- You are here:
-
Home
- News
யாழ்ப்பாண மாவட்டச் செயலகத்தில் மேற்கொள்ளப்படும் செலவீனங்களை சிபார்சு செய்தல், அனுமதியளித்தல், அத்தாட்சிப்படுத்தும் உத்தியோகத்தர்களுக்கான மென்பொதி தொடர்பான அறிமுக நிகழ்வு மாவட்ட மேலதிக அரசாங்க அதிபர் மருதலிங்கம் பிரதீபன் தலைமையில் 13.09.2022 காலை 8.30 மணிக்கு மாவட்டச் செயலக மாநாட்டு மண்டபத்தில் நடைபெற்றது.
மேலும், எதிர்காலத்தில் இம் மென்பொதி ஊடாக நிதி நடவடிக்கைகள் மேற்கொள்ளவுள்ளமையும் குறிப்பிடத்தக்கதாகும்.இந் நிகழ்வில் மேலதிக அரசாங்க அதிபர்(காணி), மாவட்டச் செயலக பிரதம கணக்காளர், உதவி மாவட்டச் செயலாளர், உள்ளகக் கணக்காய்வாளர், பிரதேச செயலாளர்கள், உதவி பிரதேச செயலாளர்கள், மாவட்ட மற்றும் பிரதேச செயலக கணக்காளர்கள் மற்றும் உத்தியோகத்தர்கள் ஆகியோர் கலந்துகொண்டிருந்தார்கள்.
யாழ்ப்பாண மாவட்டச் செயலக சிறுதொழில் முயற்சி அபிவிருத்திப் பிரிவு யுனிலிவர் நிறுவனத்துடன் இணைந்து நடாத்திய "சன்லைட் மனுதம் வியமன" திட்டத்தின் கீழ் யாழ்ப்பாண மாவட்டத்தில் 06 முயற்சியாளர்கள் தெரிவுசெய்யப்பட்டுள்ளார்கள். அவற்றுள் இரண்டு முயற்சியாளர்களுக்கு மாவட்ட அரசாங்க அதிபர் கணபதிப்பிள்ளை மகேசன், மேலதிக அரசாங்க அதிபர் மருதலிங்கம் பிரதீபன் ஆகியோரினால் இருபதாயிரம் ரூபா காசோலைகள் இன்று(12.09.2022) அரச அதிபர் அலுவலகத்தில் வழங்கிவைக்கப்பட்டது.
மேலும், நான்கு முயற்சியாளர்களுக்கும் அவர்களுடைய பிரதேச செயலகங்களில் இருபதாயிரம் ரூபா காசோலைகள் வழங்கிவைக்கப்படவுள்ளதும் குறிப்பிடத்தக்கது.இதில் சிறுதொழில் முயற்சி அபிவிருத்தி பிரிவின் உதவிப்பணிப்பாளர் மற்றும் உத்தியோகத்தர்கள் ஆகியோரும் கலந்துகொண்டிருந்தார்கள்.
வெதுப்பக உற்பத்திப் பொருட்களுக்கான விலை தொடர்பான கலந்துரையாடல் மாவட்ட அரசாங்க அதிபர் கணபதிப்பிள்ளை மகேசன் அவர்களின் தலைமையில் 08.09.2022 காலை 11 மணிக்கு மாவட்டச் செயலக மாநாட்டு மண்டபத்தில் நடைபெற்றது.
இக் கலந்துரையாடலில் பாராளுமன்ற உறுப்பினரும், பாராளுமன்ற குழுக்களின் பிரதித் தவிசாளரும், யாழ்.மாவட்ட அபிவிருத்திக் குழுக்களின் தலைவருமான கௌரவ அங்கஜன் இராமநாதன் அவர்கள் கலந்துகொண்டிருந்தார். அத்தோடு மேலதிக அரசாங்க அதிபர், உதவி மாவட்டச் செயலாளர், உதவிக் கூட்டுறவு ஆணையாளர், பிறிமா பிராந்திய முகாமையாளர், செரண்டிப் மா விநியோக பிரதிநிதி, பாவனையாளர் அதிகார சபை உத்தியோகத்தர், பேக்கறி உரிமையாளர்கள் மற்றும் மாவட்டச் செயலக உத்தியோகத்தர்கள் ஆகியோர் கலந்துகொண்டிருந்தார்கள்.
இக் கலந்துரையாடலில் வெதுப்பக உற்பத்திகள் மற்றும் அவற்றின் இடர்பாடுகள், உற்பத்தியாளர்கள் எதிர்நோக்கும் பிரச்சனைகள், நுகர்வோர் எதிர்நோக்கும் பிரச்சனைகள், விநியோகஸ்தர்கள் எதிர்நோக்கும் பிரச்சனைகள், வெதுப்பகங்களுக்கான எரிபொருள் விநியோகம், வெதுப்பகங்களுக்கு சரியான பொறிமுறையில் மா விநியோகம் மற்றும் அதன் கட்டுப்பாட்டு விலை, நுகர்வோர் பாதுகாப்பு அதிகார சபை மூலம் கண்காணித்தல் தொடர்பாகவும் ஆராயப்பட்டது.
மேலும், வெதுப்பக உரிமையாளர்களால் பாணின் விலையை இரு நூறு ரூபாவிற்கு விற்பனை செய்வதாக குறிப்பிடப்பட்டதோடு, வெதுப்பக மா விநியோகத்தை சீராக தருமாறும் கோரிக்கை முன்வைக்கப்பட்டது.
USAID நிறுவனத்தின் நிதி அனுசரணையில் தெரிவுசெய்யப்பட்ட தொழில் முயற்சியாளர்களுக்கான உபகரணங்கள் (08.09.2022) மாவட்ட அரசாங்க அதிபர் கணபதிப்பிள்ளை மகேசன் வழங்கிவைத்தார்.
இத் தொழில் உபகரணங்கள் உடுவில், சங்கானை, சண்டிலிப்பாய் மற்றும் கோப்பாய் பிரதேச செயலாளர் பிரிவுக்குட்பட்ட தெரிவுசெய்யப்பட்ட ஐந்து தொழில்முயற்சியாளர்களுக்கு வழங்கிவைக்கப்பட்டுள்ளது.
இந் நிகழ்வில் சங்கானை பிரதேச செயலாளர், IDB நிறுவன வடமாகாண பணிப்பாளர், IDB நிறுவன யாழ்.மாவட்ட உதவிப் பணிப்பாளர், USAID நிறுவன பிரதிநிதிகள், உத்தியோகத்தர்கள் மற்றும் தொழில் முயற்சியாளர்கள் ஆகியோரும் கலந்துகொண்டிருந்தார்கள்.
நிதி, பொருளாதார உறுதிப்பாடுகள் மற்றும் தேசியக்கொள்கைகள் அமைச்சின் அறிவித்தலுக்கு அமைவாக "நலன்புரி நன்மைகள் செலுத்துதல் தொடர்பில் தகுதியானவர்களை கண்டறிதல்" தொடர்பான கலந்துரையாடல் யாழ்ப்பாண மாவட்ட அரசாங்க அதிபர் திரு.கணபதிப்பிள்ளை மகேசன் அவர்களின் தலைமையில் 06.09.2022 பிற்பகல் 2.30 மணிக்கு மாவட்டச் செயலகத்தில் நடைபெற்றது.
இக் கலந்துரையாடலில் 2022 ஆம் ஆண்டில் 24 ஆம் இலக்க நலன்புரி நன்மைகள் சட்டத்தில் 7(1) பிரிவின் பிரகாரம் நலன்புரி நிவாரண பலன்களை செலுத்துதல் தொடர்பில் தகுதியான அனைத்து நபர்களையும் கண்டறிய அரசு தீர்மானத்துள்ளது எனக் குறிப்பிடப்பட்டது.
மேலும், அரசின் மூலம் செயற்படும் சமுர்த்தி, முதியோர், அங்கவீனர், சிறுநீரக நோய் மற்றும் பொது நிதி போன்றவற்றிலோ அல்லது நலன்புரி நன்மைகள் போன்றவற்றின் கீழ் ஏற்கனவே பயன்பெறுபவராக இருப்பின் அல்லது பயன்பெற தகுதியானவர்கள் தயாரிக்கப்பட்ட விண்ணப்பங்களை தாங்கள் நிரந்தரமாக வசிக்கும் வசிப்பிடத்துடன் தொடர்புடைய கிராம அலுவலர், சமுர்த்தி உத்தியோகத்தர், பொருளாதார அபிவிருத்தி உத்தியோகத்தர் ஊடாக பிரதேச செயலகத்திற்கு 2022.09.30 ஆம் திகதிக்கு முதல் ஒப்படைக்க வேண்டும் எனவும் குறிப்பிடப்பட்டது.
இக் கலந்துரையாடலில் மேலதிக அரசாங்க அதிபர், மாவட்டச் செயலக திட்டமிடல் பணிப்பாளர், மாவட்ட சமுர்த்திப் பணிப்பாளர், உதவி மாவட்டச் செயலாளர், பிரதேச செயலாளர்கள், மாவட்டச் செயலக துறைசார் உத்தியோகத்தர்கள் ஆகியோரும் கலந்துகொண்டிருந்தார்கள்.