- You are here:
-
Home
- News
யாழ்ப்பாண மாவட்ட டெங்கு கட்டுப்பாட்டுக் குழுக்கூட்டம் தொடர்பான கலந்துரையாடல் மாவட்ட அரசாங்க அதிபர் கணபதிப்பிள்ளை மகேசன் தலைமையில் 30.09.2022 காலை 11.00 மணிக்கு மாவட்ட செயலக கேட்போர் கூடத்தில் நடைபெற்றது.
இக் கலந்துரையாடலில் யாழ்.மாவட்டத்தில் டெங்கு நுளம்பின் தாக்கம் அதிகரித்து காணப்படுகின்றமையினால் அதனைத் தடுப்பதற்கான முற்காப்பு நடவடிக்கைகளை மேற்கொள்ளல், மாவட்ட, பிரதேச ,கிராம மட்டங்களில் குழுக்களை நியமித்து கண்காணிப்பு மற்றும் விழிப்புணர்வு நடவடிக்கைகளை மேற்கொள்ளல், கழிவகற்றல் முகாமைத்துவத்தினை வினைத்திறனாக மேற்கொள்வதன் ஊடாக டெங்கை கடடுப்படுத்தல், பராமரிக்கப்படாத காணிகளில் பயிர்ச்செய்கை நடவடிக்கைளுக்கு உட்படுத்தல், பொது சுகாதார பரிசோதகர்கள் எதிர்நோக்கும் சவால்கள், டெங்கு கட்டுப்பாட்டு வாரத்தை பிரகடனப்படுத்தி விழிப்புணர்வை ஏற்படுத்தல், டெங்கு கட்டுப்பாடு தொடர்பான முப்படையினரின் பங்களிப்பு, அதிகூடிய டெங்கு பரவும் இடங்களை தெரிவு செய்து நேரடிக்கண்காணிப்பில் கூட்டுப்பங்களிப்புடன் ஈடுபடுதல்,டெங்கு கட்டுப்பாடு தொடர்டபான சட்ட நடவடிக்கைகளை மேற்கொள்ளல் தொடர்பாக கலந்துரையாடப்பட்டன.
இலங்கை சமூக பாதுகாப்புச் சபையினால் "வட மாகாணத்திற்கான சமூக பாதுகாப்பு தேசிய விருது வழங்கும் நிகழ்வு" சமூக பாதுகாப்பு சபையின் வடக்கு கிழக்கு மாகாண இணைப்பாளர் திரு.பி.பிரதீபன் தலைமையில் 29.09.2022 யாழ். மாவட்டத்தில் நடைபெற்றது.
இந் நிகழ்வில் பிரதம விருந்தினராக இலங்கை சமூக பாதுகாப்பு சபையின் தலைவர் திரு.சமன் ஹன்டரகம அவர்களும், சிறப்பு விருந்தினர்களாக சமூக பாதுகாப்பு சபையின் பொது முகாமையாளர் கே.ஏ.எஸ்.பி.களுஆராச்சி மற்றும் பிரதி முகாமையாளர் திரு. எஸ்.டபுள்யு.லக்ஸ்மன் ஆகியோரும், மற்றும் விருந்தினர்களாக மேம்பாட்டு முகாமையாளர் திரு.டி.எஸ்.லக்மல், சிரேஷ்ட இணைப்பாளர் ரஞ்சித் தேஸநாயக்க ஆகியோரும் கலந்து கொண்டார்கள்.
மேலும் யாழ்ப்பாணம், வவுனியா, கிளிநொச்சி, முல்லைத்தீவு, மன்னார் ஆகிய மாவட்ட அரசாங்க அதிபர்கள், யாழ்ப்பாண மாவட்ட மேலதிக அரசாங்க அதிபர் மற்றும் பிரதேச செயலாளர்கள் மற்றும் கிராம மட்ட உத்தியோகத்தர்கள், மாணவர்கள், பெற்றோர்கள், ஊடகவியலாளர்கள் ஆகியோரும் கலந்து கொண்டிருந்தார்கள்.
சர்வதேச தகவல் உரிமை தினத்தினை முன்னிட்டு தகவல் அறியும் உரிமைக்கான ஆணைக்குழுவினால் "கிராமத்திற்கு தகவல்கள் அறியும் உரிமைச் சட்டம் தொடர்பான நிகழ்ச்சித்திட்டம்" (28.09.2022) காலை 10 மணிக்கு யாழ். மாவட்ட செயலக கேட்போர் கூடத்தில் மேற்கொள்ளப்பட்டது.
வட மாகாணத்தில் தகவலறியும் சட்டத்தை பயன்படுத்தல், தகவலறியும் அடிப்படை உரிமைகளை பாதுகாக்கும் நோக்கில் ஆணைக்குழுவின் கடமை பொறுப்புகள், தகவலறியும் உரிமை சட்டம் தொடர்பான அடிப்படை அறிமுகம் மற்றும் மக்கள் தகவலறியும் சட்டத்தை சட்டத்தை பயன்படுத்தல், தகவல் சட்டத்தின் வகிபாகம், தகவலறியும் சட்டத்தை பயன்படுத்தல் மற்றும் தகவலறியும் சட்டம்தொடர்பாக வழிகாட்டுதல், தெரிவு செய்யப்பட்ட குழுக்கள் மற்றும் இனங்காணப்பட்ட பிரச்சினைகளுக்குரிய விண்ணப்பங்களை தயாரிப்பதற்கு மக்களுக்கு வழிகாட்டுதல் போன்ற விடயங்கள் மற்றும் அரச அலுவலகங்களில் அரச அதிகாரிகள் தகவலறியும் சட்டம் தொடர்பாக மேற்கொள்ளவேண்டிய விடயங்கள் ஆகியனவும் கலந்துரையாடப்பட்டன.
சர்வதேச தகவல் உரிமை தினத்தினை முன்னிட்டு வெகுஜன ஊடக அமைச்சும், தகவல் அறியும் உரிமைக்கான ஆணைக்குழுவும் இணைந்து "தகவல் அறியும் சட்டத்தினை கையாளுகையில் ஊடகவியலாளர்களுக்கு உள்ள சவால்கள்" தொர்பான கலந்துரையாடல் 29.06.2022 காலை 9.30 மணிக்கு யாழ். மாவட்ட செயலக மாநாட்டு மண்டபத்தில் மேற்கொண்டது..
இக் கலந்துரையாடலில் யாழ்ப்பாண மாவட்ட அரசாங்க அதிபர் திரு.கணபதிப்பிள்ளை மகேசன் கருத்துத் தெரிவிக்கும் போது " தகவலறியும் சட்டம் அறிமுகப்படுத்தப்பட்ட பின் மக்கள் தமக்கான தகவல்களை பெறமுடிகின்றது. இச் சட்டம் மக்களுக்கான ஒரு உரிமையாகவும் காணப்படுகிறது. அத்தோடு தகவலறியும் சட்டம் அரச நிறுவனங்கள் வெளிப்படைத்தன்மையோடு, ஊழலில்லாது மக்களுக்கான சிறந்த சேவையை வழங்க உதவுகின்றது. அந்த வகையில் சர்வதேச தகவலறியும் தினத்தினை முன்னிட்டு வெகுஜன ஊடக அமைச்சும், தகவலறியும் ஆணைக்குழுவும் கிராம மக்கள் மத்தியில் தகவல் சட்டத்தினை கொண்டு செல்லும் நோக்கோடு இக் கலந்துரையாடலை மேற்கொள்கின்றது. எனவே இச் சட்டத்தை சரியான வகையில் அனைவரும் பயன்படுத்த வேண்டும்" எனவும் தெரிவித்தார்.
யாழ்ப்பாண மாவட்டத்தில் மீள்குடியேற்ற, சமூக நல்லிணக்கம் மற்றும் வாழ்வாதார உதவித் திட்டங்களை வழங்குதல் தொடர்பான கலந்துரையாடல் மாவட்ட அரசாங்க அதிபர் திரு.கணபதிப்பிள்ளை மகேசன் தலைமையில் (27.09.2022) மாவட்டச் செயலகத்தில் நடைபெற்றது.
இக்கலந்துரையாடலில் UNDP நிறுவனத்தினால் யாழ். மாவட்டத்தின் சண்டிலிப்பாய், தெல்லிப்பளை, சங்கானை, உடுவில், கோப்பாய் ஆகிய பிரதேச செயலகங்களில் மேற்கொள்ளப்படவுள்ள திட்டங்கள் தொடர்பான சாத்தியக்கூறுகளை ஆராய்தல், கண்காணிப்பு மேற்கொள்ளல் ஆகியன தொடர்பாக கலந்துரையாடப்பட்டது. அத்துடன் சமூக நல்லிணக்கத்தை கட்டியெழுப்பும் சட்ட நடவடிக்கைகளை மேம்படுத்தல், இளைஞர் யுவதிகளுக்கான வேலை வாய்ப்புக்களை வழங்கும் பயிற்சி நெறிகளை ஆரம்பித்தல், மொழித்திறன் பயிற்சி வழங்குதல், பெண்களுக்கான உதவித்திட்டங்கள் வழங்குதல் முதலான திட்டங்களுடன், சிறுவர் துஷ்பிரயோகத்திற்கு எதிரான விழிப்புணர்வுகள், பல்கலைக்கழக மற்றும் பாடசாலை மாணவர்களுக்கு தொழில் வழிகாட்டல்களை மேற்கொள்ளுதல் தொடர்பாகவும் கலந்துரையாடப்பட்டது.