வலுசக்தி அமைச்சிற்கு மேலதிக செயலாளராக பதவியுயர்வு பெற்றுச் செல்லும் மேலதிக அரசாங்க அதிபர் (காணி) திரு.க.ஸ்ரீமோகனன் அவர்களுக்கான சேவைநலன் பாராட்டு விழா மற்றும் பிரியாவிடை நிகழ்வு யாழ் மாவட்ட அரசாங்க அதிபர் திரு. மருதலிங்கம் பிரதீபன் அவர்கள் தலைமையில் இன்றைய தினம் (30.06.2025) பி. ப. 02.30 மணிக்கு மாவட்ட செயலக கேட்போர் கூடத்தில் நடைபெற்றது.

இந் நிகழ்வில் தலைமையுரையாற்றிய

அரசாங்க அதிபர் அவர்கள்,

யாழ்ப்பாண மாவட்டத்தில் 02 வருடங்களாக மேலதிக அரசாங்க அதிபர் (காணி) பதவியினை சிறப்புற கடமையாற்றி இலங்கை நிர்வாக சேவைகள் விசேட தரத்திற்கு பதவியுர்வு பெற்றுச் செல்லும் திரு ஸ்ரீமோகனன் அவர்கள், ஊர்காவற்றுறையின் உதவி அரசாங்க அதிபராகவும் தெல்லிப்பளை மற்றும் கரவெட்டி பிரதேசங்களின் பிரதேச செயலாளராகவும் பணியாற்றி பின்னர், வடக்கு மாகாண கைத்தொழில் திணைக்கள த்தின் மாகாணப் பணிப்பாளராகவும் கிளிநொச்சி மாவட்ட மேலதிக அரசாங்க அதிபராகவும் பணியாற்றியவர் எனத் தெரிவித்தார். மேலும், தன்னுடன் சமகாலத்தில் இலங்கை நிர்வாக சேவை கடமையில் இணைந்து கடமையாற்றிவருகின்றார் என தெரிவித்ததுடன், உத்தியோகத்தர்கள் தென்பகுதிக்கு கடமைமைக்கு செல்வது மிகவும் குறைவான நிலையில், அமைச்சரவை அந்தஸ்துள்ள அமைச்சிற்கு மேலதிகச் செயலாளராக பதவியுயர்வு பெற்றுச் செல்வது தொடர்பில் வாழ்த்து தெரிவித்ததுடன், மீள்குடியேற்ற பிரதேசங்களில் குறிப்பாக தெல்லிப்பளை பிரதேசத்தில் ஆற்றிய பணி காத்திரமானது எனவும், காணி விடுவிப்பு மற்றும் அபிவிருத்தி வேலைகளில் சிறப்புற கடமையாற்றியதன் அடிப்படையில் மேலதிக அரசாங்க அதிபர் காணிக்கான பொறுப்பினை சிறப்பாக கடமையாற்றியவர் எனவும் தெரிவித்து தனது வாழ்த்துக்களை அரசாங்க அதிபர் தெரிவித்தார்.

இந் நிகழ்வில் மாவட்ட செயலக பிரதம கணக்காளர், பிரதம உள்ளகக் கணக்காய்வாளர், திட்டமிடல் பணிப்பாளர்,  பிரதம பொறியியலாளர், கணக்காளர், கணக்காளர் (பெறுகை), பிரதித் தேர்தல் ஆணையாளர், சமுர்த்திப் பணிப்பாளர், சமுர்த்தி கணக்காளர், பிரதி பதிவாளர் நாயகம், பிரதி புள்ளிவிபர பணிப்பாளர், நிர்வாக உத்தியோகத்தர், மோட்டார் போக்குவரத்து திணைக்கள உதவி ஆணையாளர், உதவி மாவட்ட செயலாளர், காணிப் பயன்பாட்டு திட்டமிடலின் உதவிப் பணிப்பாளர், மொழிபெயர்ப்பாளர், மேலதிக மாவட்டப் பதிவாளர் உள்ளிட்ட உத்தியோகத்தர்களால் வாழ்த்துரைகள் நிகழ்த்தப்பட்டது.

அதனைத் தொடர்ந்து, அரசாங்க அதிபர் அவர்களினால் பொன்னாடை அணிவித்து

கௌரவிக்கப்பட்டு நினைவுச் சின்னமும் வழங்கப்பட்டது. மேலும் கிளைகள் ரீதியாக பதவிநிலை உத்தியோகத்தர்கள் மற்றும் உத்தியோகத்தர்களாலும் கெளரவிக்கப்பட்டார்கள்.

இறுதியாக மேலதிக அரசாங்க அதிபர் தனது ஏற்புரையில், இவ் விழாவினை ஏற்பாடு செய்த அரசாங்க அதிபர் உள்ளிட்ட குழுவினருக்கு தமது நன்றியினைத் தெரிவித்ததுடன், அரச சேவையில் மாற்றம் என்பது மாறாதாது என்றவகையில் வகையில் என்னுடன் கடமையாற்றி ஒத்துழைப்பு நல்கிய அனைத்து உத்தியோகத்தர்களும் தமது நன்றியினைத் தெரிவித்துக் கொண்டார்.

இந் நிகழ்வில் மாவட்டச் செயலக பதவிநிலை உத்தியோகத்தர்கள் மற்றும் உத்தியோகத்தர்கள் கலந்துகொண்டனர்.

 

 

               

யாழ்ப்பாண மாவட்ட பண்பாட்டு பேரவையின் ஆண்டுப் பொதுக் கூட்டமானது அரசாங்க அதிபரும் பண்பாட்டு பேரவையின் தலைவருமான திரு.மருதலிங்கம் பிரதீபன் அவர்களின் தலைமையில் இன்றைய தினம் (28.06.2025)காலை 10.00 மணிக்கு மாவட்ட செயலக கேட்போர் கூடத்தில் நடைபெற்றது.

இக் கலந்துரையாடலில் தலைமையுரையாற்றிய அரசாங்க அதிபர் அவர்கள், இக் கூட்டத்திற்கு பெருந்திரளாக கலைஞர் வருகை தந்தமையிட்டு தாம் மகிழ்ச்சியடைவதாகவும், இரண்டு ஆண்டுகளுக்கு முன்னர் நடைபெற்ற பொதுக் கூட்டத்திற்கு குறைந்தளவான கலைஞர்களே வருகை தந்தமையினால், இப் பொதுக் கூட்டத்திற்கு கூடியளவு கலைஞர்கள் வருகை தருவதனை கலாசார உத்தியோகத்தர்கள் ஊக்கப்படுத்த வேண்டும் என தாம் கேட்டுக் கொண்டதாகவும் தெரிவித்தார். மேலும் எமது யாழ்ப்பாண மாவட்டம் கலை கலாச்சார பண்பாட்டு விழுமியங்களை பேணும் மாவட்டம் எனவும், கலைஞர் கெளரவிக்கப்பட வேண்டும் எனவும் தெரிவித்ததுடன், அடுத்த சந்ததிக்கு எமது கலைகள் கலாசாரங்கள் எடுத்தச் செல்ல வேண்டிய பொறுப்பு அனைவருக்கும் உண்டு எனவும் தெரிவித்தார். மேலும், புலம்பெயர் தேசங்களில் எம்மவரால் கலைகள் சிறப்பான முறையில் வளர்க்கப்பட்டு வருவதனையும் மகிழ்ச்சியுடன் தெரிவித்ததுடன், அவர்களுடன் இணைந்து நிதி உதவிகளைப் பெற்று கிராமிய ரீதியாக கலை நிகழ்ச்சிகளை நடாத்த வேண்டும் எனவும் தெரிவித்தார். மேலும், ஆண்டுக்கு ஒரு தடவை நடக்கும் பண்பாட்டுப் பெரு விழாவுடன் எமது செயற்பாடுகள் நின்றுவிடாது கலைகளை வளர்ப்பதற்கு உரிய ஆரோக்கியமான ஆலோசனை களை எமக்கு கலைஞர்கள் வழங்கி எம்மையும் ஊக்கப்படுத்தி எமது கலை கலாச்சார பண்பாடுகளை பேணவதற்கும் மேன்மேலும் வளர்ப்பதற்கும் அனைவரும் ஒன்றிணைந்து செயற்படுவோம் எனத் தெரிவித்தார்.

இப் பொதுக் கூட்டத்தில் ஆண்டுப் பொதுக்கூட்ட அறிக்கை மற்றும் கணக்கறிக்கை என்பன வாசிக்கப்பட்டு அங்கத்தவர்களால் ஏகமனதாக ஏற்றுக்கொள்ளப்பட்டது. அதனைத் தொடர்ந்து புதிய நிர்வாக சபையானது தெரிவு செய்யப்பட்டது.

யாழ்ப்பாண மாவட்ட பண்பாட்டு பேரவையின் தலைவராக பதவி வழியாக அரசாங்க அதிபரும், செயலாளராக மாவட்ட கலாசார உத்தியோகத்தரும் மற்றும் நிர்வாக சபையில் ஒவ்வொரு பிரதேச செயலாளர் பிரிவின் கலாசார உத்தியோகத்தர்களும் செயற்படுவார்கள். ஏனைய பதிவிகளுக்கானதெரிவுகள் நடைபெற்றது. அந்த வகையில், உப தலைவராக பேராசிரியர் என். சண்முகலிங்கன், உப செயலாளராக திரு. கே. தேவானந், பொருளாராக திரு. செ. மகேஷ் மற்றும் 15 நிர்வாக சபை உறுப்பினர்களாக ஒவ்வொரு பிரதேச செயலாளர் பிரிவு ரீதியாக ஒரு கலைஞர்களும் தெரிவு செய்யப்பட்டார்கள். இப் பொதுக் கூட்டத்தில் 35 பேரைக்கொண்ட புதிய நிர்வாக சபையானது யாப்பின் பிரகாரம் இரண்டு ஆண்டுகள் தொடர்ச்சியாக செயற்படும் என்பது குறிப்பிடத்தக்கது.

இறுதியாக செயலாளரும், மாவட்ட சிரேஸ்ட கலாசார உத்தியோகத்தருமான திருமதி சுகுணாளினி விஜயரட்ணம் அவர்களின் நன்றியுரை இடம் பெற்றது.

இப் பொதுக் கூட்டத்தில் உதவி மாவட்டச் செயலாளர் செல்வி உ.தா்சினி, மாவட்ட மற்றும் பிரதேச கலாசார உத்தியோகத்தர்கள் மற்றும் சிரேஷ்ட இளங் கலைஞர்கள் கலந்து கொண்டனர்.

 

 

 

     

யாழ்ப்பாண மாவட்ட பிரதேச செயலகங்களுக்கிடையிலான வருடாந்த விளையாட்டு விழாவும் பரிசளிப்பு நிகழ்வும் யாழ்ப்பாண மாவட்ட மேலதிக அரசாங்க அதிபர் (காணி) திரு. க.ஸ்ரீமோகனன் அவர்களின் தலைமையில் இன்றைய தினம் (29.06.2025) பி.ப 02.30 மணி முதல் மாலை 06.00 மணி வரை யாழ்ப்பாணம் துரையப்பா விளையாட்டரங்கில் நடைபெற்றது.

இந் நிகழ்வில் பிரதம விருந்தினராக அரசாங்க அதிபர் திரு மருதலிங்கம் பிரதீபன் அவர்களும் சிறப்பு விருந்தினராக வடக்கு மாகாண விளையாட்டு திணைக்களத்தின் பணிப்பாளர் திரு.பா. முகுந்தன் அவர்களும் கலந்து சிறப்பித்திருந்தனர்.

இந் விளையாட்டு விழாவில் தலைமையுரையாற்றிய மேலதிக அரசாங்க அதிபர் (காணி), வருடாந்த விளையாட்டு விழாவானது பெரு விழாவாக முன்னைய காலங்களில் நடைபெற்றது எனவும், இவ் இறுதி நிகழ்வில் வீர வீராங்கனைகளின் எண்ணிக்கை குறைவாகவிருப்பதாகவும், பிரதேச மட்டத்தில் விளையாட்டு போட்டிகள் நடைபெற்று பின்னர் மாவட்ட மட்டத்தில் நடைபெற்று மாகாண மற்றும் தேசிய போட்டிகளுக்கு வீர வீராங்கனைகள் அனுப்பிவைக்கப்படுவார்கள் என்றும் தெரிவித்தார். விளையாட்டின் முக்கியத்துவம் கட்டாயத் தேவை எனவும் குறிப்பிட்டு விளையாட்டு விழா சிறப்பாக நடைபெற்றதற்கு ஒத்துழைப்பு நல்கிய அனைவருக்கும் தமது நன்றியினைத் தெரிவித்துக் கொண்டார்.

இந் நிகழ்வில் பிரதம விருந்தினராக கலந்து கொண்ட அரசாங்க அதிபர் அவர்கள் தமதுரையில், பிரதேச செயலகங்களுக்கிடையிலான இன்றைய இப் போட்டியில் பங்குபற்றிய வீர வீராங்கனைகளின் எண்ணிக்கையினை பார்க்கும் போது யாழ்ப்பாண மாவட்டத்தில் விளையாட்டுத் துறை வீழ்ச்சியடைந்துவிடுமோ என்ற ஐயம் தமக்கு ஏற்பட்டுள்ளதாக தெரிவித்ததுடன் இது தொடர்பில் விளையாட்டுத்துறை உத்தியோகத்தர்கள் அதிக கவனம் எடுக்க வேண்டும் எனவும் தெரிவித்தார். மேலும், அடுத்த வருடம் நடைபெறவுள்ள போட்டிகளில் கூடியளவு வீர வீராங்கனைகள் பங்குபற்றுவதை விளையாட்டு உத்தியோகத்தர்கள் உறுதிப்படுத்தி செயற்படுமாறு அரசாங்க அதிபர் கேட்டுக்கொண்டு, யாழ்ப்பாண விளையாட்டுத்துறை வளர்ச்சிக்கு அனைவரும் ஒன்றிணைந்து ஒத்துழைப்பு நல்குமாறும் கேட்டுக்கொண்டார்.

பிரதேச செயலகங்களுக்கிடையிலான போட்டியில் பதக்கங்களின் அடிப்படையில் முதலாம் இடத்தினை தெல்லிப்பளை பிரதேச செயலக அணியும், இரண்டாம் இடத்தினை நல்லூர் பிரதேச செயலக அணியும், மூன்றாவது இடத்தினை சண்டிலிப்பாய் பிரதேச செயலக அணியும் பெற்றுக்கொண்டமை குறிப்பிடத்தக்கது.

இந்நிகழ்வில் மாவட்டச் செயலக பதவிநிலை உத்தியோகத்தர்கள், பிரதேச செயலாளர்கள், விளையாட்டுத்துறை உத்தியோகத்தர்கள் விளையாட்டு வீர வீராங்கனைகள் கலந்து கொண்டார்கள்.

 

          

 

 

பொதுநிர்வாக உள்நாட்டலுவல்கள் மாகாண சபைகள் மற்றும் உள்ளூராட்சி அமைச்சின் கீழ் உள்ள சுற்றுலா விடுதிகள் மற்றும் மாவட்ட மற்றும் பிரதேச செயலகங்களுக்கு முன்மொழியப்பட்ட பழுதுபார்ப்பு மற்றும் மேம்பாடுகள் தொடர்பான கலந்துரையாடல் மாவட்ட அரசாங்க அதிபர் திரு மருதலிங்கம் பிரதீபன் அவர்களின் தலைமை இன்றைய தினம் (27.06.2025 ) பி.ப 4.00 மணியளவில் அரசாங்க அதிபர் அலுவலகத்தில் இடம்பெற்றது.

இதன் போது தலைமையுரையாற்றிய அரசாங்க அதிபர் அவர்கள், கடந்த வாரம் இடம்பெற்ற அரசாங்க அதிபர்களுக்கான மாநாட்டில் குறித்த பிரச்சினை தொடர்பாக கோரிக்கை முன்வைத்ததாகவும், ஒருவார காலத்திற்குள் அமைச்சின் அதிகாரிகள் நேரடியாக களவிஜயம் மேற்கொண்டு அரசாங்க ஓய்வு விடுதிகள் (Circuit Bungalows) மாவட்ட மற்றும் பிரதேச செயலக முன்மொழியப்பட்ட மேம்பாட்டு வேலைத்திட்டங்கள் தொடர்பாக செயற்பாடுகளை முன்னெடுத்தமைக்கு நன்றிகளை தெரிவித்தார்.

மேலும், அரசாங்க ஓய்வு விடுதிகளில் மேலதிகமாக தங்குமிட வசதிகள் மற்றும் குடிதண்ணீர் தாங்கி வசதி மற்றும் பிற தேவைகளுக்கான நீர் தேவைப்பாடுகள் உள்ளதாகவும் தெரிவித்துடன், அல்லைப்பிட்டியில் உள்ள பொது நிர்வாக அமைச்சிற்குரிய ஓய்வு விடுதி நீண்ட காலமாக செயற்படாமல் உள்ளதாகவும், சுற்றுலாப் பயணிகள் தங்குவதற்கு அதனை வழங்கலாம் எனவும் ஆதலால் அவ் அல்லைப்பிட்டி ஓய்வு விடுதியினை மீள ஆரம்பிக்க நடவடிக்கை எடுக்க வேண்டும் என அரசாங்க அதிபரால் வலியுறுத்திக் கேட்கப்பட்டது.

இக் கலந்துரையாடலில் கலந்து கொண்ட பொது நிர்வாக உள்நாட்டலுவல்கள் மாகாண சபைகள் மற்றும் உள்ளூராட்சி அமைச்சின் பொறியியற் பிரிவு பணிப்பாளர் நாயகம் (தொழில்நுட்பம்) பொறியியலாளர் திரு. யூ.எல்.ஏ. நசார் அவர்கள் தெரிவிக்கையில், இக் கூட்டத்தில் கலந்துரையாடப்பட்ட விடயங்கள் மற்றும் கோரிக்கைகளை அமைச்சின் செயலாளர் அவர்களுடன் கலந்துரையாடி விரைவாக தீர்வினை பெற்றுக் கொள்ள வழிவகை செய்வதாக தெரிவித்தார்.

இக் கலந்துரையாடலில் அமைச்சின் பொறியியற் பிரிவின் பிரதிப் பணிப்பாளர் நாயகம் (தொழில்நுட்பம்) பொறியியலாளர் ஆர்.டபிள்யூ. எல்.சந்திரசிறி, அமைச்சின் பொறியியற்பிரிவு கட்டட கலைஞர்கள், உயரதிகாரிகள்,

மாவட்ட செயலக பிரதம பொறியியலாளர்,

பிரதம கணக்காளர், மாவட்ட மற்றும் பிரதேச செயலக தொழில்நுட்ப உத்தியோகத்தர்கள், தொழில்நுட்ப உதவியாளர்கள், மாவட்ட செயலக பொறியியற்பிரிவு உத்தியோகத்தர்கள் உள்ளிட்டவர்கள் கலந்து கொண்டனர்.