- You are here:
-
Home
- News
யாழ்ப்பாணம் மட்டுவிலில் அமைந்துள்ள பொருளாதார மத்திய நிலையத்தை மீள ஆரம்பித்தல் தொடர்பான கலந்துரையாடல் வர்த்தக, வணிக மற்றும் உணவுப் பாதுகாப்பு அமைச்சர் கௌரவ வசந்த சமரசிங்க, அவர்களின் தலைமையில் இன்றைய தினம் (12.08.2025) மு.ப 10.00 மணிக்கு மாவட்ட செயலக கேட்போர் கூடத்தில் நடைபெற்றது.இக் கலந்துரையாடலில் வடமாகாண ஆளுநர் கெளரவ நாகலிங்கம் வேதநாயகன் அவர்களும், வர்த்தக, வணிக மற்றும் உணவுப் பாதுகாப்பு அமைச்சின் பிரதி அமைச்சர் கெளரவ ஆர்.எச் .உபாலி சமரசிங்க அவர்களும், பாராளுமன்ற உறுப்பினர் கெளரவ கருணநாதன் இளங்குமரன், வர்த்தக, வணிக மற்றும் உணவுப் பாதுகாப்பு அமைச்சின் மேலதிக செயலாளர் திரு. உபுல் டி சில்வா, பிரதம ஆலோசகர் திரு சாந்தா ஜெய ரட்ண ஆகியோரும் பங்குபற்றியிருந்தார்கள்.
இக்கலந்தரையாடலில் வரவேற்பு உரையாற்றிய அரசாங்க அதிபர் அவர்கள், இன்றைய கலந்துரையாடலுக்கு வருகைதந்த கெளரவ அமைச்சர், வடமாகாண கெளரவ ஆளுநர், கெளரவ பிரதி அமைச்சர், கெளரவ பாராளுமன்ற உறுப்பினர் உள்ளிட்ட அனைவரையும் வரவேற்று, மட்டுவிலில் அமைந்துள்ள பொருளாதார மத்திய நிலையமானது ரூபா 198.80 மில்லியன் செலவில் நிர்மாணக்கப்பட்டும் தற்போது இயங்காத நிலையில் உள்ளதாகவும் அதனை மீள ஆரம்பிப்பதற்கான செயற்பாடுகள் குறித்து கெளரவ அமைச்சர் தலைமையில் கலந்துரையாடவுள்ளதாகவும் தெரிவித்தார். மேலும், யாழ்ப்பாண பொருளாதார வளர்ச்சியில் இந் நிலையம் ஓர் மைல்கல்லாக அமைய வேண்டும் எனவும் மீள ஆரம்பிப்பதற்கான விவசாயம் சார் அபிவிருத்திகளை மேற்கொள்ள முடியும் எனவும் அதற்கு கௌரவ அமைச்சர் முன்வந்து நடவடிக்கை எடுப்பது வரவேற்க்கத்தக்கது எனவும் தெரிவித்து, கெளரவ அமைச்சர் அவர்களிடன் தேவைப்பாடுகள் மற்றும் கருத்துக்களை முன்வைக்குமாறும் அரசாங்க அதிபர் கேட்டுக் கொண்டார்.
இக் கலந்துரையாடலில் தலைமையுரையாற்றிய கெளரவ அமைச்சர் அவர்கள், யாழ்ப்பாண பொருளாதார மத்திய நிலையத்தை அடுத்த மாத இறுதிக்குள் மீள ஆரம்பிப்பது மற்றும் அதனை அபிவிருத்தி செய்தல் தொடர்பான கலந்துரையாடலாக அமையவுள்ளதாகவும், இலங்கையை பொறுத்தவரை 18 பொருளாதார மத்திய நிலையங்கள் காணப்படுவதாகவும் 14 இயங்கி வருவதாகவும் வடக்கில் அண்ணளவாக ரூபா. 200 மில்லியன் செலவில் அமைக்கப்பட்ட யாழ்ப்பாணம் பொருளாதார மத்திய நிலையம் இயங்கவில்லை எனவும் தெரிவித்தார். இந் நிலையம் மக்களுக்கு பொருத்தமான பாதையாக காணப்படவில்லை எனவும் பிரதேச செயலகத்தின் கீழ் செயற்பாடுகள் நடைபெறுவதாகவும் அமைச்சின் கீழ் எந்தவொரு செயற்பாடும் காணப்படவில்லை எனவும் தெரிவித்ததுடன், இந் நிலையத்ததை மீள அடுத்த மாத இறுதிக்குள் ஆரம் பிப்பதற்கு நடவடிக்கை எடுத்துவருவதாகவும் தெரிவித்து அனைவரதும் ஒத்துழைப்புக்களையும் நல்குமாறு கேட்டுக்கொண்டார்.
மேலும், இக் கலந்துரையாடலில் பொருளாதார மத்திய நிலையத்துக்குரிய கடை உரிமையாளர்களின் தேவைப்பாடுகள் மற்றும் எதிர்கால செயற்பாடுகள் குறித்து விரிவாக ஆராயப்பட்டது.
இக் கலந்துரையாடலுக்கு முன்னராக கெளரவ அமைச்சர் தலைமையிலான குழுவினர் மட்டுவிலில் அமைந்துள்ள பொருளாதார மத்திய நிலையத்தை பார்வையிட்டனர் என்பது குறிப்பிடத்தக்கது.
மாவட்டச் செயலகத்தில் நடைபெற்ற கலந்துரையாடலில் சாவகச்சேரி பிரதேச செயலாளர், பிரதி மாகாண விவசாயப் பணிப்பாளர், மாவட்ட விவசாயப் பணிப்பாளர், திட்டமிடல் பணிப்பாளர், மாவட்ட பிரதம பொறியியலாளர் உள்ளிட்ட பதவிநிலை உத்தியோகத்தர்கள், சாவகச்சேரி பிரதேச சபையின் செயலாளர், பொருளாதார மத்திய நிலைய முகாமையாளர், வர்த்தக பிரதிநிதிகள் மற்றும் பொருளாதார மத்திய நிலையத்தில் கடைகளை குத்தகைக்கு எடுத்த குத்தகைக்கார்கள் கலந்துகொண்டனர்.
குறிகட்டுவான் இறங்குதுறையினை அபிவிருத்தி செய்வது தொடர்பாக போக்குவரத்து நெடுஞ்சாலைகள், துறைமுகங்கள் மற்றும் சிவில் விமான சேவைகள் அமைச்சர் கௌரவ பிமல் ரத்நாயக்க அவர்கள் இன்றைய தினம் (09.08.2025) குறிகட்டுவான் இறங்குதுறைக்கு துறைசார் அதிகாரிகளுடன் நேரடியாக விஜயம் மேற்கொண்டு, அதிகாரிகளுக்கு ஆலோசனைகளையும் எடுக்க வேண்டிய நடவடிக்கைகள் தொடர்பாகவும் உரிய அறிவுத்தல்களையும் வழங்கினார்.மேலும், கெளரவ அமைச்சர் அவர்களுடன் கடற்றொழி்ல் நீரியல் மற்றும் கடல் வளங்கள் அமைச்சரும் யாழ்ப்பாண மாவட்ட ஒருங்கிணைப்புக் குழுவின் தலைவருமான கௌரவ இராமலிங்கம் சந்திரசேகர் அவர்களும் கலந்து ஆலோசனைகளை முன்வைத்திருந்தார்.
மேலும், கெளரவ அமைச்சர் களுடனான விஜயத்தில் யாழ்ப்பாண மாவட்ட அரசாங்க அதிபர் திரு மருதலிங்கம் பிரதீபன், மேலதிக அரசாங்க அதிபர் திரு கே. சிவகரன், வீதி அபிவிருத்தி அதிகார சபையின் பணிப்பாளர் திரு குரூஸ், நகர அபிவிருத்தி அதிகாரசபையின் பணிப்பாளர் மற்றும் பிரதிப் பணிப்பாளர், வீதி அபிவிருத்தித் திணைக்கள பணிப்பாளர்,நெடுந்தீவு பிரதேச செயலாளர், வேலணை உதவிப் பிரதேச செயலாளர், கடற்படை அதிகாரிகள் மற்றும் துறைசார் உத்தியோகத்தர்களும் கலந்துகொண்டார்கள்.
கிளீன் ஸ்ரீலங்கா செயற்றிட்டத்தின் கீழ் சனாதிபதி செயலகம், வடமாகாண சபை, யாழ்ப்பாண மாவட்டச் செயலகம் மற்றும் பருத்தித்துறை, கரவெட்டி மற்றும் மருதங்கேணி பிரதேச செயலகங்கள் இணைந்து நடாத்தும் இதயபூர்வமாக யாழ்ப்பாணத்திற்கு - விசேட நடமாடும் சேவையின் ஆரம்ப நிகழ்வு யாழ்ப்பாண மாவட்ட அரசாங்க அதிபர் திரு மருதலிங்கம் பிரதீபன் அவர்கள் தலைமையில் இன்றைய தினம் (14.08.2025) யா/பருத்தித்துறை வேலாயுதம் மகா வித்தியாலயத்தில் நடைபெற்றது.இந் நிகழ்வின் பிரதம விருந்தினராக கடற்தொழில் நீரியல் மற்றும் கடல் வளங்கள் அமைச்சரும் யாழ்ப்பாண மாவட்ட ஒருங்கிணைப்புக் குழுவின் தலைவருமான கௌரவ இராமலிங்கம் சந்திரசேகரர் அவர்களும், சிறப்பு விருந்தினராக வட மாகாண ஆளுநர் கெளரவ நாகலிங்கம் வேதநாயகன் அவர்களும், கெளரவ விருந்தினர்களாக சனாதிபதி செயலகத்தின் உதவிச் செயலாளர் திரு. ந. சஞ்சீவன், கிளீன் ஶ்ரீலங்கா பணிப்பாளர்களான திரு. தசூன் உதார, திரு. துலீப் சேமரத்தன ஆகியோரும் கலந்து கொண்டு நிகழ்வை ஆரம்பித்து வைத்தனர்.
இந் நிகழ்வின் பிரதம விருந்தினராக கலந்து கொண்ட கடற்தொழில் நீரியல் மற்றும் கடல் வளங்கள் அமைச்சரும் யாழ்ப்பாண மாவட்ட ஒருங்கிணைப்புக் குழுவின் தலைவருமான கௌரவ இராமலிங்கம் சந்திரசேகரர்அவர்கள் தமதுரையில், அரச கொள்கை பிரகடனத்தில் கிறீன் ஸ்ரீலங்கா, வறுமை ஒழிப்பு மற்றும் டிஜிட்டல் மயமாக்கல் ஆகிய மூன்று திட்டங்கள் முக்கியமாக காணப்படுவதாகவும் அதற்கான செயற்பாடுகள் முன்னெடுக்கப்படுவதாகவும் தெரிவித்தார். மேலும் சமூக ரீதியான பிரச்சினைகள் கலாசார ரீதியான பிரச்சினைகள் உள்ளதாகவும், அவ்வாறான பிரச்சனை கிலிருந்து மக்களை மீட்டெடுக்க வேண்டிய தேவை உள்ளதாகவும் தெரிவித்ததுடன், போதைப் பொருள் பாவனையும் அதிகமாக காணப்படுவதாகவும், இவ்வாறான மனநிலையில் இருப்பவர்களை அவர்களின் மனங்களை மாற்றி நல்ல சமூகத்தை உருவாக்க வேண்டிய தேவை உள்ளதாகவும், அதனை அடிப்படையாகக் கொண்டே கிளீன் சிறிலங்கா திட்டங்கள் நடைமுறைப்படுத்தப்படுவதாகவும் கெளரவ அமைச்சர் தெரிவித்தார்.
இந் நிகழ்விற்கு முன்னராக தலைமையுரையாற்றிய அரசாங்க அதிபர் அவர்கள், இன்றைய நிகழ்விற்கு பிரதம விருந்தினராக வருகை தந்த கெளரவ அமைச்சர், கெளரவ ஆளுனர் சனாதிபதி செயலக அதிகாரிகள் உள்ளிட்டவர்களை வரவேற்றதுடன், இன்று முதல் ஒரு வாரம் வரை இந் நிகழ்வு நடைபெறவுள்ளதாகவும் இன்றைய தினம் நடமாடும் சேவையின் ஆரம்ப நிகழ்வு
பருத்தித்துறை மருதங்கேனி கரவெட்டி ஆகிய மூன்று பிரதேச செயலக பிரிவுகளை உள்ளடக்கியதாக நடமாடும் சேவை நடைபெறுவதாகவும், இதன் சேவைகள் குறித்து ஏற்கனவே மக்களுக்கு அறிவுறுத்தல்கள் வழங்கப்பட்டுள்ளதாகவும் தெரிவித்தார். மேலும் இச் சேவையில் முன்னாயத்த நடவடிக்கைகள் மேற்கொள்ளப்பட்டுள்ளதாகவும் பொதுமக்கள் அவ் அறிவுறுத்தவல்களை பின்பற்றி சேவைகளை பெற்றுக் கொள்ளுமாறு தெரிவித்ததுடன் மேலும், சேவைகளைப் பெற்றுக் கொள்ள வருபவர்களுக்கு இலவசமாக தென்னம்பிள்ளை வழங்கப்படவுள்ளதாகவும் கிளீன் ஸ்ரீலங்கா செயற்றிட்டத்திற்கு உதவி புரிந்த சனாதிபதி செயலகத்தின் பணிப்பாளர் மற்றும் அதிகாரிகளுக்கும் மாகாண சபை உத்தியோகத்தர்கள் அனைவருக்கும் நன்றிகளை தெரிவித்து சேவை சிறப்பாக நடைபெற அனைவரது ஒத்துழைப்புகக்ளையும் நல்குமாறும் கேட்டுக்கொண்டார்.
இந் நிகழ்வில் வடக்கு மாகண சபை செயலாளர்கள், அதிகாரிகள், மாவட்ட செயலக பதவி நிலை உத்தியோகத்தர்கள், பிரதேச செயலாளர்கள் மற்றும் சேவைகளைப் பெற்றுக் கொள்ள வந்த பொது மக்கள் எனப் பலரும் கலந்து கொண்டனர்.
நுண்,சிறிய மற்றும் நடுத்தர தொழில் முயற்சியாளர்கள் மற்றும் தொழில் துறை சார்ந்த உத்தியோகத்தர்களுக்கான விழிப்புணர்வு செயலமர்வு இன்றைய தினம் ( 01.08.2025)
காலை 9.30 மணிக்கு யாழ்ப்பாணமாவட்ட அரசாங்க அதிபர் திரு மருதலிங்கம் பிரதீபன் அவர்களின் தலைமையில் மாவட்ட செயலக மாநாட்டு மண்டபத்தில் இடம்பெற்றது.
இந் நிகழ்வில் கலந்து கொண்டு உரையாற்றிய அரசாங்க அதிபர் அவர்கள், நுண், சிறிய மற்றும் நடுத்தர தொழில் முயற்சியாளர்கள் மற்றும் தொழில் துறை சார்ந்த உத்தியோகத்தர்களுக்கான இவ் விழிப்புணர்வு செயலமர்விற்காக கொழும்பிலிருந்து வருகை தந்திருந்த கைத்தொழில் முயற்சி அபிவிருத்தி அதிகாரசபையின் பணிப்பாளர் திரு.சமன் சிறிலால் மற்றும் அவரது குழுவினருக்கு தமது வரவேற்பையும் நன்றிகளையும் தெரிவித்தார். மேலும் இவ் கைத்தொழில்சார் நடவடிக்கைகளில் ஏறத்தாழ 6000 தொழில் முயற்சியாளர்கள்
வரை பதிவு செய்யப்பட்டுள்ளதாகவும், அவர்களில் சுமார் 600 தொழில் முயற்சியாளர்களே வினைத்திறனாக செயற்பட்டு வருவதாகவும் இவர்களில் பலர் நுண் மற்றும் சிறிய தொழில் முயற்சிகளிலிருந்து நடுத்தர
தொழில் முயற்சிக்கு நோக்கி செயற்பட்டு வருவதாக குறிப்பிட்டு அவர்களுக்கு தனது பாராட்டுக்களை தெரிவித்தார்.மேலும், இத்தகைய செயலமர்வுகள் தொழில் முயற்சியாளர்களுக்கு நிதி என்பது பாரிய பிரச்சினையாக உள்ள இக் காலகட்டத்தில் அரச நிர்வாக கட்டமைப்பால் பல வழிகளில் உதவிகள் வழங்கப்படுகின்ற போதிலும் சில முயற்சியாளர்கள் அரசினால் இலவசமாக வாழ்வாதார உதவிகள் வழங்கப்படுவதனால் அந்த உதவிகளை சரியான முறையில் பயன்படுத்துவது குறைவாக காணப்படுவதாவும் தெரிவித்ததுடன், இதே சொந்த முதலீட்டில் ஒரு வியாபாரத்தை மேற்கொள்ளும் போது முனைப்புடன் முயற்சியுடன் செயல்படுவதாகவும் தெரிவித்தார். மேலும் எமது பல்வேறு முயற்சியாளர்களை நோக்கி ஏற்றுமதியாளர்கள் யாழ் நோக்கி வருவதாகவும் அதற்கு அவர்களின் தரமான பொருள் காரணம் எனவும் குறிப்பிட்டதுடன், இருப்பினும் முயற்சியாளர்களுக்கு அதன் அளவு, இலாபம் மற்றும் சந்தைப் பெறுமதி என்பவற்றில் இலாபம் குறைவாக காணப்படுவதாகவும் அதற்கு அரச நிர்வாக கட்டமைப்பின் இவ்வாறான விழிப்புணர்வு பயிற்சிகள் வியாபார நடவடிக்கைகளை மேம்படுத்த துணை புரியும் எனவும் அரசாங்க அதிபர் தெரிவித்தார்.
தொழில் முயற்சியாளர்களுக்கான தொழில் விருத்தி விழிப்புணர்வு செயலமர்வானது 50 தொழில் முயற்சியாளர்களுக்கும் உத்தியோகத்தர்களுக்கும் வழங்கப்பட்டது.
இந் நிகழ்வில் கைத்தொழில் முயற்சி அபிவிருத்தி அதிகாரசபையின் பணிப்பாளர் திரு.சமன் சிறிலால், பிரதம நிர்வாக அதிகாாி திரு.யூட் பெர்னான்டோ மற்றும் உதவிப்பணிப்பாளர் திரு.சசிகதிமெல், மாவட்ட உதவி, பிரதித் திட்டமிடல் பணிப்பாளர்கள், வங்கிகளின் பிரதிநிதிகள், தேசிய தொழில் முயற்சி அபிவிருத்தி அதிகார சபையின் மாவட்ட இணைப்பாளர், துறைசாார் உத்தியோகத்தர்கள் மற்றும் தேசிய தொழில் முயற்சி அபிவிருத்தி அதிகார சபையின் உத்தியோகத்தர்கள், நுண், சிறிய மற்றும் நடுத்தர தொழில் முயற்சியாளர்கள் ஆகியோா் கலந்து கொண்டனர்.
அதிமேதகு சனாதிபதி அவர்களின் எண்ணக்கருவான கிளீன் ஸ்ரீலங்கா செயற்றிட்டத்தின் ஒரு அங்கமாக "இதயபூர்வமாக யாழ்ப்பாணத்திற்கு - ஒற்றுமையின் தூய்மையான பயணம்" எனும் கருப்பொருளிலான நடமாடும் சேவையானது எதிர்வரும் ஆகஸ்ட் 14 ஆம் திகதி பருத்தித்துறை பிரதேச செயலாளர் பிரிவில் - பருத்தித்துறை, கரவெட்டி மற்றும் மருதங்கேணி ஆகிய பிரதேச செயலாளர்கள் பிரிவுகளை உள்ளடக்கிய வகையில் பருத்தித்துறை வேலாயுதம் மகா வித்தியாலயத்திலும், 15 ஆம் திகதி உடுவில், தெல்லிப்பளை மற்றும் சண்டிலிப்பாய் ஆகிய பிரதேச செயலாளர்கள் பிரிவுகளை உள்ளடக்கிய வகையில் உடுவில் பிரதேச செயலகத்திலும் நடைபெறவுள்ளது.
இவ் நடமாடும் சேவையில் ஆட்பதிவுச் சேவை, பிறப்பு இறப்புச் சான்றிதழ் வழங்கும் சேவைகள், ஓய்வூதியச் சேவைகள், வெளிநாட்டு வேலைவாய்ப்புச் சேவைகள், மோட்டார் வாகனப் பதிவுகள், கம்பனிப் பதிவுகள், சுகாதார சேவைகள் - கண் பரிசோதனை மற்றும் மருத்துவ சேவைகள், ஏற்றுமதிக்கான வாய்ப்புக்கள், வடக்கு மாகாணத்தின் சகல அமைச்சிற்குரிய சேவைகள், பிரதேச செயலகம் மற்றும் உள்ளூராட்சி மன்றங்களுக்குரிய சேவைகள் உள்ளிட்ட சேவைகள் நடைபெறவுள்ளது.
மேற்படி நடமாடும் சேவைக்கான முன்னாயத்த ஏற்பாடுகளை மேற்கொள்வதற்காக, இன்றைய தினம் (02.08.2025) யாழ்ப்பாண மாவட்ட அரசாங்க அதிபர் திரு மருதலிங்கம் பிரதீபன் அவர்கள் பருத்தித்துறை வேலாயுதம் மகா வித்தியாலயத்திற்கும், உடுவில் பிரதேச செயலகத்திற்கும் - மேலதிக அரசாங்க அதிபர் திரு. கே. சிவகரன், மேலதிக அரசாங்க அதிபர் (காணி) திரு. பா. ஜெயகரன், உதவி மாவட்டச் செயலாளர் செல்வி உ.தர்சினி ஆகியோர் சகிதம் சென்று உரிய முன்னாயத்த அறிவுறுத்தல்களை சம்பந்தப்பட்டவர்களுக்கு வழங்கினார்.
இவ் முன்னாயத்த ஏற்பாடுகளில் பருத்தித்துறையில் பருத்தித்துறை உதவிப் பிரதேச செயலாளர் மற்றும் நிர்வாக உத்தியோகத்தரும், உடுவிலில் உதவிப் பிரதேச செயலாளரும் உத்தியோகத்தர்களும் கலந்து கொண்டார்கள்.
