யாழ்ப்பாணத்திற்கான ஒருங்கிணைந்த நகர மற்றும் போக்குவரத்துத் திட்டம் அடுத்த தலைமுறையையும் கருத்திற்கொண்டு அமைய வேண்டும் – பாராளுமன்ற உறுப்பினர் கருணாநாதன் இளங்குமரன் யாழ்ப்பாண மாவட்டத்திற்கான ஒருங்கிணைந்த நகர மற்றும் போக்குவரத்துத் திட்டம், அனைத்து திணைக்களங்களையும் ஒருங்கிணைத்து, அறிவுசார் நிபுணர்களின் கருத்துக்களையும் உள்வாங்கி, எதிர்காலத் தலைமுறையினரின் தேவைகளைக் கருத்திற்கொண்டு நீண்டகாலப் பயனளிக்கும் வகையில் திட்டமிடப்பட வேண்டும் என தெரிவித்தார். யாழ்ப்பாண மாவட்டத்தில் அதிகரித்து வரும் போக்குவரத்துத் தேவைகளைக் கருத்திற்கொண்டு, யாழ்ப்பாணம் – பலாலி, யாழ்ப்பாணம் – காங்கேசன்துறை, மானிப்பாய் உள்ளிட்ட பிரதான போக்குவரத்துப் பாதைகள் தொடர்பில் ஒருங்கிணைந்த முறையில் திட்டமிடல் மேற்கொள்ளப்பட வேண்டியுள்ளதாக அவர் சுட்டிக்காட்டினார்.குறிப்பாக விமான நிலையம் மற்றும் காங்கேசன்துறை துறைமுகம் போன்ற முக்கிய இணைப்புகளின் எதிர்கால வளர்ச்சியையும் கருத்திற்கொண்டு போக்குவரத்து கட்டமைப்புகள் திட்டமிடப்பட வேண்டும் என் குறிப்பிட்டார். யாழ்ப்பாண நகரில் தற்போதுள்ள பேருந்து நிலையம் மற்றும் போக்குவரத்து வசதிகள் எதிர்காலத் தேவைகளுக்கு போதுமானதாக இல்லை எனக் குறிப்பிட்ட பாராளுமன்ற உறுப்பினர் நகரின் போக்குவரத்து நெரிசலைக் குறைப்பதற்காக புதிய பேருந்து நிலையங்கள் மற்றும் முறையான வாகனத் தரிப்பிடங்களை அமைப்பது தொடர்பில் கவனம் செலுத்தப்பட வேண்டும் எனத் தெரிவித்தார். குறிப்பாக வைத்தியசாலை வீதியில் அதிகளவில் இருசக்கர வாகனங்கள் பயன்படுத்தப்படுவதைக் கருத்திற்கொண்டு, மாவட்டச் செயலகம் பகுதியிலிருந்து இருசக்கர வாகனங்களுக்கு தனியான பாதையை ஏற்படுத்துவதுடன், நடைபாதை மற்றும் வாகனப் பாதைகளை முறையாகப் பிரித்து அமைப்பதற்கான சாத்தியக்கூறுகள் ஆராயப்பட வேண்டும் எனவும் குறிப்பிட்டார். அத்துடன், யாழ்ப்பாணம் போதனா வைத்தியசாலைக்கு வருகை தரும் பொதுமக்களின் வாகனங்களை முறையாக நிறுத்துவதற்கான தரிப்பிட வசதிகள் ஏற்படுத்தப்பட வேண்டும். இதன் மூலம் வைத்தியசாலை வீதியில் ஏற்படும் வாகன நெரிசலைக் குறைத்து, வீதியின் பயன்பாட்டுத் திறனை மேம்படுத்த முடியும் எனவும் தெரிவித்தார். நகரப் பகுதிகளில் முச்சக்கர வண்டிகளுக்கு தனித்தனியான ஒழுங்குபடுத்தப்பட்ட தரிப்பிடங்களை அமைத்து, தொழில்நுட்பத்தைப் பயன்படுத்தி அவற்றை நிர்வகிப்பதற்கான பொறிமுறையொன்றை உருவாக்க வேண்டும் எனவும் வலியுறுத்தினார்.

மேலும், மானிப்பாய், மருதனார்மடம், காங்கேசன்துறை போன்ற முக்கிய நகர மையங்களில் புதிய பேருந்து நிலையங்களை அமைப்பதற்கான சாத்தியக்கூறுகள் ஆராயப்பட வேண்டும். குறிப்பாக மானிப்பாய் பகுதியில் பேருந்து நிலையம் அமைப்பதற்கான இடவசதிகள் தொடர்பில் ஆய்வு மேற்கொள்ளப்பட்டுள்ளதாகவும், எதிர்காலத்தில் நகரங்களாகவும் முக்கிய போக்குவரத்து மையங்களாகவும் வளரக்கூடிய பகுதிகளை முன்கூட்டியே அடையாளம் கண்டு திட்டமிட வேண்டும் எனவும் அவர் தெரிவித்தார்.நகர அபிவிருத்தியின் போது சிறிய அளவிலான தனித்தனி அபிவிருத்திப் பணிகளை மேற்கொள்வதை விட, வர்த்தக நிலையங்கள், பேருந்து நிலையங்கள், வாகனத் தரிப்பிடங்கள், நடைபாதைகள் மற்றும் போக்குவரத்துக் கட்டமைப்புகள் அனைத்தையும் ஒருங்கிணைத்த முழுமையான நகர அபிவிருத்தித் திட்டமொன்று அவசியம் எனவும் அவர் குறிப்பிட்டார். மேலும், தற்போதுள்ள பழைய வர்த்தகக் கட்டடங்களை எதிர்காலத் தேவைகளுக்கு ஏற்ற வகையில் நவீன வர்த்தக மற்றும் குடியிருப்புத் தொகுதிகளாக அபிவிருத்தி செய்வதற்கான வாய்ப்புகளும் ஆராயப்பட வேண்டும். இவ்வாறான அபிவிருத்திகள் மேற்கொள்ளப்படும் போது வர்த்தகர்களுக்கு பாதிப்பு ஏற்படாத வகையில் திட்டமிடல் மேற்கொள்ளப்பட வேண்டியது அவசியம் எனவும் அவர் தெரிவித்தார். அதேவேளை, எதிர்காலத்தில் யாழ்ப்பாண மாவட்டத்தில் அறிமுகப்படுத்தப்படவுள்ள புதிய பேருந்து சேவைகள், குளிரூட்டப்பட்ட பேருந்துகள், மினி பேருந்துகள் மற்றும் ஊரகப் போக்குவரத்து சேவைகளின் தேவைகளையும் தற்போதைய திட்டமிடலில் உள்வாங்க வேண்டும் எனவும் பாராளுமன்ற உறுப்பினர் கௌரவ கருணாநாதன் இளங்குமரன் தெரிவித்தார். யாழ்ப்பாண மாவட்டத்தில் தேவையான நிலவளங்கள் காணப்படுவதால், அவற்றை முறையாக அடையாளம் கண்டு, விஞ்ஞான ரீதியான ஆய்வுகளின் அடிப்படையில் நீண்டகாலத் திட்டமிடலை மேற்கொள்ள வேண்டும். உரிய திட்ட முன்மொழிவுகள் தயாரிக்கப்பட்டு அரசாங்கத்திடம் சமர்ப்பிக்கப்படும் பட்சத்தில், அவற்றை நடைமுறைப்படுத்துவதற்கான நிதி மற்றும் தேவையான ஆதரவைப் பெற்றுக்கொள்ள முடியும் எனவும் அவர் மேலும் தெரிவித்தார்.

இக் கலந்துரையாடலுக்கு தலைமைதாங்கும் கெளரவ பாராளுமன்ற உறுப்பினர் உள்ளிட்டவர்களை வரவேற்று, நகர அபிவிருத்தி திட்டம் (10 City Programme) யாழ்ப்பாண மாவட்டத்தின் அபிவிருத்திப் பயணத்தில் முக்கியத்துவம் வாய்ந்த செயற்திட்டமாகும் எனக் குறிப்பிட்டதுடன், இத்திட்டத்தின் கீழ் முன்னெடுக்கப்படும் நடவடிக்கைகள் அனைத்து தரப்பினராலும் ஏற்றுக்கொள்ளக்கூடியதாகவும், மாவட்டத்தின் எதிர்காலத் தேவைகளுக்கு பொருத்தமானதாகவும் அமைய வேண்டுமென தெரிவித்தார். மேலும், யாழ்ப்பாண மாவட்டம் தரைவழி, புகையிரத, கடல்வழி மற்றும் விமானப் போக்குவரத்து என நான்கு முக்கிய போக்குவரத்து மார்க்கங்களையும் கொண்டுள்ளதால், அவற்றுக்கிடையிலான ஒருங்கிணைப்பை அடிப்படையாகக் கொண்ட போக்குவரத்து திட்டமிடல் அவசியம் எனவும் சுட்டிக்காட்டினார். குறிப்பாக, காங்கேசன்துறை துறைமுகம் மற்றும் விமான நிலையம் சார்ந்த போக்குவரத்து வாய்ப்புகள் எதிர்கால அபிவிருத்தித் திட்டங்களில் உரிய முறையில் உள்வாங்கப்பட வேண்டும் எனவும் தெரிவித்தார். நான்கு வகையான போக்குவரத்து வசதிகளுடனும் தொடர்புடைய முக்கிய பிரதேசமாக விளங்கும் வலிகாமம் வடக்கு பிரதேச செயலகப் பிரிவின் புவியியல் மற்றும் உட்கட்டமைப்பு வாய்ப்புகளும் திட்டமிடலில் கருத்தில்கொள்ளப்பட வேண்டுமென குறிப்பிட்டார். யாழ்ப்பாண நகரில் தனியார் பேருந்து நிலையம் மற்றும் இலங்கை போக்குவரத்துச் சபை பேருந்து நிலையம் உள்ளிட்ட பொதுப் போக்குவரத்து வசதிகள் தொடர்பில் பொதுமக்களால் முன்வைக்கப்படும் குறைபாடுகளுக்கு தீர்வு காணும் வகையில், நகர அபிவிருத்தியுடன் இணைந்த ஒருங்கிணைந்த பொதுப் போக்குவரத்து முறைமை உருவாக்கப்பட வேண்டும் என அரசாங்க அதிபர் தெரிவித்தார். அதேவேளை, இரவு நேரப் பொதுப் போக்குவரத்து சேவைகளையும் விரிவுபடுத்த வேண்டியதன் அவசியத்தை அவர் வலியுறுத்தினார். குறிப்பாக இரவு 8 மணிக்குப் பின்னர் பொதுப் போக்குவரத்து சேவைகள் குறைவடைவதால் பொதுமக்கள் எதிர்கொள்ளும் சிரமங்களை கருத்தில்கொண்டு, தற்போதைய சமூக மற்றும் பொருளாதாரத் தேவைகளுக்கு ஏற்ப புதிய போக்குவரத்து அணுகுமுறைகள் உருவாக்கப்பட வேண்டும் எனவும் தெரிவித்தார். முச்சக்கர வண்டி சேவைகள் மற்றும் கட்டண முறைமை தொடர்பில் பொதுமக்களிடமிருந்து முன்வைக்கப்படும் கருத்துக்களும் கவனத்தில் கொள்ளப்பட வேண்டும் எனக் குறிப்பிட்ட அரசாங்க அதிபர், பொதுப் போக்குவரத்தை அதிகளவில் பயன்படுத்தும் மக்களின் பயணச் செலவு, பாதுகாப்பு, வசதி மற்றும் பொருளாதார நிலை ஆகியவற்றை மையமாகக் கொண்டே போக்குவரத்துத் திட்டமிடல் முன்னெடுக்கப்பட வேண்டும் எனவும் அரசாங்க அதிபர் தெரிவித்தார்.

யாழ்ப்பாண நகரத்தின் எதிர்கால போக்குவரத்து தேவைகள், நகர அபிவிருத்தி மற்றும் மக்களின் அன்றாட போக்குவரத்து வசதிகளை கருத்திற்கொண்டு ஒருங்கிணைந்த நகரப் போக்குவரத்து திட்டத்தை தயாரிப்பதற்கான தொடர்பில் முன்வைப்புக்கள் மூலம் கலந்துரையாடப்பட்டது. யாழ்ப்பாணத்தில் நடைமுறைப்படுத்தப்படவுள்ள இத்திட்டம் அனைத்து தரப்பினராலும் ஏற்றுக்கொள்ளக்கூடிய வகையிலும், எதிர்கால சந்ததியினரின் தேவைகளையும் கருத்திற்கொண்டு நீண்டகாலப் பயன்பாட்டை உறுதி செய்யும் வகையிலும் அமைய வேண்டியதன் அவசியம் வலியுறுத்தப்பட்டது. இத்திட்டம் மேலதிக ஆய்வுகளுக்காக மொறட்டுவ பல்கலைக்கழகத்திற்கு சமர்ப்பிக்கப்படவுள்ள நிலையில், திட்டத்தின் நடைமுறைச் சாத்தியப்பாடுகள் மற்றும் எதிர்காலத் தேவைகள் தொடர்பில் புத்திஜீவிகள், கல்வியாளர்கள், துறைசார் நிபுணர்கள் மற்றும் ஏனைய பங்குதாரர்களிடமிருந்து மக்களை மையப்படுத்திய ரீதியில் ஆலோசனைகளைப் பெற்றுக்கொள்ளும் நோக்கில் இக் கலந்துரையாடல் ஏற்பாடு செய்யப்பட்டது.

யாழ்ப்பாண நகரத்தின் போக்குவரத்து நெரிசலைக் குறைத்தல், பாதுகாப்பான போக்குவரத்தை உறுதி செய்தல் மற்றும் எதிர்கால நகர வளர்ச்சிக்கு ஏற்ற போக்குவரத்து கட்டமைப்பை உருவாக்குதல் தொடர்பில் பல்வேறு ஆலோசனைகள் முன்வைக்கப்பட்டன. வைத்தியசாலை வீதி, பல்கலைக்கழக வீதி, பாடசாலை வீதிகள் உள்ளிட்ட பிரதான வீதிகளை எதிர்கால போக்குவரத்து தேவைகளுக்கு ஏற்ப அகலப்படுத்துதல். வைத்தியசாலைகள் மற்றும் முக்கிய பொது இடங்களை அண்மித்த பகுதிகளில் வாகனத் தரிப்பிட வசதிகளை முறையாக ஒழுங்கமைத்தல். பல்கலைக்கழகங்கள் மற்றும் பாடசாலைகளை அண்மித்த வீதிகளில் பாதுகாப்பான நடைபாதைகள் மற்றும் துவிச்சக்கர வண்டிப் பாதைகளை தனியாக அமைத்தல். கனரக வாகனங்கள் நகரப் பிரவேசத்திற்கான நேர அட்டவணையை ஒழுங்குபடுத்துதல். வீதி விபத்துக்களைத் தடுக்கும் வகையில் வீதி ஒழுங்குகள், போக்குவரத்துச் சின்னங்கள் மற்றும் சிறந்த தெருவிளக்கு வசதிகளை முறையாக ஏற்படுத்துதல். போக்குவரத்து விதிமீறல்களை கட்டுப்படுத்தும் வகையில் சாரதி அனுமதிப் பத்திரத்தில் புள்ளி அடிப்படையிலான தண்டனை முறைமையை நடைமுறைப்படுத்துவது தொடர்பில் ஆராய்தல். வீதிகளை அகலப்படுத்தும் போது தேவையாகும் காணி பெற்றுக்கொள்வதில் ஏற்படக்கூடிய சவால்கள், அதற்கான தீர்வுகள் மற்றும் மக்களின் நலன்களை கருத்திற்கொண்டு திட்டமிடுதல். மொறட்டுவ பல்கலைக் கழகத்தினர் இப் பங்குதாரர்களுடன் கலந்துரையாடலில் ஈடுபட நடவடிக்கை எடுத்தல். மேலும், போக்குவரத்து முகாமைத்துவம், பொது போக்குவரத்து மற்றும் எதிர்கால நகர அபிவிருத்தி உள்ளிட்ட பல்வேறு விடயங்கள் தொடர்பில் துறைசார் அதிகாரிகள் மற்றும் பங்குதாரர்களால் கருத்துக்கள் முன்வைக்கப்பட்டன.

இக்கலந்துரையாடலில் நகர அபிவிருத்தி அதிகார சபையின் பணிப்பாளர் திரு. டி.எஸ்.பி.கே. திசாநாயக்க, உள்ளூராட்சி ஆணையாளர் திரு. எஸ். சுதர்சன், மாவட்ட மேலதிக அரசாங்க அதிபர் திரு. க. சிவகரன், மேலதிக அரசாங்க அதிபர் (காணி) திரு. பா. ஜெயகரன், திட்டமிடல் பணிப்பாளர் திரு. இ. சுரேந்திரநாதன், மாவட்டப் பிரதித் திட்டமிடல் பணிப்பாளர் திரு.எஸ். சிவகுமாரன்

உதவி மாவட்ட செயலாளர் செல்வி உ. தர்ஷினி, போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சின் யாழ்ப்பாண மாவட்ட இணைப்பாளர் திரு. எஸ். சிறிவாகீசன், பல்கலைக்கழக மானியங்கள் ஆணைக்குழுவின் உறுப்பினரும் சிரேஷ்ட பேராசிரியருமான வைத்திய கலாநிதி கே. ரவிராஜ், யாழ்ப்பாணப் பல்கலைக்கழக சிரேஷ்ட விரிவுரையாளர் கலாநிதி எஸ். அறிவழகன், நகர அபிவிருத்தி அதிகார சபையின் மேலதிக பணிப்பாளர் திரு. ரி. பிரேம்நாத், வர்த்தக சங்க தலைவர் திரு. ஜனத்குமார், நகர அபிவிருத்தி அதிகார சபையின் பிரதிப் பணிப்பாளர், தெல்லிப்பழை, பிரதேச செயலாளர்கள், வீதி அபிவிருத்தி அதிகார சபையின் பிரதம பொறியியலாளர், வர்த்தக சங்கத் தலைவர், யாழ்ப்பாணப் பிரதேச செயலகப் பிரதித் திட்டமிடல் பணிப்பாளர், யாழ்ப்பாணப் போக்குவரத்து பொலிஸ் உத்தியோகத்தர்கள் மற்றும் துறைசார் திணைக்களங்களின் தலைவர்கள் உள்ளிட்ட பலர் கலந்துகொண்டனர்.

 

ஒவ்வொரு குடும்பத்திற்கும் பாதுகாப்பான, கௌரவமான வாழ்விடத்தை உறுதி செய்வதே அரசின் இலக்கு – அரசாங்க அதிபர் இந் நிகழ்விற்கு வருகை தந்துள்ள கடற்றொழில், நீரியல் மற்றும் கடல்வளங்கள் அமைச்சர் மற்றும் யாழ்ப்பாண மாவட்ட ஒருங்கிணைப்புக் குழுவின் தலைவர் கௌரவ இராமலிங்கம் சந்திரசேகர், பாராளுமன்ற உறுப்பினர் கௌரவ கருணாநாதன் இளங்குமரன் உள்ளிட்ட அதிதிகளை வரவேற்பதில் மகிழ்ச்சியடைகிறேன் எனத் தெரிவித்தார். அதிமேதகு சனாதிபதி அநுர குமார திசாநாயக்க அவர்களின் எண்ணக்கருவுக்கும், அரசாங்கத்தின் கொள்கைப் பிரகடனத்திற்கும் அமைவாக, நாட்டின் ஒவ்வொரு குடும்பத்திற்கும் பாதுகாப்பானதும் கௌரவமானதுமான வாழ்விடத்தை உறுதி செய்வதை நோக்கமாகக் கொண்டு தேசிய வீடமைப்புத் திட்டங்கள் நடைமுறைப்படுத்தப்பட்டு வருகின்றன எனத் தெரிவித்தார். அந்த வகையில், சமூக மற்றும் பொருளாதார ரீதியாக பல்வேறு சவால்களுக்கு முகங்கொடுத்து வருகின்ற குடும்பங்களுக்கு நிலையான குடும்ப வாழ்க்கையையும் சிறந்த எதிர்காலத்தையும் உருவாக்குவதற்கான அரசாங்கத்தின் முக்கியமான சமூகப் பாதுகாப்புத் திட்டமாக இவ்வீடமைப்பு உதவித் திட்டம் அமைகின்றது எனத் தெரிவித்தார்.

முன்னர் 9 இலட்சம் மற்றும் 6 இலட்சம் ரூபாயாக வழங்கப்பட்டு வந்த வீடமைப்பு உதவித் தொகை, தற்போதைய நிர்மாணச் செலவுகள் மற்றும் மக்களின் பொருளாதார நிலைமைகளை கருத்திற்கொண்டு, அதிமேதகு ஜனாதிபதி அவர்களின் வழிகாட்டுதலின் அமைச்சரவை பத்திரம் மூலம் 20 இலட்சம் ரூபாயாக அதிகரிக்கப்பட்டுள்ளது. இதன் மூலம் மக்கள் குறைந்தபட்ச வசதிகளைக் கொண்ட வீடுகளை மாத்திரமன்றி, பாதுகாப்பானதும் தரமானதுமான வீடுகளை நிர்மாணிப்பதற்கான வாய்ப்பைப் பெறுகின்றனர்.

மகளிர் மற்றும் சிறுவர் அலுவல்கள் அமைச்சினால், யாழ்ப்பாணம் மாவட்டத்திலுள்ள பிரதேச செயலகப் பிரிவுகளில் 2026 ஆம் ஆண்டுக்கான வரவு–செலவுத் திட்ட முன்மொழிவுகளின் அடிப்படையில், தமது வாழ்க்கையின் ஏதேனும் ஒரு கட்டத்தில் நிறுவனமயப்படுத்தப்பட்டு சமூகமயப்படுத்தப்பட்ட பிள்ளைகளின் குடும்பங்களுக்கு சொந்தமான காணியில் வீடு ஒன்றை நிர்மாணித்துக் கொள்வதற்கும், ஏற்கனவே காணப்படும் வீட்டை மறுசீரமைப்பதற்கும் நிதியுதவி வழங்கும் நோக்கில் இத்திட்டம் முன்னெடுக்கப்படுகிறது. குறிப்பாக, சிறுவர் இல்லங்கள் மற்றும் சமூக மேம்பாட்டு நிறுவனங்களின் பராமரிப்பில் இருந்து முன்னேற்றம் கண்டு, தற்போது தங்களது குடும்ப வாழ்க்கையை முன்னெடுத்து வருகின்றவர்களுக்கு நிலையான எதிர்காலத்தை உருவாக்குவதற்கான அரசாங்கத்தின் ஆதரவாக இத்திட்டம் அமைகின்றது.

யாழ்ப்பாண மாவட்டத்தில் இத் திட்டத்தின் கீழ் 34 பயனாளிகள் தெரிவு செய்யப்பட்டுள்ளதுடன், முதற்கட்டமாக 23 பயனாளிகளுக்கான காசோலைகள் இன்றைய தினம் வழங்கப்படுகின்றன. மேலும், வீட்டின் நிர்மாணப் பணிகளின் முன்னேற்றத்திற்கு ஏற்ப கட்டங்கட்டமாக வழங்கப்படும். அதன் முதற்கட்டமாக 4 இலட்சம் ரூபாய் இன்று வழங்கப்படுவதுடன், மீதமுள்ள 16 இலட்சம் ரூபாயும் உரிய கட்டங்களில் வழங்கப்படும். காணி வசதி இல்லாத பயனாளிகள் காணியைப் பெற்றுக்கொள்வதற்கும் தேவையான ஏற்பாடுகள் செய்யப்பட்டுள்ளதுடன், வீடமைப்புக்குத் தேவையான மணலைப் பெற்றுக்கொள்வதற்கான ஒருங்கிணைப்பும் பிரதேச செயலாளர்கள் ஊடாக மாவட்டச் செயலகத்தினால் மேற்கொள்ளப்பட்டுள்ளது. அரசாங்கத்தின் இந்த உதவியின் மூலம் உங்களுக்கும் உங்கள் குடும்பத்தினருக்கும் பாதுகாப்பான, நிலையான மற்றும் வளமான எதிர்காலம் உருவாக வேண்டும் என்பதே எமது எதிர்பார்ப்பாகும் என அரசாங்க அதிபர் தெரிவித்தார். இந் நிகழ்வில் மாவட்ட மேலதிக அரசாங்க அதிபர் க. சிவகரன், மேலதிக அரசாங்க அதிபர் (காணி) பா. ஜெயகரன், திட்டமிடல் பணிப்பாளர் இ. சுரேந்திரநாதன், உதவி மாவட்ட செயலாளர் உ. தர்ஷினி, பிரதேச செயலாளர்கள், மாவட்ட மற்றும் பிரதேச செயலக கணக்காளர்கள், உதவி/பிரதி திட்டமிடல் பணிப்பாளர்கள், தொடர்புடைய உத்தியோகத்தர்கள் கலந்து கொண்டனர்.

 

சிறுவர்கள் தமது எதிர்காலத்தை வலுப்படுத்த நல்ல பழக்கவழக்கங்களையும் பொறுப்புணர்வையும் வளர்த்துக்கொள்ள வேண்டும் – அரசாங்க அதிபர் தெரிவிப்பு சிறுவர் தினத்தை ஒவ்வொரு வருடமும் மாவட்டச் செயலகத்திலும் பிரதேச செயலகங்களிலும் சிறப்பாகக் கொண்டாடி வருகின்றோம். எனினும், இம்முறை சற்று வித்தியாசமான முறையில், இயற்கை எழில் நிறைந்த இந்த ரம்மியமான சூழலுக்கு உங்களை அழைத்து வந்து சிறுவர் தினத்தை கொண்டாடுவதில் மகிழ்ச்சியடைகின்றோம். இத்தகைய சந்தர்ப்பத்தில், சிறுவர்கள் இந்த அழகான சூழலை முழுமையாக அனுபவித்து மகிழ்வதற்கு நாம் தடையாக இருக்கக்கூடாது. அதற்காகவே, இன்றைய நிகழ்வை மகிழ்ச்சியுடனும் சுதந்திரமான சூழலிலும் அனுபவிக்கக்கூடிய வகையில் ஏற்பாடு செய்துள்ளோம் என தெரிவித்தார்.

இன்று நாங்கள் அனைவரும் வளர்ந்து பெரியவர்களாக இருக்கின்றோம். எவ்வளவு விரும்பினாலும், உங்களைப் போன்று மீண்டும் சிறுவர்களாக மாற முடியாது. அந்த ஏக்கம் எம்மில் பலருக்கும் இருக்கின்றது. எனவே, இன்றைய சிறுவர்களாக இருக்கின்ற நீங்கள், உங்களுக்குக் கிடைத்துள்ள இந்தப் பருவத்தை அர்த்தமுள்ளதாகப் பயன்படுத்தி, உங்களைச் சிறந்த முறையில் வளர்த்துக்கொள்ள வேண்டும் என அரசாங்க அதிபர் தெரிவித்தார். சவால்களை எதிர்கொண்டு எதிர்காலத்திற்குத் தயாராக வேண்டும் : ஒவ்வொரு காலகட்டத்திலும் பல்வேறு சவால்களும் பிரச்சினைகளும் காணப்படுகின்றன. அவற்றைச் சரியான முறையில் எதிர்கொண்டு, எதிர்காலத்திற்குத் தங்களைத் தயார்படுத்திக்கொள்வது ஒவ்வொரு சிறுவரினதும் பொறுப்பாகும் எனத் தெரிவித்தார்.

நீங்கள் சிறுவர்கள் என்ற அடிப்படையில் உங்களைப் பெற்றோர்களும் ஆசிரியர்களும் ஏனைய பெரியவர்களும் வழிநடத்த முடியும். இருப்பினும், நீங்கள் உங்களைச் சரியாக அடையாளப்படுத்திக் கொண்டு, உங்கள் செயல்பாடுகளுக்கு உரிய முக்கியத்துவம் அளித்து, எதிர்காலத்தில் நல்ல பிரஜைகளாகவும், சமூகத்துக்கு ஏற்புடையவர்களாகவும், சமூகத்தால் விரும்பப்படுபவர்களாகவும், அதேவேளை சமூகத்தை நேசிப்பவர்களாகவும் நீங்கள் வளர வேண்டும் என்றால், நல்ல பழக்கவழக்கங்களையும் நல்ல பண்புகளையும் உங்கள் வாழ்க்கையில் கடைப்பிடிக்க வேண்டும் எனத் தெரிவித்தார். இந்த நிகழ்வை மிகவும் சிறப்பான முறையில் ஏற்பாடு செய்த அனைத்து உத்தியோகத்தர்களுக்கும் எனது பாராட்டுக்களையும் வாழ்த்துக்களையும் தெரிவித்துக்கொள்வதாகவும் தெரிவித்தார். இன்று உங்களுக்குக் கிடைத்துள்ள இந்த நேரத்தை நீங்கள் முழுமையாகவும் மகிழ்ச்சியாகவும் பயன்படுத்திக்கொள்ள வேண்டும். குறிப்பாக, இன்றைய இந்த ரம்மியமான கரிசல் பூங்கா சூழலில் உங்கள் சிறுவர் தினத்தை மகிழ்ச்சிகரமானதாக மாற்றிக்கொள்ளுமாறு கேட்டுக்கொள்கின்றேன். அனைத்து சிறுவர்களுக்கும் எனது இனிய சிறுவர் தின நல்வாழ்த்துக்களையும் அரசாங்க அதிபர் தெரிவித்துக்கொண்டார்.

இயற்கையோடு இணைந்த சிறுவர் தினக் கொண்டாட்டம் :இந் நிகழ்வின் சிறப்பு அம்சமாக, இயற்கையோடு இணைந்த வகையில் சிறுவர்களுக்கான பல்வேறு நிகழ்வுகள் ஏற்பாடு செய்யப்பட்டிருந்தமை குறிப்பிடத்தக்கதாகும். இக் கொண்டாட்டத்தில் 250 இற்கு மேற்பட்ட சிறுவர்கள் மற்றும் அவர்களின் பெற்றோர்கள் கலந்து கொண்டனர். இயற்கை சார்ந்த செயற்பாடுகளுடன் சிறுவர்களின் மகிழ்ச்சியான வரவேற்பு இடம்பெற்றதுடன், விருந்தினர்கள் வரவேற்கப்பட்டு மங்கல விளக்கேற்றப்பட்டதைத் தொடர்ந்து சிறுவர் தின நிகழ்வுகள் ஆரம்பமானது. தொடர்ந்து இடம்பெற்ற வரவேற்பு நடனத்துடன், சிறுவர்களை மகிழ்வித்த கலை நிகழ்வுகளின் ஒரு பகுதியாக பொம்மலாட்டம் சிறப்பாக இடம் பெற்றது. விருந்தினர்களின் உரையினைத் தொடர்ந்து, CCH அரசசார்பற்ற நிறுவனத்தின் உத்தியோகத்தர்கள் ஒருங்கிணைப்பில் சிறுவர்களும் பெரியோர்களும் இணைந்து மகிழும் “உளம் மலரும்” விளையாட்டுகள், சிறார்களின் பங்கேற்புப் பாடல் உள்ளிட்ட பல்வேறு நிகழ்வுகள் சிறப்பாக இடம்பெற்றன. இந் நிகழ்வுகள் சிறுவர்களிடையே மகிழ்ச்சியையும் உற்சாகத்தையும் ஏற்படுத்தியதுடன், மற்றும் சமூக ஒருங்கிணைப்புத் திறன்களை ஊக்குவிக்கும் வகையிலும் அமைந்திருந்தன. நிகழ்வின் இறுதியில் சிறார்களுக்கு பரிசுப் பொருட்கள் வழங்கப்பட்டமை அவர்களின் மகிழ்ச்சியை மேலும் அதிகரித்தது. இந் நிகழ்வில் சிறுவர்கள், பெற்றோர்களுடன் மேலதிக அரசாங்க அதிபர் (காணி) திரு. பா. ஜெயகரன், கணக்காளர் திரு. சுபாசன், மாவட்ட சிறுவர் பாதுகாப்பு உத்தியோகத்தர் திரு. இ. செந்தூரன் மற்றும் மாவட்ட பிரதேச செயலக சிறுவர் மற்றும் பெண்கள் அபிவிருத்தி உத்தியோகத்தர் மற்றும் CCH அரசசார்பற்ற நிறுவனத்தின் உத்தியோகத்தர்கள் எனப் பலரும் கலந்து கொண்டனர்.

 

 

விவசாய தொகை மதிப்பு தரவுகள் தேசிய திட்டமிடலுக்கு அவசியமானது - அரசாங்க அதிபர் இந் நிகழ்வில் தலைமையுரையாற்றிய அரசாங்க அதிபர் திரு. மருதலிங்கம் பிரதீபன் அவர்கள், அண்மையில் முன்னெடுக்கப்பட்ட குடிசனத் தொகைமதிப்பு நடவடிக்கையின்போது குறிப்பிடப்பட்ட காலப்பகுதிக்குள் தேசிய ரீதியில் யாழ்ப்பாண மாவட்டம் தரவுகளை இற்றைப்படுத்துவதில் முன்னிலை வகித்தமையை நினைவுகூர்ந்தார். அத்துடன், தொகைமதிப்பு நடவடிக்கைகளின் தொடர்ச்சியாக விவசாய நடவடிக்கைகள் தொடர்பான பொருளாதாரத் தொகைமதிப்பின் தேசிய அங்குரார்ப்பண நிகழ்வு யாழ்ப்பாண மாவட்டத்தில் ஆரம்பிக்கப்படுவது மகிழ்ச்சிக்குரிய விடயமாகும் எனவும் தெரிவித்தார். விவசாய நடவடிக்கைகள் தொடர்பான இவ் பொருளாதாரத் தொகைமதிப்பு பத்து ஆண்டுகளுக்கு ஒருமுறை முன்னெடுக்கப்படுவதால், இதன்மூலம் சேகரிக்கப்படும் தரவுகள் தேசிய மட்டத்தில் முக்கியமான கொள்கைத் தீர்மானங்கள் மற்றும் திட்டமிடல் நடவடிக்கைகளை மேற்கொள்வதற்கு முக்கிய பங்களிப்பை வழங்கும் எனவும் அரசாங்க அதிபர் சுட்டிக்காட்டினார். எனவே, விவசாய நடவடிக்கைகளின் வகை, அளவு மற்றும் ஏனைய தொடர்புடைய விடயங்கள் குறித்த துல்லியமான தரவுகளை உரிய காலத்திற்குள் அல்லது அதற்கு முன்னதாகச் சேகரித்து சமர்ப்பிப்பதன் முக்கியத்துவத்தை வலியுறுத்திய அவர், இத்தரவு சேகரிப்பு நடவடிக்கையை வினைத்திறனுடனும் துல்லியத்துடனும் முன்னெடுப்பதற்கு அனைத்து தரப்பினரினதும் ஒத்துழைப்பை வழங்குமாறும் கேட்டுக்கொண்டார். மேலும், விவசாய நடவடிக்கைகள் தொடர்பான பொருளாதாரத் தொகைமதிப்பு தரவு சேகரிப்பு நடவடிக்கையின் தேசிய அங்குரார்ப்பண நிகழ்வு முதன்முறையாக ஒரு விவசாயத்தில் ஈடுபடுபவர் இல்லத்தில் ஆரம்பிக்கப்பட வேண்டும் என்ற தீர்மானத்திற்கு அமைய, யாழ்ப்பாண மாவட்டத்தின் முன்னாள் அரசாங்க அதிபர் திரு. செல்லையா பத்மநாதன் அவர்களின் இல்லம் தெரிவுசெய்யப்பட்டமை சிறப்புக்குரியதாகும் எனவும் தெரிவித்தார்.

ஓய்வுபெற்றதன் பின்னரும் கடந்த 22 ஆண்டுகளாக தொடர்ச்சியாக விவசாய நடவடிக்கைகளில் ஈடுபட்டு வரும் முன்னாள் அரசாங்க அதிபர் திரு. செல்லையா பத்மநாதன் அவர்கள், விவசாயத் துறையின் தொடர்ச்சியான ஈடுபாட்டிற்கு ஒரு முன்மாதிரியானவராக திகழ்கின்றார் எனவும் அரசாங்க அதிபர் குறிப்பிட்டார். இவ் கணக்கெடுப்பு நடவடிக்கைகள் 2026.10.01 முதல் 2026.12.15 வரை நாடளாவிய ரீதியில் நடைமுறைப்படுத்துவதற்கு ஏற்பாடுகள் செய்யப்பட்டுள்ளது குறிப்பிடத்தக்கது. இந் நிகழ்வில் புள்ளிவிபரத் திணைக்களத்தின் விவசாயப் பணிப்பாளர் திருமதி ஜே. கே. வி. எல். நயனஹரி ஜெயக்கொடி, தகவல் தொழில்நுட்பப் பணிப்பாளர் திரு. பி. டி. டி. பிரீஷ், வெளிக்களப் பணிப்பாளர் திரு. ஏ. யு. வி. வீரதுங்க, மாவட்ட இணைப்பாளர் திரு. ஜே. எம். எஸ். யு. ப. ஜெயமக, திரு. யுவ்ராஜ் பூசல்(உணவு மற்றும் விவசாய அமைப்பின் ஆலோசகர்), திரு. லக்மாலி ஜெயரத்ன(பொருளாதார மக்கள் தொகை கணக்கெடுப்பு 2025/26 இன் விளம்பரக் குழுத் தலைவர்), திரு. S. தினேஷ் (துணை இயக்குநர் - தகவல் தொடர்பு தொழில்நுட்பம்), திரு. T.திருஞானதீபன்(வலய மேற்பார்வையாளர் - யாழ்ப்பாண மாவட்டம்) உள்ளிட்ட அதிகாரிகள், பிரதேச செயலாளர்கள், புள்ளிவிபரத் திணைக்களத்தின் மாவட்ட மற்றும் பிரதேச செயலகங்களின் உத்தியோகத்தர்கள், தகவல் தொடர்பாடல் தொழில்நுட்ப உத்தியோகத்தர்கள் உள்ளிட்ட பலர் கலந்து கொண்டனர்.