அரசாங்க அதிபர் தமதுரையில், ஆசிரியர் பணி மிகவும் உயர்ந்த சமூகப் பணியாகும் எனத் தெரிவித்த அவர், வைத்தியர் ஒருவர் ஒரு நோயாளியைக் காப்பாற்றுகின்றார், பொறியியலாளர் ஒருவர் ஒரு கட்டிடத்தை உருவாக்குகின்றனர் ஆனால், ஒரு நல்ல ஆசிரியர் ஒரு நல்ல சமுதாயத்தை உருவாக்குகின்றார். மனிதனின் வளர்ச்சிக்கு அறிவு, திறன், மனப்பான்மை ஆகிய மூன்றும் முக்கியமானவை எனச் சுட்டிக்காட்டிய அரசாங்க அதிபர், ஆசிரியர்கள் இம்மூன்று துறைகளிலும் தொடர்ச்சியாகத் தங்களை மேம்படுத்திக்கொள்ள வேண்டும் என்றார். மாறிவரும் நவீன உலகில் மாணவர்கள் தகவல் தொழில்நுட்பம் மற்றும் செயற்கை நுண்ணறிவு உள்ளிட்ட நவீன தொழில்நுட்பங்களின் ஊடாகப் பரந்த அறிவைப் பெற்றுவருகின்றனர். எனவே, அவர்களைக் கற்பிக்கும் ஆசிரியர்களும் தமது அறிவையும் கற்பித்தல் திறன்களையும் தொடர்ச்சியாகப் புதுப்பித்துக்கொள்ள வேண்டியது அவசியம் என வலியுறுத்தினார். பாட அறிவை வழங்குவதுடன் ஆசிரியர்களின் பணி நிறைவடைவதில்லை என்றும், மாணவர்களிடையே சமூக விழுமியங்கள், ஒழுக்கம், பொறுப்புணர்வு மற்றும் சரியான மனப்பான்மையையும் உருவாக்குவது ஆசிரியர்களின் முக்கியமான பொறுப்பு என்றும் தெரிவித்தார். ஆசிரியர் பணி என்பது மிகவும் உன்னதமான, உயர்ந்த ஒரு பணியாகும். அந்த வரமும் வாய்ப்பும் உங்களுக்கு வழங்கப்பட்டுள்ளது. அதனைச் சரியான முறையில் பயன்படுத்துவதன் மூலம் உங்கள் சமூகத்தை மட்டுமன்றி, தேசிய மற்றும் சர்வதேச மட்டத்திலும் சிறந்த மாணவர்களை உருவாக்குவதற்கு ஆசிரியர்கள் பங்களிக்க முடியும். மேலும், ஆசிரியர் பணி சம்பளத்திற்காகவோ அல்லது ஒரு நியமனத்திற்காகவோ மேற்கொள்ளப்படும் சாதாரண தொழில் அல்ல எனக் குறிப்பிட்ட அவர், 30 ஆண்டுகளுக்கு முன்னர் பெற்ற அறிவை வைத்துக்கொண்டு 30 ஆண்டுகளுக்குப் பின்னர் மாணவர்களை வழிநடத்த முடியாது எனத் தெரிவித்தார். ஆசிரியர்கள் தொடர்ச்சியான கல்வி, உயர்கல்வி, தொழில்முறைப் பயிற்சி மற்றும் சுயமேம்பாட்டில் ஈடுபட வேண்டும் என்றும் அவர் கேட்டுக்கொண்டார். ஒரு மாணவன் வாழ்க்கையில் உயர்வடையும் போது அதைக் கண்டு முதலில் மகிழ்ச்சியடையும் நபர் ஆசிரியரே எனக் குறிப்பிட்ட அரசாங்க அதிபர், மாணவர்களின் வெற்றியில் ஆசிரியர்களின் பங்களிப்பு அளப்பரியது என்றார். ஆசிரியர்கள் தங்களை முதலில் வளப்படுத்திக்கொண்டால், அவர்கள் கற்பிக்கும் மாணவர் சமுதாயமும் அறிவு, திறன் மற்றும் சிறந்த மனப்பான்மை கொண்ட வளமான சமுதாயமாக உருவாகும் எனவும் அரசாங்க அதிபர் தெரிவித்தார். ஆசிரியர்கள் சமூகத்தின் அடித்தளக் கட்டுமான சக்திகளாகவும், இளைய தலைமுறையைச் சரியான பாதையில் வழிநடத்தும் முக்கியமான பொறுப்பை வகிப்பவர்களாகவும் உள்ளனர் எனக் குறிப்பிட்ட அவர், யாழ்ப்பாண மாவட்டம், வடமாகாணம் மற்றும் நாட்டின் முன்னேற்றத்திற்கு ஆசிரியர்களின் முழுமையான பங்களிப்பை எதிர்பார்ப்பதாகத் தெரிவித்தார்.

விழாவின் ஆரம்ப நிகழ்வாக, விருந்தினர்கள் மற்றும் கலாசாலை விரிவுரையாளர்கள், கலாசாலை சிவன் ஆலயத்திலிருந்து மங்கல வாத்திய இசையுடன் விழா மண்டபத்திற்கு ஊர்வலமாக அழைத்துச் செல்லப்பட்டனர். இதனைத் தொடர்ந்து நடைபெற்ற பிரதான நிகழ்வில் ஆசிரியர் தினத்தின் முக்கியத்துவம், ஆசிரியர்களின் அர்ப்பணிப்பு மற்றும் சமூகத்தில் ஆசிரியர்களின் பங்களிப்பு தொடர்பான கருத்துரைகள் இடம்பெற்றன. மேலும், கலாசாலை விரிவுரையாளர்கள் மற்றும் வடக்கு மாகாணக் கல்வித் திணைக்களத்தினால் முன்னெடுக்கப்படும் பட்டதாரி ஆசிரியர் சேவைப் பயிற்சியாளர்களின் பங்குபற்றுதலுடன் பல்வேறு கலை நிகழ்வுகளும் இடம்பெற்றன. தொடர்ந்து ஆசிரியர் கலாசாலையின் ஆசிரியர் மாணவர்களின் விரிவுரையாளர்கள் கெளரவிக்கப்பட்டனர். ஆசிரியர் தொழிலின் மாண்பையும் ஆசிரியர்களின் அர்ப்பணிப்பையும் எடுத்துரைக்கும் வகையில் நடைபெற்ற இவ்விழாவில், கலாசாலை விரிவுரையாளர்கள், ஆசிரியர் மாணவர்கள் உள்ளிட்ட பலரும் கலந்துகொண்டனர்.

 

 

யாழ்ப்பாண மாவட்டச் செயலகத்தின் சிறப்பான நிர்வாகச் செயற்பாடுகள், வளங்களை வினைத்திறனுடன் பயன்படுத்துதல், பணிச் செயல்முறைகளில் உற்பத்தித்திறனை மேம்படுத்துதல் ஊடாக மக்கள் சேவையை வலுப்படுத்துதல் ஆகியவற்றுக்கான அங்கீகாரமாக இவ்விருது அமைந்துள்ளது. இவ்விருதானது மாவட்டச் செயலாளர் அவர்களின் தலைமைத்துவத்தின் கீழ் அர்ப்பணிப்புடனும் பொறுப்புணர்வுடனும் பணியாற்றி வரும் அனைத்து அதிகாரிகள் மற்றும் உத்தியோகத்தர்களின் கூட்டு முயற்சி, குழுப்பணி மற்றும் தொடர்ச்சியான பங்களிப்புக்குக் கிடைத்துள்ள முக்கியமான அங்கீகாரமாகும்.

சிறந்த தலைமைத்துவம் – ஒருங்கிணைந்த குழுச் செயற்பாடு : யாழ்ப்பாண மாவட்டச் செயலகம் முதலிடம்

– மேலதிக அரசாங்க அதிபர் கே. சிவகரன் யாழ்ப்பாண மாவட்டச் செயலகம் தேசிய உற்பத்தித்திறன் போட்டியில் முதலாம் இடத்தைப் பெற்றிருப்பது, அரசாங்க அதிபரின் சிறந்த தலைமைத்துவம் மற்றும் வழிகாட்டலின் கீழ் முன்னெடுக்கப்பட்ட சிறப்பான செயற்பாடுகளுக்குக் கிடைத்துள்ள முக்கியமான அங்கீகாரமாகும். உற்பத்தித்திறனை உயர்த்துதல், மக்களுக்கு வழங்கப்படும் சேவைகளின் தரம், வேகம் மற்றும் வினைத்திறனை மேம்படுத்துதல் ஆகிய துறைகளில் மாவட்டச் செயலகம் குறிப்பிடத்தக்க முன்னேற்றத்தைப் பதிவு செய்துள்ளது எனத் தெரிவித்தார். இந்த வெற்றியை அடைவதில் உற்பத்தித்திறன் ஒருங்கிணைப்பாளரான உதவி மாவட்டச் செயலாளர், உற்பத்தித்திறன் உத்தியோகத்தர்கள் மற்றும் அனைத்து பதவிநிலை உத்தியோகத்தர்கள் மற்றும் உத்தியோகத்தர்களின் அர்ப்பணிப்பான பங்களிப்பும் ஒருங்கிணைந்த குழுச் செயற்பாடும் முக்கிய பங்காற்றியுள்ளன. எனவே, இவ் வெற்றி சிறந்த தலைமைத்துவத்தின் கீழ் ஒன்றிணைந்து செயற்பட்ட ஒட்டுமொத்த மாவட்டச் செயலகக் குழுவினரின் அர்ப்பணிப்பு, பொறுப்புணர்வு மற்றும் கூட்டுப்பணிக்குக் கிடைத்துள்ள கௌரவமாகும். தேசிய ரீதியில் கிடைத்துள்ள இந்த அங்கீகாரம், எதிர்காலத்தில் உற்பத்தித்திறனை மேலும் மேம்படுத்துவதற்கும், பணிச் செயல்முறைகளைத் தொடர்ந்து நவீனமயப்படுத்துவதற்கும், மக்களுக்கு இன்னும் சிறந்த, விரைவான மற்றும் வினைத்திறன்மிக்க அரச சேவையை வழங்குவதற்கும் புதிய உத்வேகம் அளித்துள்ளதாக மேலதிக அரசாங்க அதிபர் கே. சிவகரன் தெரிவித்தார்.

தேசிய உற்பத்தித்திறன் போட்டியில் யாழ்ப்பாண மாவட்டச் செயலகம் தேசிய ரீதியில் முதலாம் இடத்தைப் பெற்றிருப்பது, மாவட்ட மக்களுக்கு வினைத்திறனானதும் தரமானதுமான சேவையை வழங்குவதற்காக அனைத்து உத்தியோகத்தர்களும் மேற்கொண்ட அர்ப்பணிப்புக்கும் உழைப்புக்கும் கிடைத்துள்ள அங்கீகாரம் என யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் தெரிவித்தார். அவர் மேலும் தெரிவிக்கையில், உற்பத்தித்திறன் போட்டியில் முதலாம் இடத்தைப் பெறுவது ஒரு சாதனையாகும். ஆனால் அந்த இடத்தைத் தொடர்ந்து தக்கவைத்துக் கொள்வது அதைவிடக் கடினமானது. எனவே, தற்போது பெற்றுள்ள இந்த வெற்றியைத் தக்கவைத்துக் கொள்வதுடன், எதிர்காலத்தில் இதற்கும் மேலான நிலையை அடைவதற்கும் நாம் அனைவரும் ஒன்றிணைந்து செயற்பட வேண்டும். இந்த வெற்றியின் உண்மையான உரிமையாளர்கள் மாவட்டச் செயலகத்தின் அனைத்து மட்டங்களிலும் பணியாற்றுகின்ற ஒவ்வொரு உத்தியோகத்தருமே ஆவர். மேலதிக அரசாங்க அதிபர் மற்றும் உதவி மாவட்ட செயலாளரின் வழிகாட்டுதலுடன் உற்பத்தித்திறன் தொடர்பான உத்தியோகத்தர்கள் அர்ப்பணிப்புடன் செயற்பட்டுள்ளனர். அதேபோன்று ஒவ்வொரு கிளையிலும் பணியாற்றும் உத்தியோகத்தர்களின் ஒத்துழைப்பும் இந்த வெற்றிக்கு முக்கிய காரணமாக அமைந்துள்ளது. பதவி நிலை உத்தியோகத்தர்களுக்கிடையிலான நல்லுறவு, திறந்த தொடர்பாடல், ஒருவருக்கொருவர் வழங்கும் ஒத்துழைப்பு மற்றும் ஒரே நோக்குடன் செயற்படுதல் ஆகியவை எமது வெற்றியின் முக்கிய அடித்தளங்களாகும். உற்பத்தித்திறன் செயற்பாடுகள் ஆரம்பிக்கப்பட்ட காலங்களில் அது சிரமமான ஒரு பணியாகப் பார்க்கப்பட்டிருந்தாலும், தற்போது அது எமது அன்றாட அலுவலகப் பணிகளின் ஒரு பகுதியாக மாறியுள்ளது. இதன் மூலம் அலுவலகத்தின் செயல்திறனை மட்டுமன்றி பொதுமக்களுக்கு வழங்கப்படும் சேவையின் தரத்தையும் மேம்படுத்த முடிந்துள்ளது. அலுவலகப் பொறுப்புகளுடன் தங்களது தனிப்பட்ட மற்றும் குடும்பப் பொறுப்புகளையும் சமநிலைப்படுத்திக் கொண்டு உத்தியோகத்தர்கள் மேற்கொள்ளும் அர்ப்பணிப்பான சேவை பாராட்டுக்குரியது. இந்த முதலாம் இடம் வெறுமனே ஒரு போட்டியில் பெற்ற வெற்றியாக பார்க்கப்படக் கூடாது. மாவட்ட மக்களுக்கு நாம் வழங்கும் சேவையின் தரத்திற்கான ஒரு அங்கீகாரமாக இதனைப் பார்க்க வேண்டும். எனவே, எதிர்காலத்திலும் மக்களை மையமாகக் கொண்ட வினைத்திறனான சேவையை வழங்குவதை எமது பிரதான இலக்காகக் கொண்டு செயற்பட வேண்டும் எனத் தெரிவித்தார். மேலும், இன்றைய நாள் மாவட்டச் செயலகத்தின் அனைத்து உத்தியோகத்தர்களையும் மனதாரப் பாராட்டக்கூடிய மகிழ்ச்சியான நாளாக அமைந்துள்ளதாகத் தெரிவித்த அரசாங்க அதிபர், இந்த வெற்றியை ஏற்படுத்துவதற்கு பங்களித்த அனைத்து உத்தியோகத்தர்களுக்கும் நன்றியையும் பாராட்டையும் தெரிவித்தார். மாவட்ட நிர்வாகத்தை மேலும் வலுப்படுத்துவதற்கு எதிர்காலத்திலும் அனைத்து உத்தியோகத்தர்களினதும் ஒற்றுமையானதும் அர்ப்பணிப்பானதுமான ஒத்துழைப்பு தொடர வேண்டும் எனவும் அவர் கேட்டுக்கொண்டார்.

நிகழ்வின் ஒரு பகுதியாக, மேலதிக அரசாங்க அதிபர்(காணி), திட்டமிடல் பணிப்பாளர், பிரதம கணக்காளர், பிரதம பொறியியலாளர், பிரதம உள்ளகக் கணக்காய்வாளர், உதவி மாவட்டச் செயலாளர், நிர்வாக உத்தியோகத்தர் உள்ளிட்ட பதவிநிலை உத்தியோகத்தர்கள் மற்றும் ஏனைய உத்தியோகத்தர்கள் தமது உற்பத்தித்திறன் செயற்பாடுகள் தொடர்பான பணியனுபவங்கள் மற்றும் கருத்துக்கள் தொடர்பான அனுபவப் பகிர்வுகளை வழங்கினர். இன்றைய நிகழ்வில் உற்பத்தித்திறன் செயற்பாடுகளை ஒருங்கிணைத்த உதவி மாவட்டச் செயலாளர் செல்வி உ. தர்சினி மற்றும் உற்பத்தித்திறன் உத்தியோகத்தர்களான திரு. செ. பிரசாத், திரு. அ. அ. வினிஸ்ரன், திருமதி ந. லதாங்கி, திருமதி சி. சசிதா மற்றும் திருமதி யோ.கிருஷாந்தினி ஆகியோர் ஆற்றிய சிறப்பான பங்களிப்பைப் பாராட்டி, அரசாங்க அதிபரால் கௌரவிக்கப்பட்டனர்.

 

சிறுவர்களின் கலைத் திறமைகளை வளர்க்க தொடர்ச்சியான வாய்ப்புகள் வழங்கப்பட வேண்டும் – அரசாங்க அதிபர் சிறுவர்களின் கலை, கலாசார மற்றும் பண்பாட்டு திறமைகளை அடையாளம் கண்டு வளர்ப்பதற்கு சமூக மட்டத்திலிருந்து மாவட்ட மட்டம் வரையான போட்டி வாய்ப்புகள் தொடர்ச்சியாக வழங்கப்பட வேண்டும் என அரசாங்க அதிபர் தெரிவித்தார். மாவட்ட மட்டப் போட்டிகளில் தெரிவாகும் சிறுவர்களுக்கு தேசிய மட்டப் போட்டிகளில் பங்கேற்கும் வாய்ப்பு கிடைப்பதாகவும் அவர் குறிப்பிட்டார். கலை மற்றும் கலாசார நிகழ்வுகளில் சிறுவர்கள் பங்கேற்பது அவர்களின் மனநிலையில் நல்ல மாற்றத்தையும் நேர்மறையான எண்ணங்களையும் உருவாக்குவதுடன், அவர்களின் படைப்பாற்றல் மற்றும் ஆளுமை வளர்ச்சிக்கும் துணைபுரியும் என அரசாங்க அதிபர் தெரிவித்தார். பாரம்பரிய கலைகள் அடுத்த தலைமுறைக்கு கடத்தப்பட வேண்டிய நிலையில், அவற்றில் சிறுவர்களின் ஆர்வத்தை மேலும் அதிகரிப்பது அவசியம் எனவும் வலியுறுத்தினார். யாழ்ப்பாண மாவட்டத்தில் பல்வேறு கலை, பண்பாட்டு விழாக்கள் மற்றும் போட்டி நிகழ்வுகள் சிறப்பாக முன்னெடுக்கப்பட்டு வருவதாகக் குறிப்பிட்ட அவர், இத்தகைய நிகழ்வுகள் சிறுவர்கள் தங்களது தனித்திறமைகளையும் குழுத் திறமைகளையும் வெளிப்படுத்துவதற்கான சிறந்த வாய்ப்பாக அமைகின்றன என்றார். மேலும், தங்களது விடுமுறை நாளிலும் நடுவர்களாகப் பங்கேற்று ஒத்துழைத்தவர்களுக்கும், சிறுவர்களை முறையாக வழிநடத்தி போட்டிகளில் பங்கேற்கச் செய்த பெற்றோர்கள், சிறுவர் கழகங்கள் மற்றும் சமுர்த்தி அதிகாரிகளுக்கும் அரசாங்க அதிபர் நன்றியையும் பாராட்டையும் தெரிவித்தார். சிறுவர்கள் புத்தகக் கல்வியில் மட்டும் கவனம் செலுத்தாமல், கலை, கலாசார மற்றும் பண்பாட்டு விழுமியங்களுடன் இணைந்த முழுமையான ஆளுமையுடையவர்களாக வளர வேண்டும் என வலியுறுத்திய அரசாங்க அதிபர், எதிர்காலத்திலும் இத்தகைய போட்டிகளை சிறப்பாக முன்னெடுத்து சிறுவர்களின் திறமைகளை ஊக்குவிப்பதற்கு அனைவரும் ஒன்றிணைந்து செயற்பட வேண்டும் என கேட்டுக் கொண்டார். நடைபெற்ற போட்டிகளின் விபரங்கள் :

வயதுப் பிரிவுகள்:

07 – 10 வயது

11 – 14 வயது

15 – 18 வயது

போட்டி வகைகள்:

பாடல் – (சாதாரண பாடல்)

நாட்டார் பாடல் – (தனிநபர்)

கிராமிய நடனம் – (கூட்டு / கலவன்

அம்மன் கூத்து

குறவர்

காவடி

கோலாட்டம்)

அறிவிப்பாளர்

பேச்சு

உரையுள்

செய்யுள்

ஓவியம்

சிறுவர்களின் கலை, இலக்கிய மற்றும் கலாசாரத் திறமைகளை இனங்கண்டு, அவற்றை மேலும் வளர்ப்பதற்கான சிறந்த வாய்ப்பாக இம்மாவட்ட மட்டப் போட்டிகள் அமைந்துள்ளன. மாவட்டத்தின் பல்வேறு பிரதேசங்களிலிருந்தும் சிறுவர் கழகங்களைச் சேர்ந்த சிறுவர்கள் ஆர்வத்துடன் பங்கேற்று தமது திறமைகளை வெளிப்படுத்தினர். இன்று முற்பகல் 8.30 மணி முதல் பிற்பகல் 4.00 மணி வரை நடைபெற்ற இந்த மாவட்ட மட்டப் போட்டிகளில், சமுர்த்தி சிறுவர் கழகங்களைச் சேர்ந்த ஏராளமான மாணவர்கள் தங்களது கலை, கலாசார மற்றும் இலக்கியத் திறமைகளை வெளிப்படுத்தியிருந்தமை குறிப்பிடத்தக்கது. இப் போட்டியின் ஆரம்ப நிகழ்வில் சமூர்த்தி கணக்காளர் திரு. இ. முருகதாஸ், யாழ். கனகரத்தினம் மத்திய மகா வித்தியாலயத்தின் பிரதி அதிபர், சமுர்த்தி தலைமைப் பீட முகாமையாளர்கள், வங்கி முகாமையாளர்கள், பெற்றோர்கள் கலந்து கொண்டனர்.