சுனாமி உள்ளிட்ட அனர்த்தங்களை எதிர்கொள்ள முன்னாயத்தமும் ஒருங்கிணைந்த செயற்பாடுகளும் அவசியம் – அரசாங்க அதிபர் 2004 ஆம் ஆண்டு சுனாமிப் பேரனர்த்தத்தின் அனுபவங்களிலிருந்து பாடங்களைக் கற்றுக்கொண்டு, எதிர்காலத்தில் சுனாமி உள்ளிட்ட இயற்கை அனர்த்தங்களை எதிர்கொள்வதற்கான முன்னாயத்த நடவடிக்கைகளை வலுப்படுத்த வேண்டும் என யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்கள் வலியுறுத்தினார். 2004 டிசம்பர் 26 ஆம் திகதி இடம்பெற்ற சுனாமிப் பேரனர்த்தம் பல உயிர்களையும் உடைமைகளையும் காவுகொண்டதுடன், பல குடும்பங்களின் வாழ்க்கையையும் புரட்டிப்போட்டது. யாழ்ப்பாண மாவட்டத்திலும் வடமராட்சி, தெல்லிப்பழை உள்ளிட்ட பகுதிகள் பாதிக்கப்பட்டதுடன், பல துயரச் சம்பவங்கள் இடம்பெற்றதாக அவர் நினைவுகூர்ந்தார். அனர்த்தங்களுக்கு முன்னர் மக்களைத் தயார்படுத்துதல், பொதுமக்களுக்கு விழிப்புணர்வை ஏற்படுத்துதல், நம்பகமான முன்னெச்சரிக்கைத் தகவல்களை உரிய நேரத்தில் வழங்குதல் மற்றும் பாதுகாப்பான வெளியேற்றத் திட்டங்களை நடைமுறைப்படுத்துதல் ஆகியவற்றின் அவசியத்தையும் வலியுறுத்தினார். யாழ்ப்பாண மாவட்டத்தில் காணப்படும் ஐந்து சுனாமி எச்சரிக்கை நிலையங்களின் செயற்பாட்டுத் தயார்நிலையை உறுதிப்படுத்துவதுடன், அதிக மழை, வெள்ளம் உள்ளிட்ட அனர்த்தங்களை எதிர்கொள்ள மாவட்டச் செயலகம், பிரதேச செயலகங்கள், முப்படையினர், பொலிஸார், அனர்த்த முகாமைத்துவப் பிரிவு மற்றும் சமூகமட்ட அமைப்புகள் இணைந்து செயற்பட வேண்டும் என்றும் தெரிவித்தார். அனைத்துத் தரப்பினரினதும் ஒருங்கிணைந்த பங்களிப்பின் மூலம் உயிரிழப்புகளையும் சொத்து இழப்புகளையும் குறைத்து, அனர்த்தங்களால் பாதிக்கப்படும் மக்களின் பாதுகாப்பையும் வாழ்வாதார மீட்சியையும் உறுதிப்படுத்த நடவடிக்கை எடுக்க வேண்டும் எனக் குறிப்பிட்ட அவர், இக்கலந்துரையாடலை ஏற்பாடு செய்த அனர்த்த முகாமைத்துவப் பிரிவு உள்ளிட்ட தொடர்புடைய தரப்பினருக்கும் நன்றிகளைத் தெரிவித்தார்.

இக் கலந்துரையாடலில், நெறிப்படுத்தல் அதிகாரிகளாக அனர்த்த முகாமைத்துவ நிலையத்தின் (யுனெஸ்கோ) திட்ட முகாமையாளர் திரு. சுனில் ஜெயவீர மற்றும் உதவிப் பணிப்பாளர் திரு. சமில ஆகியோர் கலந்துகொண்டு, கலந்துரையாடலை நெறிப்படுத்தினர். கடலோர சமூகங்களின் பாதுகாப்பு மற்றும் அவசரகால தயார்நிலையை மேம்படுத்தும் நோக்கில் இக்கூட்டம் நடைபெற்றது. இதில் பின்வரும் முக்கிய விடயங்கள் ஆராயப்பட்டன : திட்ட அறிமுகம்: யுனெஸ்கோ அமைப்பின் சுனாமி தயார்நிலை அங்கீகார திட்டத்தை (Tsunami Ready Recognition Programme) மாவட்ட மட்டத்தில் அறிமுகப்படுத்துதல்.

திட்டத்தை கடலோரப் பகுதிகளில் நடைமுறைப்படுத்துவதற்கான முதற்கட்ட ஏற்பாடுகள் மற்றும் நிறுவனங்களின் பொறுப்புகளைப் பகிர்ந்தளித்தல். கள நிலவரம்: தற்போதைய அவசரகால எச்சரிக்கை வழிமுறைகள், மக்களுக்கான விழிப்புணர்வு மற்றும் அனர்த்த மேலாண்மையில் உள்ள பலங்கள் மற்றும் குறைபாடுகளைக் கண்டறிதல். கூட்டு நடவடிக்கை: யாழ்ப்பாண மாவட்டத்தின் கடலோரக் கிராமங்கள் இந்த சர்வதேச அங்கீகாரத்தைப் பெற்றுக்கொள்வதற்கான கூட்டுச் செயல்முறைகளை முன்னெடுத்தல். இக்கூட்டத்தில் அரச அதிகாரிகள், அனர்த்த முகாமைத்துவ பிரிவின் பிரதிநிதிகள் மற்றும் துறைசார் பங்குதாரர்கள் எனப் பலரும் கலந்துகொண்டு தமது ஆலோசனைகளை வழங்கினர். இக் கலந்துரையாடலில் , பிரதேச செயலாளர்கள், முப்படையினர், பொலிஸ் உத்தியோகத்தர்கள், வர்த்தக மற்றும் கைத்தொழில் சங்கத்தின் பொது அமைப்புக்களின் பிரதிநிதிகள், மாவட்ட பிரதேச செயலக அனர்த்த முகாமைத்துவ நிலையத்தின் உத்தியோகத்தர்கள் கலந்து கொண்டனர்.

 

யாழ்ப்பாண மாவட்டச் செயலக நலன்புரிச் சங்கத்தினால் ஏற்பாடு செய்யப்பட்ட வாணி விழா நிகழ்வில், நவராத்திரி விழாக்கள் உத்தியோகத்தர்களிடையே ஒற்றுமை, நல்லிணக்கம் மற்றும் பரஸ்பர புரிந்துணர்வை வளர்ப்பதுடன், தமிழர் பண்பாட்டு மரபுகளைப் பேணிப் பாதுகாப்பதிலும் முக்கிய பங்கு வகிக்கின்றன என யாழ்ப்பாண மாவட்ட அரசாங்க அதிபர் மருதலிங்கம் பிரதீபன் தெரிவித்தார். கடந்த ஒன்பது நாட்களாக முன்னெடுக்கப்பட்ட நவராத்திரி பூஜை நிகழ்வுகளையும், வாணி விழாவை முன்னிட்டு உத்தியோகத்தர்களுக்கிடையில் நடத்தப்பட்ட பல்வேறு கலை மற்றும் கலாசாரப் போட்டிகளையும் பாராட்டினார். இத்தகைய நிகழ்வுகள் வெறுமனே விழாக்களாக அமையாமல், அலுவலகங்களுக்கிடையிலான நட்புறவையும் ஒற்றுமையையும் வலுப்படுத்தும் தளங்களாகவும், தமிழர் பண்பாட்டு கலைப் களையும் மறக்காமல் வலுப்படுத்துவதாகவும் அமைய வேண்டும் என்றும் தெரிவித்தார். மேலும், யாழ்ப்பாண மாவட்டச் செயலகம் தேசிய உற்பத்தித்திறன் போட்டியில் முதலாம் இடத்தைப் பெற்றமை மாவட்டத்திற்குப் பெருமை சேர்க்கும் சாதனை எனத் தெரிவித்த அவர், இந்த வெற்றியானது அனைத்து உத்தியோகத்தர்களினதும் கூட்டு முயற்சி, அர்ப்பணிப்பு மற்றும் ஒருங்கிணைந்த செயற்பாட்டின் வெளிப்பாடாகும் எனக் குறிப்பிட்டார். அத்துடன், மேலும், சுற்றாடல் விருதில் நல்லூர் பிரதேச செயலகம் தங்க விருதையும், சண்டிலிப்பாய் பிரதேச செயலகம் வெள்ளி விருதையும் பெற்றமைக்கும் பாராட்டுத் தெரிவித்தார். அரச உத்தியோகத்தர்கள் தமது அன்றாடக் கடமைகளைப் புதுப்பிக்கப்பட்ட அர்ப்பணிப்புடன் முன்னெடுக்க வேண்டும் என வலியுறுத்திய அரசாங்க அதிபர், நீண்டகாலமாக ஒரே பணியில் ஈடுபடுவதால் ஏற்படக்கூடிய சலிப்பைத் தவிர்த்து, ஒவ்வொரு நாளும் புதிய பொறுப்புணர்வுடன் கடமையாற்ற வேண்டும் என்றார். அதன் மூலமே பொதுமக்களுக்குத் தரமான, வினைத்திறனான மற்றும் பயனுள்ள அரச சேவைகளை வழங்க முடியும் எனவும் தெரிவித்தார். ஒவ்வொரு உத்தியோகத்தரும் தமக்குரிய பொறுப்புகளை உணர்ந்து, மக்களின் நலனையும் மாவட்டத்தின் அபிவிருத்தியையும் முன்னிறுத்திச் செயற்பட வேண்டும் எனக் கேட்டுக்கொண்டார். இறுதியாக, வாணி விழாவைச் சிறப்பாக ஏற்பாடு செய்த நலன்புரிச் சங்கத்தின் தலைவர், நிர்வாகக் குழுவினர், அங்கத்தவர்கள் மற்றும் பங்கேற்ற அனைத்து உத்தியோகத்தர்களுக்கும் பாராட்டுகளையும் வாழ்த்துகளையும் தெரிவித்தார்.

சைவப் புலவர் திரு கமலநாதன் அவர்களின் சிறப்பு சொற்பொழிவு இடம்பெற்றது. மேலும், நவராத்திரி நாட்களில் மாவட்டச் செயலக உத்தியோகத்தர்களுக்கிடையில் தோரணம் பின்னுதல், மாலை கட்டுதல், சைவ வினாவிடைப் போட்டி, கோலமிடுதல், கவிதை ஆகிய போட்டிகள் நடத்தப்பட்டன. இப் போட்டிகளில் வெற்றிபெற்றவர்களுக்குப் பரிசில்களும் வழங்கப்பட்டன. வாணி விழாவின் இறுதியில் நலன்புரிக் கழகம் செயலாளர் கே. கருணாகரன் அவர்களால் நன்றியுரையாற்றப்பட்டது.

 

 

யாழ்ப்பாண மாவட்ட விவசாயிகள் பயிர்க்காப்புறுதி தொடர்பில் எதிர்கொள்ளும் பிரச்சினைகளுக்குத் தீர்வு காண்பதற்கும், அவர்களின் தேவைகள் மற்றும் முன்மொழிவுகளை உரிய தரப்பினரின் கவனத்திற்குக் கொண்டு செல்வதற்கும் இக்கலந்துரையாடல் சிறந்த வாய்ப்பாக அமைகின்றது என யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் அவர்கள் தெரிவித்தார். அவர் மேலும் தெரிவிக்கையில், யாழ்ப்பாண மாவட்டத்தில் நடைபெறும் விவசாயக் குழுக் கூட்டங்கள் உள்ளிட்ட பல்வேறு கலந்துரையாடல்களில் விவசாயிகள் பயிர்க்காப்புறுதி தொடர்பான தமது பிரச்சினைகள் மற்றும் தேவைகளைத் தொடர்ச்சியாக முன்வைத்து வருகின்றனர். இவ்விடயங்கள் தொடர்பில் விவசாயம் சார்ந்த அமைச்சரின் கவனத்திற்குக் கொண்டுசெல்லப்பட்டதன் அடிப்படையில், அமைச்சரின் வழிகாட்டலுக்கு அமைவாகக் கமத்தொழில் மற்றும் கமநலக் காப்புறுதிச் சபையின் பங்கேற்புடன் இக்கலந்துரையாடல் ஏற்பாடு செய்யப்பட்டுள்ளது. பயிர்க்காப்புறுதியைப் பெற்றுக்கொள்வதற்கு உரிய நிபந்தனைகள் மற்றும் நடைமுறைகளைப் பூர்த்தி செய்வது அவசியமாகும். கமத்தொழில் மற்றும் கமநலக் காப்புறுதிச் சபை சட்டரீதியான ஏற்பாடுகள் மற்றும் நிபந்தனைகளுக்கு அமைவாகச் செயற்படுவதால், காப்புறுதிக் கொடுப்பனவுகளை வழங்கும்போதும் அவற்றைக் கவனத்தில் கொள்ள வேண்டியுள்ளது. யாழ்ப்பாண மாவட்ட விவசாயிகள் முன்வைத்துள்ள காப்புறுதிப் பிரச்சினைகள் தொடர்பில் உரிய அறிக்கைகளைச் சமர்ப்பிக்குமாறு முன்னர் சம்பந்தப்பட்ட தரப்பினரிடம் கோரப்பட்டிருந்த போதிலும், எதிர்பார்க்கப்பட்ட அறிக்கைகள் இதுவரை கிடைக்கப்பெறவில்லை. இதனால், விவசாயிகளின் கோரிக்கைகளை உரிய முறையில் ஆராய்ந்து தீர்மானங்களை மேற்கொள்வதில் சில நடைமுறைச் சிக்கல்கள் காணப்படுகின்றன. எனவே, விவசாயிகள் தமது பிரச்சினைகள், தேவைகள் மற்றும் முன்மொழிவுகளை இக்கலந்துரையாடலில் தெளிவாக முன்வைக்க வேண்டும். இதன்மூலம் பயிர்க்காப்புறுதித் திட்டம் தொடர்பான தெளிவான புரிதலைப் பெற்றுக்கொள்வதுடன், மாவட்ட விவசாயிகளின் நலனைக் கருத்திற்கொண்டு நடைமுறைச் சாத்தியமான தீர்வுகளை அடைவதற்கும் வழியேற்படும் என மேலும் தெரிவித்தார். இறுதியாக, இக் கலந்துரையாடலில் பங்கேற்ற கமத்தொழில் மற்றும் கமநலக் காப்புறுதிச் சபையின் அதிகாரிகள், துறைசார் உத்தியோகத்தர்கள் மற்றும் விவசாய அமைப்புகளின் பிரதிநிதிகள் அனைவருக்கும் தனது நன்றியைத் தெரிவித்தார்.

யாழ்ப்பாண மாவட்டத்தில் பயிர்க்காப்புறுதித் திட்டத்தை நடைமுறைப்படுத்தும்போது விவசாயிகள் எதிர்கொள்ளும் சவால்கள், காப்புறுதிப் பயன்களைப் பெற்றுக்கொள்வதில் காணப்படும் நடைமுறைச் சிக்கல்கள் மற்றும் விவசாயிகளின் தேவைகள் தொடர்பில் இதன்போது விரிவாக ஆராயப்பட்டது. மேலும், விவசாயிகளின் பிரச்சினைகளுக்குத் தீர்வு காண்பதற்கான நடவடிக்கைகள் குறித்தும் கலந்துரையாடப்பட்டது. இக் கலந்துரையாடலில் விவசாய மற்றும் கமநலக் காப்புறுதிச் சபையின் தலைவர் திரு. பிறேமசிறி ஜயசிங்காராச்சி, பணிப்பாளர் நாயகம் திரு. கெழும் களுஆராச்சி, விவசாயம், கால்நடை, காணி மற்றும் நீர்ப்பாசன அமைச்சரின் இணைப்புச் செயலாளர் திரு. ரணில் விமலரத்ன, அபிவிருத்திப் பணிப்பாளர் திரு. சந்தன கொடிப்பிலி, நிதிப் பணிப்பாளர் திரு. சமன் சுபசிங்க, காப்புறுதிப் பணிப்பாளர் திரு. கித்மின், மாவட்டத் திட்டமிடல் பணிப்பாளர் திரு. இ. சுரேந்திரநாதன், பிரதி மாகாண விவசாயப் பணிப்பாளர் திருமதி ரஞ்சனாதேவி, விவசாய மற்றும் கமநலக் காப்புறுதிச் சபையின் உதவிப் பணிப்பாளர் திரு. டி. கிரிதரன் உள்ளிட்டோர் கலந்துகொண்டனர். மேலும், கமக்கார அமைப்புக்களின் பிரதிநிதிகள் மற்றும் துறைசார் உத்தியோகத்தர்களும் கலந்துகொண்டு விவசாயிகளின் பிரச்சினைகள் மற்றும் தேவைகள் தொடர்பான கருத்துக்களை முன்வைத்து அதற்கான ஆலோசனைகளையும் பெற்றுக்கொண்டனர்.