விவசாய தொகை மதிப்பு தரவுகள் தேசிய திட்டமிடலுக்கு அவசியமானது - அரசாங்க அதிபர் இந் நிகழ்வில் தலைமையுரையாற்றிய அரசாங்க அதிபர் திரு. மருதலிங்கம் பிரதீபன் அவர்கள், அண்மையில் முன்னெடுக்கப்பட்ட குடிசனத் தொகைமதிப்பு நடவடிக்கையின்போது குறிப்பிடப்பட்ட காலப்பகுதிக்குள் தேசிய ரீதியில் யாழ்ப்பாண மாவட்டம் தரவுகளை இற்றைப்படுத்துவதில் முன்னிலை வகித்தமையை நினைவுகூர்ந்தார். அத்துடன், தொகைமதிப்பு நடவடிக்கைகளின் தொடர்ச்சியாக விவசாய நடவடிக்கைகள் தொடர்பான பொருளாதாரத் தொகைமதிப்பின் தேசிய அங்குரார்ப்பண நிகழ்வு யாழ்ப்பாண மாவட்டத்தில் ஆரம்பிக்கப்படுவது மகிழ்ச்சிக்குரிய விடயமாகும் எனவும் தெரிவித்தார். விவசாய நடவடிக்கைகள் தொடர்பான இவ் பொருளாதாரத் தொகைமதிப்பு பத்து ஆண்டுகளுக்கு ஒருமுறை முன்னெடுக்கப்படுவதால், இதன்மூலம் சேகரிக்கப்படும் தரவுகள் தேசிய மட்டத்தில் முக்கியமான கொள்கைத் தீர்மானங்கள் மற்றும் திட்டமிடல் நடவடிக்கைகளை மேற்கொள்வதற்கு முக்கிய பங்களிப்பை வழங்கும் எனவும் அரசாங்க அதிபர் சுட்டிக்காட்டினார். எனவே, விவசாய நடவடிக்கைகளின் வகை, அளவு மற்றும் ஏனைய தொடர்புடைய விடயங்கள் குறித்த துல்லியமான தரவுகளை உரிய காலத்திற்குள் அல்லது அதற்கு முன்னதாகச் சேகரித்து சமர்ப்பிப்பதன் முக்கியத்துவத்தை வலியுறுத்திய அவர், இத்தரவு சேகரிப்பு நடவடிக்கையை வினைத்திறனுடனும் துல்லியத்துடனும் முன்னெடுப்பதற்கு அனைத்து தரப்பினரினதும் ஒத்துழைப்பை வழங்குமாறும் கேட்டுக்கொண்டார். மேலும், விவசாய நடவடிக்கைகள் தொடர்பான பொருளாதாரத் தொகைமதிப்பு தரவு சேகரிப்பு நடவடிக்கையின் தேசிய அங்குரார்ப்பண நிகழ்வு முதன்முறையாக ஒரு விவசாயத்தில் ஈடுபடுபவர் இல்லத்தில் ஆரம்பிக்கப்பட வேண்டும் என்ற தீர்மானத்திற்கு அமைய, யாழ்ப்பாண மாவட்டத்தின் முன்னாள் அரசாங்க அதிபர் திரு. செல்லையா பத்மநாதன் அவர்களின் இல்லம் தெரிவுசெய்யப்பட்டமை சிறப்புக்குரியதாகும் எனவும் தெரிவித்தார்.

ஓய்வுபெற்றதன் பின்னரும் கடந்த 22 ஆண்டுகளாக தொடர்ச்சியாக விவசாய நடவடிக்கைகளில் ஈடுபட்டு வரும் முன்னாள் அரசாங்க அதிபர் திரு. செல்லையா பத்மநாதன் அவர்கள், விவசாயத் துறையின் தொடர்ச்சியான ஈடுபாட்டிற்கு ஒரு முன்மாதிரியானவராக திகழ்கின்றார் எனவும் அரசாங்க அதிபர் குறிப்பிட்டார். இவ் கணக்கெடுப்பு நடவடிக்கைகள் 2026.10.01 முதல் 2026.12.15 வரை நாடளாவிய ரீதியில் நடைமுறைப்படுத்துவதற்கு ஏற்பாடுகள் செய்யப்பட்டுள்ளது குறிப்பிடத்தக்கது. இந் நிகழ்வில் புள்ளிவிபரத் திணைக்களத்தின் விவசாயப் பணிப்பாளர் திருமதி ஜே. கே. வி. எல். நயனஹரி ஜெயக்கொடி, தகவல் தொழில்நுட்பப் பணிப்பாளர் திரு. பி. டி. டி. பிரீஷ், வெளிக்களப் பணிப்பாளர் திரு. ஏ. யு. வி. வீரதுங்க, மாவட்ட இணைப்பாளர் திரு. ஜே. எம். எஸ். யு. ப. ஜெயமக, திரு. யுவ்ராஜ் பூசல்(உணவு மற்றும் விவசாய அமைப்பின் ஆலோசகர்), திரு. லக்மாலி ஜெயரத்ன(பொருளாதார மக்கள் தொகை கணக்கெடுப்பு 2025/26 இன் விளம்பரக் குழுத் தலைவர்), திரு. S. தினேஷ் (துணை இயக்குநர் - தகவல் தொடர்பு தொழில்நுட்பம்), திரு. T.திருஞானதீபன்(வலய மேற்பார்வையாளர் - யாழ்ப்பாண மாவட்டம்) உள்ளிட்ட அதிகாரிகள், பிரதேச செயலாளர்கள், புள்ளிவிபரத் திணைக்களத்தின் மாவட்ட மற்றும் பிரதேச செயலகங்களின் உத்தியோகத்தர்கள், தகவல் தொடர்பாடல் தொழில்நுட்ப உத்தியோகத்தர்கள் உள்ளிட்ட பலர் கலந்து கொண்டனர்.

 

சமூகப் பாதுகாப்புத் திட்டத்தின் பிரதான நோக்கம் மிகவும் முக்கியமானது. வாழ்க்கையில் எதிர்கொள்ளக்கூடிய எதிர்பாராத சவால்கள் தொடர்பில் ஒவ்வொரு குடும்பத்திற்கும் ஒரு பாதுகாப்பு உணர்வும், எதிர்காலம் தொடர்பான நம்பிக்கையும் ஏற்படுத்துவதே இதன் முக்கியத்துவமாகும். குறிப்பாக வறுமையில் வாழ்கின்ற குடும்பங்கள், நிரந்தரமான தொழில் வாய்ப்பின்றி வாழ்கின்றவர்கள், சிறு தொழில்களில் பணியாற்றுகின்றவர்கள் மற்றும் எதிர்காலத்தில் சமூக அல்லது பொருளாதாரப் பாதுகாப்பு தேவைப்படக்கூடிய பல்வேறு தரப்பினருக்கும் இத்திட்டம் முக்கியமானதாக அமைகின்றது. பிள்ளைகள் இல்லாத முதியவர்கள், பிள்ளைகளை இழந்தவர்கள், விதவைகள் உள்ளிட்ட சமூகத்தில் பாதுகாப்பு தேவைப்படுகின்ற பல்வேறு தரப்பினரையும் இத்திட்டத்தின் பயனாளர்களாக அடையாளம் கண்டு அவர்களிடம் இந்தத் திட்டத்தை கொண்டு செல்ல வேண்டிய பொறுப்பு எமக்கு உள்ளது எனவும் தெரிவித்தார். வடக்கு மாகாணத்தில் சுமார் 11 முதல் 12 இலட்சம் வரையான மக்கள் வாழ்கின்ற நிலையில், இவர்களில் சமூகப் பாதுகாப்புத் திட்டத்தில் இன்னும் இணைக்கப்பட வேண்டிய பெருமளவான மக்கள் உள்ளனர். எனவே, இந்தத் திட்டத்தின் பயன்கள் தொடர்பில் கிராம மட்டம் வரை விழிப்புணர்வை ஏற்படுத்துவது மிகவும் அவசியமாகும். வறுமையின் உண்மையான நிலையை அடையாளம் காண வேண்டும் வடக்கு மாகாணத்தின் பொருளாதார நிலைமையை நாம் மேலோட்டமாக மட்டும் மதிப்பிடக்கூடாது. யாழ்ப்பாண நகரத்தையும் அதன் சுற்றுப்புறங்களையும் பார்க்கும்போது பெரிய கட்டடடங்கள், வர்த்தக நிலையங்கள், நவீன சேவைகள் என பொருளாதார முன்னேற்றம் காணப்படுவது உண்மை. ஆனால் கிராம மட்டத்திற்குச் சென்று, பாடசாலைகளில் உள்ள மாணவர்களின் நிலைமையைப் பார்க்கும்போது, இன்னும் பல குடும்பங்கள் அடிப்படைத் தேவைகளைக்கூட நிறைவேற்ற முடியாத நிலையில் இருப்பதை காணக்கூடியதாக உள்ளது. காலணி வாங்க முடியாத மாணவர்கள், பாடசாலைப் பையைப் பெற்றுக்கொள்ள முடியாத குடும்பங்கள், கல்வியைத் தொடர்வதற்கு பொருளாதார ரீதியாக சிரமப்படுகின்ற பிள்ளைகள் இன்னும் இருக்கின்றனர். எனவே, சமூகப் பாதுகாப்புத் திட்டங்களின் பயன்கள் மேல்மட்டத்தில் மட்டும் நின்றுவிடாமல், உண்மையாக உதவி தேவைப்படுகின்ற மக்களை அடையாளம் கண்டு கீழ்மட்டம் வரை சென்றடைய வேண்டும்.

அரசாங்கம் என்ற வகையில் சமூகப் பாதுகாப்புத் திட்டங்களை முன்னெடுப்பதற்கு தேவையான ஒத்துழைப்பை நாம் வழங்கி வருகின்றோம். எதிர்காலத்திலும் அந்த ஒத்துழைப்பு தொடரும். அதேவேளை, பிரதேச செயலாளர்கள் உள்ளிட்ட அரச அதிகாரிகளுக்கு முக்கியமான பொறுப்பும் கடமையும் உள்ளது. மக்களின் பிரச்சினைகளை உரிய அதிகார மட்டத்திலேயே தீர்ப்பதற்கான அதிகாரங்கள் வழங்கப்பட்டுள்ள நிலையில், அவற்றை உரிய முறையில் பயன்படுத்தி, தேவையற்ற காலதாமதங்களைத் தவிர்த்து மக்களுக்கு விரைவான சேவையை வழங்க வேண்டும். மக்களின் முறைப்பாடுகள் தொடர்ச்சியாக மேல்மட்டத்திற்கு வரக்கூடிய நிலை ஏற்படாமல், பிரதேச மட்டத்திலேயே பிரச்சினைகளுக்கு தீர்வுகளை வழங்குவதற்கான செயற்பாட்டு அணுகுமுறை அவசியமாகும்.

அரசியல்வாதிகள், அமைச்சர்கள், நாடாளுமன்ற உறுப்பினர்கள், மாவட்ட அரசாங்க அதிபர்கள், பிரதேச செயலாளர்கள் மற்றும் அரச உத்தியோகத்தர்கள் என அனைவரும் ஒருமுகமாக இணைந்து செயற்பட வேண்டும். எமது மக்களின் நலன் மற்றும் எமது பிரதேசத்தின் எதிர்கால அபிவிருத்தி ஆகியவற்றை முன்னிலைப்படுத்தி செயல்பட வேண்டும். யாழ்ப்பாணம் உள்ளிட்ட வடக்கு மாகாணத்தின் எதிர்காலத்தை வலுப்படுத்துவது எமக்கு முன்னுள்ள மிகப்பெரிய பொறுப்பாகும். மக்கள் தொகை குறைதல், இளைஞர்கள் மற்றும் யுவதிகள் வெளிநாடுகளுக்கும் நாட்டின் ஏனைய பகுதிகளுக்கும் இடம்பெயர்வது போன்ற சவால்களை நாம் கவனத்தில் கொள்ள வேண்டும். எமது இளைஞர்களுக்கு இங்கேயே கல்வி, தொழில், வாழ்வாதாரம் மற்றும் எதிர்காலம் தொடர்பில் நம்பிக்கையை உருவாக்கக்கூடிய சூழலை ஏற்படுத்த வேண்டும். அதற்காகவே மாவட்ட மற்றும் பிரதேச மட்டங்களில் பாரிய அபிவிருத்தித் திட்டங்களை முன்னெடுத்து வருகின்றோம். இந்த அபிவிருத்திப் பணிகள் வெறும் உட்கட்டமைப்பு அபிவிருத்தியாக மட்டும் இருக்காமல், இளைஞர்களின் எதிர்கால நம்பிக்கையை கட்டியெழுப்பும் வகையிலும் அமைய வேண்டும்.

இலங்கையில் சுமார் 2 கோடியே 20 இலட்சத்துக்கும் அதிகமான மக்கள் வாழ்கின்ற நிலையில், சமூகப் பாதுகாப்புத் திட்டத்தில் இணைந்துள்ளவர்களின் எண்ணிக்கை இன்னும் குறைவாகவே உள்ளது. வடக்கு மாகாணத்திலும் இத்திட்டத்தின் கீழ் இணைக்கப்பட வேண்டிய பெருமளவான மக்கள் உள்ளனர். எனவே, சமூகப் பாதுகாப்புத் திட்டம் தொடர்பான விழிப்புணர்வை கிராமம் கிராமமாகவும், குடும்பம் குடும்பமாகவும் கொண்டு சென்று, தகுதியுடைய அனைவரையும் இத்திட்டத்தின் கீழ் இணைப்பதற்கான நடவடிக்கைகளை நாம் வலுப்படுத்த வேண்டும். இந்தப் பணியை நடைமுறைப்படுத்துவதில் இங்கு பணியாற்றுகின்ற உத்தியோகத்தர்களின் பங்களிப்பு மிகவும் முக்கியமானது. இன்றைய தினம் விருதுகளைப் பெறுகின்ற முதலாவது, இரண்டாவது, மூன்றாவது இடங்களைப் பெற்ற மாவட்டங்களுக்கும், தங்கம், வெள்ளி உள்ளிட்ட விருதுகளைப் பெறுகின்ற அனைத்து மாவட்டங்களுக்கும் எனது மனமார்ந்த வாழ்த்துக்களையும் பாராட்டுக்களையும் தெரிவித்துக்கொள்கின்றேன். உங்களுடைய அர்ப்பணிப்பு, உழைப்பு மற்றும் பொறுப்புணர்வு இல்லாமல் இந்தச் சாதனைகளை அடைய முடியாது. எதிர்காலத்தில் இன்னும் அதிகமான மக்களை சமூகப் பாதுகாப்புத் திட்டத்திற்குள் இணைத்து, எமது மக்களின் வாழ்க்கையில் நம்பிக்கையையும் பாதுகாப்பையும் ஏற்படுத்துவதற்காக அனைவரும் தொடர்ந்து அர்ப்பணிப்புடன் செயற்பட வேண்டும் என கேட்டுக்கொள்கின்றேன் என அமைச்சர் தெரிவித்தார். இறுதியாக, இன்றைய விருது வழங்கும் நிகழ்வில் கலந்து கொண்டுள்ள அனைவருக்கும் தமது நன்றியைத் கெளரவ அமைச்சர் தெரிவித்துக்கொண்டார்.

 

 

தேசிய ரீதியில் 12 ஆவது தடவையாகவும் யாழ்ப்பாண மாவட்டம் முதலிடம் - உத்தியோகத்தர்களின் அர்ப்பணிப்புக்கு கிடைத்த அங்கீகாரம் – அரசாங்க அதிபர் யாழ்ப்பாண மாவட்டம் சமூக பாதுகாப்புச் சபையின் தேசிய விருது வழங்கும் நிகழ்வில் தொடர்ந்து 12ஆவது தடவையாகவும் தேசிய ரீதியாக முதலிடத்தைப் பெற்றுள்ளமை மாவட்டத்தின் அரச உத்தியோகத்தர்களின் அர்ப்பணிப்பான பணிக்குக் கிடைத்துள்ள முக்கியமான அங்கீகாரம் என அரசாங்க அதிபர் தெரிவித்தார். இந்தச் சாதனை தனிநபர் ஒருவருக்கான வெற்றி அல்ல என்றும், மாவட்டத்தின் பிரதேச செயலாளர்கள், சமூக பாதுகாப்பு உத்தியோகத்தர்கள், கிராம உத்தியோகத்தர்கள், அபிவிருத்தி உத்தியோகத்தர்கள், சமுர்த்தி உத்தியோகத்தர்கள் உள்ளிட்ட அனைத்து உத்தியோகத்தர்களினதும் கூட்டு முயற்சியின் பெறுபேறாகும் என்றும் தெரிவித்தார். கடந்த 12 வருடங்களாக யாழ்ப்பாண மாவட்டத்தில் கடமையாற்றிய அரசாங்க அதிபர்கள், பிரதேச செயலாளர்கள் மற்றும் விடயம் சார் அனைத்து உத்தியோகத்தர்களின் தொடர்ச்சியான பங்களிப்பும் இந்த வெற்றிக்கான அடித்தளமாக அமைந்துள்ளதாகவும் அவர் சுட்டிக்காட்டினார். சமூக பாதுகாப்புச் சபையின் திட்டங்கள் எதிர்கால தலைமுறைகளின் சமூக மற்றும் பொருளாதாரப் பாதுகாப்பை உறுதிப்படுத்தும் முக்கியமான நீண்டகால சேமிப்புத் திட்டங்களாகும் எனத் தெரிவித்த அவர், குழந்தை பிறந்தது முதல் எதிர்காலத்தை நோக்கி மேற்கொள்ளப்படும் சேமிப்பின் மூலம், அந்த நபர் 60 வயதை அடையும் போது ஓய்வூதியப் பயனைப் பெறுவதற்கான வாய்ப்பு ஏற்படுத்தப்படுகின்றது எனவும் குறிப்பிட்டார். மேலும், புலமைப்பரிசில் பரீட்சை, க.பொ.த. சாதாரண தரம் மற்றும் உயர்தரப் பரீட்சைகளில் சிறந்த பெறுபேறுகளைப் பெறுகின்ற மாணவர்கள் உள்ளிட்ட பல்வேறு தரப்பினருக்கும் சமூக பாதுகாப்புச் சபையின் திட்டங்கள் பயனளிப்பதாக அவர் தெரிவித்தார்.

கடந்த ஒரு வருட காலப்பகுதியில் யாழ்ப்பாணத்திற்கான சமூக பாதுகாப்பு சபையின் மாவட்ட அலுவலர் பதவி தொடர்ச்சியாக நிரப்பப்படாத நிலையிலும் மாவட்டம் தனது சாதனையைத் தொடர்ந்துள்ளமை, குறிப்பாக சமூக பாதுகாப்பு சபையின் மாவட்ட பிரதேச உத்தியோகத்தர்கள், பிரதேச செயலாளர்கள் மற்றும் அனைத்து அரச உத்தியோகத்தர்களினதும் நிறுவன ரீதியான அர்ப்பணிப்பையும் பொறுப்புணர்வையும் வெளிப்படுத்துகின்றது எனவும் தெரிவித்தார். அதேவேளை, முல்லைத்தீவு, மன்னார், வவுனியா மற்றும் கிளிநொச்சி மாவட்டங்களும் தமது சனத்தொகை மற்றும் தேவைகளுக்கு ஏற்ப சமூக பாதுகாப்புச் சபையின் செயற்பாடுகளை சிறப்பாக முன்னெடுத்து வருகின்றன எனவும் அவர் பாராட்டுத் தெரிவித்தார். இத்தகைய விருது வழங்கும் நிகழ்வுகள் மாவட்ட அல்லது மாகாண மட்டத்தில் மாத்திரம் மட்டுப்படுத்தப்படாமல், தேசிய மட்டத்திலும் நடத்தப்பட்டு வடமாகாண அரச உத்தியோகத்தர்களின் அர்ப்பணிப்பான பணியும் சாதனைகளும் நாடளாவிய ரீதியில் கௌரவிக்கப்பட வேண்டும் எனவும் அரசாங்க அதிபர் கோரிக்கை விடுத்தார். மேலும், சமூக பாதுகாப்புச் சபையின் நோக்கமும் இத்தகைய விருது வழங்கும் நிகழ்வுகளின் நோக்கமும், மக்களுக்கான சேவை சரியான முறையில் வழங்கப்படுகின்றது என்பதையும், மக்கள் நலனை முன்னிறுத்தி அரச உத்தியோகத்தர்கள் அர்ப்பணிப்புடன் பணியாற்றுகின்றார்கள் என்பதையும் வெளிப்படுத்துவதாகும் எனவும் தெரிவித்தார். எமக்குக் கிடைக்கும் விருதுகளும் கௌரவங்களும் எமது உத்தியோகத்தர்களுக்கும், இந்தத் திட்டங்களின் பயனாளிகளான பொதுமக்களுக்கும் உரித்தானவை. விருதுகளைப் பெறுவது எமது இலக்காக இல்லாமல், அதன் மூலம் மக்களுக்கு அர்ப்பணிப்புடனும் நியாயத்துடனும் தேவையான சேவையை வழங்குவதே எமது பிரதான நோக்கமாக இருக்க வேண்டும் எனவும் அரசாங்க அதிபர் கேட்டுக்கொண்டார் .

சமூகப் பாதுகாப்புத் துறையில் சிறப்பாகப் பணியாற்றியவர்களுக்கான தேசிய விருதுகள் பல்வேறு அமர்வுகளில் வழங்கப்பட்டன. பணச்சேகரிப்பில் யாழ்ப்பாண மாவட்டம் தேசிய ரீதியில் முதலிடம் தேசிய ரீதியில் முன்னெடுக்கப்பட்ட பணச்சேகரிப்பு நடவடிக்கையின் அடிப்படையில் யாழ்ப்பாண மாவட்டம் முதலாம் இடத்தைப் பெற்றுள்ளது. இதனடிப்படையில், தேசிய மட்டத்தில் மேற்கொள்ளப்பட்ட பணச்சேகரிப்பில் சாவகச்சேரி பிரதேச செயலகம் முதலாம் இடத்தையும், கோப்பாய் பிரதேச செயலகம் மூன்றாம் இடத்தையும் பெற்றுள்ளன. மேலும், நல்லூர், பருத்தித்துறை, உடுவில், வேலணை, ஊர்காவற்றுறை, காரைநகர், கரவெட்டி, தெல்லிப்பழை, சங்கானை, சண்டிலிப்பாய் மற்றும் யாழ்ப்பாணம் ஆகிய பிரதேச செயலகங்கள் தேசிய விருதுக்கான தகுதியைப் பெற்று, இக்கௌரவிப்பு நிகழ்வில் கௌரவிக்கப்பட்டன. அத்துடன், தனிநபர் ரீதியிலான பணச்சேகரிப்பிலும் யாழ்ப்பாண மாவட்டத்தைச் சேர்ந்தவர்கள் தேசிய மட்டத்தில் சிறப்பிடங்களைப் பெற்றுள்ளனர். அதற்கமைய, கோப்பாய் பிரதேச செயலகத்தைச் சேர்ந்த திரு. கே. வர்ணதாஸ் முதலாம் இடத்தையும், சாவகச்சேரி பிரதேச செயலகத்தைச் சேர்ந்த திரு. ஆர். சுபேந்திரன் இரண்டாம் இடத்தையும், சண்டிலிப்பாய் பிரதேச செயலகத்தைச் சேர்ந்த திருமதி. கே. டர்ஷா மூன்றாம் இடத்தையும் பெற்றுள்ளனர். இச்சாதனையானது யாழ்ப்பாண மாவட்டத்தின் பிரதேச செயலகங்கள் மற்றும் உத்தியோகத்தர்கள் மக்கள் பங்களிப்புடன் மேற்கொண்ட பணச்சேகரிப்பு நடவடிக்கைகளின் சிறப்பான பெறுபேறாகக் குறிப்பிடத்தக்கதாகும். இதனைத் தொடர்ந்து கலை நிகழ்வுகளும் இடம்பெற்றன. இலங்கை சமூக பாதுகாப்பு சபையின் வடக்கு மற்றும் கிழக்கு மாகாணங்களின் சிரேஷ்ட இணைப்பதிகாரி திரு. பா. பிரதீபன், மேலதிக அரசங்க அதிபர்கள் ,சமுர்த்திப்பணிப்பாளர்கள், திட்டமிடல்பணிப்பாளர்கள், பிரதேச செயலர்கள், உதவிப் பிரதேச செயலர்கள், அபிவிருத்தி உத்தியோகத்தர்கள் , கிராம உத்தியோகத்தர்கள் , சமுர்த்தி அபிவிருத்தி உத்தியோகத்தர்கள்,உள்ளிட்டவர்கள் பங்குபற்றி சிறப்பித்தனர்.