், போக்குவரத்து, பெருந்தெருக்கள், துறைமுகம் மற்றும் சிவில் விமான சேவைகள் அமைச்சின் ஊடாக நடைமுறைப்படுத்தப்படவுள்ள வீதி புனரமைப்பு திட்டத்தில் முன்னுரிமை அடிப்படையில் நிறைவேற்ற வேண்டிய வீதிகளை இனங்காண்பதே இக் கூட்டத்தின் நோக்கமாகும் எனக் குறிப்பிட்டதுடன், பிரதேச செயலாளர்கள் புனரமைக்கப்பட வேண்டிய அனைத்துத் தர வீதிகளின் விபரங்களை வீதிகளுக்குரிய வீதி அபிவிருத்தி அதிகார சபை, வீதி அபிவிருத்தி திணைக்களம் மற்றும் உள்ளூராட்சி மன்றங்களுடன் இணைந்த வகையில் சரியான முறையில் தயாரித்து வைக்குமாறும் அரசாங்க அதிபர் அறிவுறுத்தல்கள் வழங்கினார்.

ஒவ்வொரு பிரதேச செயலக ரீதியாக முன்னுரிமை அடிப்படையில் புனரமைப்பு செய்ய வேண்டிய வீதிகள் தொடர்பாக விரிவாக ஆராயப்பட்டது.

இக் கலந்துரையாடலில் நிகழ்நிலையூடாக (Zoom) வீதி அபிவிருத்தி அதிகார சபையின் மாகாணப் பணிப்பாளரும், நேரடியாக திட்டமிடல் பணிப்பாளர், பிரதேச செயலாளர்கள், வீதி அபிவிருத்தி திணைக்கள பொறியியலாளர், உள்ளூராட்சி உதவி ஆணையாளர், உள்ளிட்ட தொடர்புடைய திணைக்கள அதிகாரிகள் கலந்து கொண்டார்கள்.

 

     

வருடம்தோறும் வெகு விமர்சையாக இடம்பெறும் கச்சதீவு புனித அந்தோனியார் ஆலய திருவிழா நேற்றைய தினம் (14.03.2025) கொடியேற்றத்துடன் இடம்பெற்றது.

கொடியேற்றத்துடன் ஆரம்பமான திருவிழாவில் சிலுவைப் பாதை, நற்கருணை ஆராதனை மற்றும் திருச்சொரூப பவனி ஆகியன இடம்பெற்றன.

வருடாந்த திருநாள் திருப்பலி நிகழ்வு இன்றைய தினம் (15.03.2025) காலை 06.15 மணிக்கு திருச்செபமாலையுடன் ஆரம்பமாகியது. வணக்கத்துக்குரிய தமிழ்நாடு சிவகங்கை மறைமாவட்ட ஆயர் பேரருட்தந்தை லூர்து ஆனந்த் மற்றும் யாழ். மறை மாவட்ட குருமுதல்வர் வணக்கத்துக்குரிய அருட்தந்தை P.J. ஜெபரட்ணம், அடிகளார் தலைமையில் இலங்கை இந்திய பங்குத் தந்தையர்களின் கூட்டுத் திருப்பலி யாக ஒப்புக்கொடுக்கப்பட்டதனைத் தொடர்ந்து காலை 09.30 மணியளவில் புனிதரின் திருச் சொருப ஆசிர்வாதம் இடம்பெற்றது.

இன்றைய திருவிழாவில் நெடுந்தீவு பங்குத்தந்தை வணக்கத்துக்குரிய பி. பத்திநாதர், கொழும்பு பிரதேச பங்குத்தந்தை வணக்கத்துக்குரிய சிஸ்வான் டீ குரூஸ் உள்ளிட்ட இலங்கை இந்திய அருட்தந்தைகள் ஏராளமானோர் பங்குபற்றினார்கள்.

இத் திருவிழாவில் கடற்றொழி்ல் நீரியல் மற்றும் கடல் வளங்கள் அமைச்சரும் ஒருங்கிணைப்புக் குழுவின் தலைவருமான கௌரவ இராமலிங்கம் சந்திரசேகர் அவர்களும், பாராளுமன்ற உறுப்பினர் கெளரவ ஜெயச்சந்திரமூர்த்தி றஜீவன் அவர்களும், இந்திய துணைத் தூதுவர் கெளரவ சாய் முரளி அவர்களும் தூதரக அதிகாரி திரு இ. நாகராஜன் அவர்கள், அரசாங்க அதிபர் திரு மருதலிங்கம் பிரதீபன் அவர்கள், இலங்கை கடற்படைத் தளபதி, வட மாகாண கடற்படை கட்டளை தளபதி உள்ளிட்ட கடற்படை உயரதிகாரிகள் மற்றும் பொலிஸ் உயர் அதிகாரிகள் உள்ளிட்ட இலங்கை மற்றும் இந்தியாவினைச் சேர்ந்த 8500 ற்கு மேற்பட்ட பக்தர்கள் கலந்து கொண்டனர்.

இத்திருவிழாவில் பக்தர்களின் நலன் கருதி சுகாதார வசதிகள் போக்குவரத்து ஒழுங்குகள், உணவு வழங்கல் உள்ளிட்ட அடிப்படை வசதிகள் ஒழுங்குசெய்யப்பட்டிருந்தன.

 

 

 

 

                   

AI (Arificial Intelligence) தொழில்நுட்பம் தொடர்பாக உத்தியோகத்தர்களுக்கான செயலமர்வு யாழ்ப்பாண மாவட்ட உஅரசாங்க அதிபர் திரு. மருதலிங்கம் பிரதீபன் அவர்கள் தலைமையில் இன்றைய தினம் (17.03.2025) காலை 09.30 மணி தொடக்கம் பி.ப 12.30 மணி வரை மாவட்டச் செயலக மாநாட்டு மண்டபத்தில் நடைபெற்றது.

இதன்போது தலைமையுரையாற்றிய மாவட்ட அரசாங்க அதிபர் அவர்கள் தற்போதைய காலகட்டத்தில் AI தொழில்நுட்பம் மிக முக்கியமானதாக மாறிவிட்டதாகவும், சர்வதேச ரீதியாக புகழ் பெற்றுள்ள துறையாக இந்த AI தொழில்நுட்பம் வளர்ந்துள்ளது எனவும், இது தொடர்பில் ஓரளவு தெளிவு இருந்தாலும் இந்த தொழில்நுட்பம் தொடர்பாக மேலதிக தெளிவுகளை முழுமையாக பெற்றுக்கொள்ள இவ்வாறான சந்தர்ப்பங்களை வினைத்திறனாக பயன்படுத்தி பயன்பெற வேண்டும் எனவும் அரசாங்க அதிபர் தெரிவித்தார்.

இச் செயலமர்வில் உத்தியோகத்தர்களுக்கு AI தொழில்நுட்பம் என்றால் என்ன என்பது பற்றியும், அதன் முக்கியத்துவம் மற்றும் அரச அலுவலகங்களில் அதன் தேவைப்பாடு மற்றும் பயன்பாடுகள் தொடர்பாகவும் விளக்கமளிக்கப்பட்டது.

இச்செயலமர்வில் றுகுணு பல்கலைக்கழக பொருளியல் துறை சிரேஷ்ட விரிவுரையாளர் திரு.நளின் விஜயசிங்க, சிரேஸ்ட விரிவுரையாளரும் ருகுணு பல்கலைக்கழக சமூக நல்லிணக்க நிலைய பணிப்பாளருமான கலாநிதி சுரேன்ஜித் குணசேகர, மாவட்ட, பிரதேச செயலக தகவல் தொடர்பாடல் தொழில்நுட்ப உத்தியோகத்தர்கள் உட்பட மாவட்ட செயலக உத்தியோகத்தர்களும் கலந்து கொண்டனர்.

 

 

     

உள்ளூரதிகார சபைகள் தேர்தல்கள் தொடர்பான வேட்புமனுக்கள் எதிர்வரும் 17 ஆம் திகதி தொடக்கம் 20 ஆம் திகதி நண்பகல் 12.00 மணி வரை ஏற்கப்படவுள்ளதால் அது தொடர்பிலான முன்னாயத்த கலந்துரையாடல் தெரிவத்தாட்சி அலுவலர் திரு மருதலிங்கம் பிரதீபன் அவர்களின் தலைமையில் 14.03.2025 அன்று பி. ப 4.00 மணிக்கு மாவட்ட செயலக அரசாங்க அதிபர் அலுவலகத்தில் நடைபெற்றது .

இக் கலந்துரையாடலில் பிரதிப் பொலிஸ்மா அதிபர் திரு ஜே. ஏ. ஹாலிங்க ஜெயசிங்க, உதவித் தேர்தல் ஆணையாளர் திரு இ. சசீலன், பிரதம கணக்காளர் திரு எஸ். கிருபாகரன், பிரதம உள்ளகக் கணக்காய்வாளர் திரு. ரமேஷ்குமார் மற்றும் கணக்காளர் திரு. ஏ. நிர்மல் ஆகியோர் கலந்து கொண்டனர்.