யாழ்ப்பாண மாவட்ட அபிவிருத்தித்திட்டங்களின் முன்னேற்ற மீளாய்வு கூட்டம் யாழ்ப்பாண மாவட்ட அரசாங்க அதிபர் திரு.மருதலிங்கம் பிரதீபன் அவர்களின் தலைமையில் இன்றைய தினம் (13.11.2025) மு.ப 11.30 மணிக்கு அரசாங்க அதிபர் அலுவலகத்தில் நடைபெற்றது. இக் கலந்துரையாடலின் போது மாவட்டத்தில் நடைமுறைப்படுத்தப்பட்டு வரும் பன்முகப்படுத்தப்பட்ட வரவு செலவுத்திட்டம் மாவட்ட அபிவிருத்தி நிகழ்ச்சித்திட்டம் , கிராமிய அபிவிருத்தித்திட்டம் , கிராமிய வீதி அபிவிருத்தித்திட்டம், வீடமைப்பு, தேசிய ஒருமைப்பாட்டு நிகழ்ச்சித்திட்டம், நலன்புரி நன்மைகள் கொடுப்பனவு பிரதேச செயலகங்களால் மேற்கொள்ளப்படும் அபிவிருத்தித் திட்டங்கள், மீள் குடியேற்ற வேலைத்திட்டம், விவசாயம் போன்ற அபிவிருத்தி வேலைத்திட்டங்களின் முன்னேற்றங்கள் அரசாங்க அதிபரினீல் விரிவாக ஆராயப்பட்டதுடன் நிறைவேற்றப்பட்ட நிறை வேற்றப்படாத திட்டங்கள் தொடர்பாக பிரதேச செயலாளர்களுடன் கலந்துரையாடப்பட்டு, உரிய அறிவுறுத்தல்கள் அரசாங்க அதிபர் அவர்களால் வழங்கப்பட்டது. இக் கலந்துரையாடலில் மாவட்ட மேலதிக அரசாங்க அதிபர், மேலதிக அரசாங்க அதிபர் (காணி), பிரதம கணக்காளர், திட்டமிடல் பணிப்பாளர், பிரமத உள்ளக கணக்காய்வாளர், பிரதம பெறியியலாளர் பிரதேச செயலாளர்கள், மாவட்ட செயலக உதவி, பிரதி திட்டமிடல் பணிப்பாளர்கள் மற்றும் மாவட்ட செயலக துறைசாா் உத்தியோகத்தர்கள் உள்ளிட்ட பலர் கலந்துகொண்டனர்.

 

 

யாழ்ப்பாண மாவட்ட உணவுப் பாதுகாப்பு குழுக் கூட்டம் அரசாங்க அதிபர் திரு மருதலிங்கம் பிரதீபன் மற்றும் வடக்கு மாகாண விவசாயம் கமநல சேவைகள், கால்நடை அபிவிருத்தி, நீர்ப்பாசனம், மீன்பிடி, நீர்வழங்கல் மற்றும் சுற்றாடல் அமைச்சின் செயலாளரும் மாவட்ட உணவுப் பாதுகாப்பு குழு இணைத்தலைவருமான திரு. எஸ். சிவசிறீ ஆகியோரின் இணைத் தலைமையிலும் மாவட்ட செயலக மாநாட்டு மண்டபத்தில் இன்றைய தினம் (13.12.2025) காலை 09.00 மணிக்கு நடைபெற்றது. இக் கலந்துரையாடலில் கருத்து தெரிவித்த மாவட்ட அரசாங்க அதிபர் அவர்கள், மாவட்ட ஒருங்கிணைப்பு குழுவின் நிரந்தர உப குழுக்களாக திட்டமிடல் குழு, உணவுப் பாதுகாப்பு குழு மற்றும் விலைநிர்ணய குழு ஆகிய குழுக்கள் உருவாக்கப்பட்டுள்ளதாகவும், அந்தவகையில் சுற்றுநிருபத்தின் பிரகாரம் அரசாங்க அதிபர் மற்றும் அந்தந்த மாகாணங்களின் விவசாய அமைச்சின் செயலாளர் ஆகியோரின் இணைத்தலைமையிலும் இக் கலந்துரையாடல் ஏற்பாடு செய்யப்பட்டதாகவும், யாழ்ப்பாண மாவட்டத்தின் பிரதான தொழிலாக விவசாயம், கால்நடை உற்பத்தி மற்றும் மீன்பிடி ஆகியன காணப்படுவதாகவும் தெரிவித்ததார். மேலும், அதனடிப்படையில் உணவுப்பாதுகாப்பு குழுவின் நோக்கங்களாக மாவட்டத்திலுள்ள மக்களின் உணவுப் பாதுகாப்பை உறுதி செய்வதற்காக, உணவு உற்பத்திகளை விநியோகித்தலை உறுதிப்படுத்தல், சந்தைப்படுத்தல், உட்கட்டமைப்பு வசதிகள் மற்றும் அணுகல் வசதிகளை விருத்தி செய்தல், சுத்தமான தண்ணீரை வழங்கல், சுகாதாரம், போசாக்கான உணவு மற்றும் ஊட்டச்சத்து உணவுகளுக்கான அணுகல் மற்றும் போஷாக்கு கல்வியை உறுதி செய்தல், காலநிலை மாற்றம், அனர்த்தங்கள்,பொருளாதார நெருக்கடிகளின் போது உணவு உற்பத்தி நிலைத்தன்மையை உறுதிப்படுத்தும் வகையில் திட்டங்களை தயாரித்தல்,செயற்படுத்தல் மற்றும் மேற்பார்வை செய்வதற்கான நோக்கங்களை அடிப்படையாகக் கொண்டு வரையறை தெளிவாக காட்டப்பட்டுள்ளதாக அரசாங்க அதிபர் தெரிவித்தார். மேலும், இதன்மூலம் ஒருவரின் போஷாக்கான, பாதுகாப்பான நச்சற்ற உணவு கிடைப்பதை உறுதிப்படுத்துவதற்காக இக்குழு அமைக்கப்பட்டுள்ளதாகவும் இக்குழுவிலுள்ள அனைவரும் ஒருங்கிணைந்து செயற்படல் மூலம் எமது மாவட்டத்தின் உணவுப்பாதுகாப்பை உறுதி செய்ய முடியுமென இணைத்தலைமை உரையில் அரசாங்க அதிபர் தெரிவித்தார்.

பால்நிலைசார் வன்முறைக்கெதிரான செயற்பாட்டு குழுவின் மூன்றாம் காலாண்டுக்கான கலந்துரையாடல் மாவட்ட மேலதிக அரசாங்க அதிபர் திரு. கே. சிவகரன் அவர்களின் தலைமையில் வடமாகாண மகளிர் விவகார அமைச்சின் உதவிச் செயலாளர் திரு மா.முரளி அவர்களின் பங்குபற்றுதலுடன் இன்றைய தினம் (13.11.2025 ) நண்பகல் 12 மணியளவில் மாவட்ட செயலக கேட்போர் கூடத்தில் நடைபெற்றது. இக் கலந்துரையாடலில் பெண்களுக்கெதிரான பால்நிலைசார் வன்முறைகளால் பாதிப்புக்குள்ளானவர்களது பிரதேச செயலக ரீதியாக தரவுகள் அவற்றுக்காக எடுக்கப்பட்ட நடவடிக்கைகள், மாவட்ட செயலக மற்றும் பிரதேச செயலக ரீதியாக நடாத்தப்பட்ட விழிப்புணர்வு நடவடிக்கைகள், மற்றும் SGBV செயற்பாடுகளை மேலும் வினைத்திறனாக செயல்படுத்துவதற்கான தேவைப்பாடுகள் தொடர்பாக விரிவாக ஆராயப்பட்டன. இக் கலந்துரையாடலில் கருத்து தெரிவித்த மாவட்ட மேலதிக அரசாங்க அதிபர் அவர்கள், 2026 ஆம் ஆண்டுக்கான திட்ட முன்மொழிவுகளுக்கான ஒதுக்கீடுகள் பற்றாக்குறையாக கணப்படுமென கருதினால் அரச சார்பற்ற நிறுவனங்களுடன் தொடர்பு கொண்டு அவற்றை இலகுவாக பெற்றுக்கொள்ள முடியுமென ஆலோசனை வழங்கினார். மேலும் போதைப்பொருள் பாவனை மற்றும் பரிமாற்றங்கள் தொடர்பாக கிராம மட்டங்களில் நடைபெறும் சட்ட விரோத செயற்பாடுகள் தொடர்பாக தற்போதுள்ள அரசாங்கம் துரிதமாக நடவடிக்கைகளை மேற்கொண்டு வருவதால் அச் சட்டவிரோத செயற்பாடுகளை உடனடியாக பிரதேச மட்ட உத்தியோகத்தர்கள் பொலீசாருக்கு தெரியப்படுத்த வேண்டுமென குறிப்பிட்டார். இக் கலந்துரையாடலில் பெண்கள் அபிவிருத்தி மாவட்ட இணைப்பாளர், அரசசார்பற்ற நிறுவனங்களின் மாவட்ட இணைப்பாளர், மாவட்ட மற்றும் பிரதேச செயலக பெண்கள் அபிவிருத்தி உத்தியோகத்தர்கள், அரசசார்பற்ற நிறுவன பிரதிநிதிகள்,பொலீஸ் உத்தியோகத்தர்கள் உள்ளிட்ட துறைசார்ந்த உத்தியோகத்தர்கள் கலந்து கொண்டனர்.

 

 

23வது ஆசிய விளையாட்டுப் போட்டியில் இலங்கை சார்பில் 01 தங்கம் மற்றும் 02 வெள்ளிப்பதக்கத்தினை வென்று சாதனை படைத்த மாவட்ட விளையாட்டு வீரா் திரு. செல்வராசா ரமணன் அவர்களை இன்றைய தினம் (13.11.2025) அரசாங்க அதிபர் அலுவலகத்தில் நடைபெற்ற கெளரவிப்பு நிகழ்வில் அரசாங்க அதிபர் திரு மருதலிங்கம் பிரதீபன் அவர்கள் பொன்னடை போர்த்தி மலர்மாலையிட்டு கௌரவித்தார். இவ் கெளரவிப்பு நிகழ்வில் கருத்து தெரிவித்த அரசாங்க அதபர் அவர்கள், 23வது ஆசிய விளையாட்டுப் போட்டியில் 3000 விளையாட்டு வீர வீராங்கனைகள் பங்குபற்றியிருந்ததாகவும், அதில் இலங்கையை சேர்ந்த 250 வீர வீராங்கனைகள் பங்குபற்றியிருந்ததாகவும் குறிப்பிட்டு, அதில் யாழ்ப்பாணத்தைச் சேர்ந்த ஒரேயொரு தமிழராக திரு. செல்வராசா ரமணன் பங்குபற்றி உயரம்பாய்தலில் தங்கப்பதக்கத்தை பெற்று சாதனை படைத்தமையுடன் முப்பாய்ச்சல் ,கோலூன்றிப்பாய்தல் போட்டிகளிலும் வெள்ளிப்பதக்கத்தை பெற்றுக்கொண்டமை பெருமகிழ்ச்சியை அளிப்பதாகவும் அதற்காக தமது வாழ்த்துக்களை தெரிவித்துக்கொண்டார். மேலும், இவ்வாறானதொரு பல்வேறு நாடுகள் பங்குபற்றியஆசியப் போட்டியில் வெற்றியீட்டுவது என்பது ஓர் கடினமான விடயம் எனவும், தான் ஒரு சர்வதேச விளையாட்டு வீரனாக இருப்பதுடன் இளம்சந்ததியினருக்கு நல்லதொரு நிலையை அடைய வேண்டும் என்ற நோக்கத்தில் யாழ்ப்பாண மாவட்டத்தில் விளையாட்டுத்துறை சாா்ந்த பயிற்சிகளை இலவசமாக பயிற்றுவித்து வரும் விளையாட்டு பயிற்சியாளராகவும் இருந்து வருகிறார் எனவும் அரசாங்க அதிபர் தெரிவித்து,மேலும் பல சர்வதேச போட்டிகளில் பங்குபற்றி மேன்மேலும் வெற்றிகளை பெற தனது வாழ்த்துக்களையும் தெரிவித்துக்கொண்டார். மேலும் அரசாங்க அதிபர் தெரிவிக்கையில், யாழ்ப்பாண மாவட்டத்தில் விளையாட்டு பயிற்சிகளில் ஈடுபடும் வீர வீராங்கனைகள் பல சவால்களை எதிர்நோக்குவதாகவும் அதற்கமைய அமைச்சரவைக் கூட்டத்தில் யாழ் மாவட்டத்தில் உள்ளக விளையாட்டரங்கு அமைப்பதற்காக ரூபா 170 மில்லியன் நிதி ஒதுக்கீடு இவ் வருடம் கிடைக்கப் பெற்றுள்ளதாகவும் அதற்கான முன்னேற்பாடுகள் இடம்பெற்றுக்கொண்டிருப்பதாகவும் தெரிவித்தார். இக் கௌரவிப்பு நிகழ்வில் மேலதிக அரசாங்க அதிபர் திரு. கே. சிவகரன் , மேலதிக அரசாங்க அதிபர் (காணி) திரு.பா.ஜெயகரன் பிரதம கணக்காளர் திரு. எஸ். கிருபாகரன் உள்ளிட்ட பதவிநிலை உத்தியோகத்தர்கள் கலந்து கொண்டதுடன் ஸ்புட்னிக் விளையாட்டுக்கழக வீரர்கள் மற்றும் மாவட்ட செயலக விளையாட்டு உத்தியோகத்தர்களும் கலந்து கொண்டனர்.