யாழ்ப்பாண மாவட்ட உணவுப் பாதுகாப்பு குழுக் கூட்டம் அரசாங்க அதிபர் திரு மருதலிங்கம் பிரதீபன் மற்றும் வடக்கு மாகாண விவசாயம் கமநல சேவைகள், கால்நடை அபிவிருத்தி, நீர்ப்பாசனம், மீன்பிடி, நீர்வழங்கல் மற்றும் சுற்றாடல் அமைச்சின் செயலாளரும் மாவட்ட உணவுப் பாதுகாப்பு குழு இணைத்தலைவருமான திரு. எஸ். சிவசிறீ ஆகியோரின் இணைத் தலைமையிலும் மாவட்ட செயலக மாநாட்டு மண்டபத்தில் இன்றைய தினம் (13.12.2025) காலை 09.00 மணிக்கு நடைபெற்றது. இக் கலந்துரையாடலில் கருத்து தெரிவித்த மாவட்ட அரசாங்க அதிபர் அவர்கள், மாவட்ட ஒருங்கிணைப்பு குழுவின் நிரந்தர உப குழுக்களாக திட்டமிடல் குழு, உணவுப் பாதுகாப்பு குழு மற்றும் விலைநிர்ணய குழு ஆகிய குழுக்கள் உருவாக்கப்பட்டுள்ளதாகவும், அந்தவகையில் சுற்றுநிருபத்தின் பிரகாரம் அரசாங்க அதிபர் மற்றும் அந்தந்த மாகாணங்களின் விவசாய அமைச்சின் செயலாளர் ஆகியோரின் இணைத்தலைமையிலும் இக் கலந்துரையாடல் ஏற்பாடு செய்யப்பட்டதாகவும், யாழ்ப்பாண மாவட்டத்தின் பிரதான தொழிலாக விவசாயம், கால்நடை உற்பத்தி மற்றும் மீன்பிடி ஆகியன காணப்படுவதாகவும் தெரிவித்ததார். மேலும், அதனடிப்படையில் உணவுப்பாதுகாப்பு குழுவின் நோக்கங்களாக மாவட்டத்திலுள்ள மக்களின் உணவுப் பாதுகாப்பை உறுதி செய்வதற்காக, உணவு உற்பத்திகளை விநியோகித்தலை உறுதிப்படுத்தல், சந்தைப்படுத்தல், உட்கட்டமைப்பு வசதிகள் மற்றும் அணுகல் வசதிகளை விருத்தி செய்தல், சுத்தமான தண்ணீரை வழங்கல், சுகாதாரம், போசாக்கான உணவு மற்றும் ஊட்டச்சத்து உணவுகளுக்கான அணுகல் மற்றும் போஷாக்கு கல்வியை உறுதி செய்தல், காலநிலை மாற்றம், அனர்த்தங்கள்,பொருளாதார நெருக்கடிகளின் போது உணவு உற்பத்தி நிலைத்தன்மையை உறுதிப்படுத்தும் வகையில் திட்டங்களை தயாரித்தல்,செயற்படுத்தல் மற்றும் மேற்பார்வை செய்வதற்கான நோக்கங்களை அடிப்படையாகக் கொண்டு வரையறை தெளிவாக காட்டப்பட்டுள்ளதாக அரசாங்க அதிபர் தெரிவித்தார். மேலும், இதன்மூலம் ஒருவரின் போஷாக்கான, பாதுகாப்பான நச்சற்ற உணவு கிடைப்பதை உறுதிப்படுத்துவதற்காக இக்குழு அமைக்கப்பட்டுள்ளதாகவும் இக்குழுவிலுள்ள அனைவரும் ஒருங்கிணைந்து செயற்படல் மூலம் எமது மாவட்டத்தின் உணவுப்பாதுகாப்பை உறுதி செய்ய முடியுமென இணைத்தலைமை உரையில் அரசாங்க அதிபர் தெரிவித்தார்.

மாவட்ட சமுர்த்திப்பணிப்பாளராக கடமையாற்றி சாவகச்சேரி பிரதேச செயலாளராகஇடமாற்றம் பெற்றுச் சென்ற முன்னாள் மாவட்ட சமுர்த்திப்பணிப்பாள திரு பிரான்சிஸ் சந்திர சத்தியசோதி அவர்களுக்கான சேவைநலன் பாராட்டு விழா யாழ் மாவட்ட அரசாங்க அதிபர் திரு. மருதலிங்கம் பிரதீபன் அவர்கள் தலைமையில் இன்றைய தினம் (12.11.2025) பி. ப.12.15 மணிக்கு மாவட்ட செயலக கேட்போர் கூடத்தில் நடைபெற்றது. இந் நிகழ்வில் தலைமையுரையாற்றிய அரசாங்க அதிபர் அவர்கள், நெடுந்தீவு பிரதேச செயலாளராக கடமையாற்றிய போது தனது செயற்பாடுகளை மிகவும் சிறப்பாக ஆற்றியதாகவும் குறிப்பிட்டதுடன், சமுர்த்தித் திணைக்களம் மிகவும் சவால்கள் நிறைந்த நிர்வாகக் கட்டமைப்பாக காணப்பட்டபோதும் சிறப்பாக தமது சேவையினை திரு.எப்.சி. சத்தியசோதி அவர்கள் ஆற்றினார் எனவும், சிறந்த உத்தியோகத்தராக கடமையாற்றியுள்ளார் எனவும் எனக்குறிப்பிட்டார். சமுர்த்தி உத்தியோகத்தர்களின் சுயவிபரக் கோவைகளை உறுதிப்படுத்த உறுதுணையாக செயற்பட்டார் எனவும், இத் திணைக்களத்தில் தவறுகள் ஏற்படாமல் செயற்பட வேண்டும் என்பதில் முனைப்பாக செயற்பட்டவராகவும் கணக்காய்வு அறிக்கைகளை சிறப்பாக பேணியதாகவும் அரசாங்க அதிபர் குறிப்பிட்டார். மேலும், அனைவருடனும் நட்பு ரீதியாக எல்லோரோடும் ஒருங்கிணைந்து பழகும் குணம் கொண்டவராகவும் தலைமைத்துவ பண்பு கொண்டவராகவும் பிரதேச மட்டங்களிலும் சமுர்த்திக்கான வினைத்திறனான பங்களிப்பை வழங்கியுள்ளார் எனவும் தெரிவித்த அரசாங்க அதிபர் இவரின் பணி மென் மேலும் சிறக்க வாழ்த்துக்களை தெரிவித்துக்கொண்டார். இந்நிகழ்வில் மாவட்ட செயலக மேலதிக அரசாங்க அதிபர் திரு. கே. சிவகரன், மேலதிக அரசாங்க அதிபர் (காணி) திரு.பா.ஜெயகரன், பிரதம கணக்காளர் திரு. எஸ். கிருபாகரன் உள்ளிட்ட பதவிநிலை உத்தியோகத்தர்களால் வாழ்த்துரைகள் நிகழ்த்தப்பட்டது. வாழ்த்துரையினைத் தொடர்ந்து, திரு. பிரான்சிஸ் சந்திர சத்தியசோதி அவர்களுக்கு அரசாங்க அதிபரினால் பொன்னாடை அணிவித்து கௌரவிக்கப்பட்டு வாழ்த்துப்பாமாலை வழங்கப்பட்டது. இறுதியாக திரு திரு பிரான்சிஸ் சந்திர சத்தியசோதி அவர்களினால் ஏற்புரை நிகழ்த்தப்பட்டது. திரு பிரான்சிஸ் சந்திர சத்தியசோதி அவர்கள் 01.11.2023 ஆம் திகதி தொடக்கம் 31.08.2025 வரை மாவட்ட சமுர்திப்பணிப்பாளராக கடமையாற்றினார் என்பது குறிப்பிடத்தக்கது. இந் நிகழ்வில் மாவட்டச் செயலக பதவிநிலை உத்தியோகத்தர்கள், மாவட்ட சமுர்த்தி முகாமையாளர்கள், சமுர்த்தி உத்தியோகத்தர்கள் மற்றும் மாவட்டச் செயலக உத்தியோகத்தர்கள் கலந்துகொண்டனர்.

 

23வது ஆசிய விளையாட்டுப் போட்டியில் இலங்கை சார்பில் 01 தங்கம் மற்றும் 02 வெள்ளிப்பதக்கத்தினை வென்று சாதனை படைத்த மாவட்ட விளையாட்டு வீரா் திரு. செல்வராசா ரமணன் அவர்களை இன்றைய தினம் (13.11.2025) அரசாங்க அதிபர் அலுவலகத்தில் நடைபெற்ற கெளரவிப்பு நிகழ்வில் அரசாங்க அதிபர் திரு மருதலிங்கம் பிரதீபன் அவர்கள் பொன்னடை போர்த்தி மலர்மாலையிட்டு கௌரவித்தார். இவ் கெளரவிப்பு நிகழ்வில் கருத்து தெரிவித்த அரசாங்க அதபர் அவர்கள், 23வது ஆசிய விளையாட்டுப் போட்டியில் 3000 விளையாட்டு வீர வீராங்கனைகள் பங்குபற்றியிருந்ததாகவும், அதில் இலங்கையை சேர்ந்த 250 வீர வீராங்கனைகள் பங்குபற்றியிருந்ததாகவும் குறிப்பிட்டு, அதில் யாழ்ப்பாணத்தைச் சேர்ந்த ஒரேயொரு தமிழராக திரு. செல்வராசா ரமணன் பங்குபற்றி உயரம்பாய்தலில் தங்கப்பதக்கத்தை பெற்று சாதனை படைத்தமையுடன் முப்பாய்ச்சல் ,கோலூன்றிப்பாய்தல் போட்டிகளிலும் வெள்ளிப்பதக்கத்தை பெற்றுக்கொண்டமை பெருமகிழ்ச்சியை அளிப்பதாகவும் அதற்காக தமது வாழ்த்துக்களை தெரிவித்துக்கொண்டார். மேலும், இவ்வாறானதொரு பல்வேறு நாடுகள் பங்குபற்றியஆசியப் போட்டியில் வெற்றியீட்டுவது என்பது ஓர் கடினமான விடயம் எனவும், தான் ஒரு சர்வதேச விளையாட்டு வீரனாக இருப்பதுடன் இளம்சந்ததியினருக்கு நல்லதொரு நிலையை அடைய வேண்டும் என்ற நோக்கத்தில் யாழ்ப்பாண மாவட்டத்தில் விளையாட்டுத்துறை சாா்ந்த பயிற்சிகளை இலவசமாக பயிற்றுவித்து வரும் விளையாட்டு பயிற்சியாளராகவும் இருந்து வருகிறார் எனவும் அரசாங்க அதிபர் தெரிவித்து,மேலும் பல சர்வதேச போட்டிகளில் பங்குபற்றி மேன்மேலும் வெற்றிகளை பெற தனது வாழ்த்துக்களையும் தெரிவித்துக்கொண்டார். மேலும் அரசாங்க அதிபர் தெரிவிக்கையில், யாழ்ப்பாண மாவட்டத்தில் விளையாட்டு பயிற்சிகளில் ஈடுபடும் வீர வீராங்கனைகள் பல சவால்களை எதிர்நோக்குவதாகவும் அதற்கமைய அமைச்சரவைக் கூட்டத்தில் யாழ் மாவட்டத்தில் உள்ளக விளையாட்டரங்கு அமைப்பதற்காக ரூபா 170 மில்லியன் நிதி ஒதுக்கீடு இவ் வருடம் கிடைக்கப் பெற்றுள்ளதாகவும் அதற்கான முன்னேற்பாடுகள் இடம்பெற்றுக்கொண்டிருப்பதாகவும் தெரிவித்தார். இக் கௌரவிப்பு நிகழ்வில் மேலதிக அரசாங்க அதிபர் திரு. கே. சிவகரன் , மேலதிக அரசாங்க அதிபர் (காணி) திரு.பா.ஜெயகரன் பிரதம கணக்காளர் திரு. எஸ். கிருபாகரன் உள்ளிட்ட பதவிநிலை உத்தியோகத்தர்கள் கலந்து கொண்டதுடன் ஸ்புட்னிக் விளையாட்டுக்கழக வீரர்கள் மற்றும் மாவட்ட செயலக விளையாட்டு உத்தியோகத்தர்களும் கலந்து கொண்டனர்.

 

 

யாழ் மாவட்டத்தில் வறுமை ஒழிப்பு செயற்றிட்டங்களின் அமுலாக்கம் மற்றும் அவற்றின் விளைவுகளும், பிராந்திய ரீதியாக அபிவிருத்தி பிரச்சினைகள் தொடர்பான யாழ் பல்கலைக்கழக பொருளியல் துறை மாணவர்களுடனான அறிவு சார்ந்த அனுபவ பகிர்வு நிகழ்வு யாழ்ப்பாண மாவட்ட செயலக திட்டமிடல் பணிப்பளர் திரு.சுரேந்திரநாதன் அவர்கள் தலைமையில் யாழ்ப்பாண மாவட்ட அரசாங்க அதிபர் திரு.மருதலிங்கம் பிரதீபன் அவர்களின் பங்குபற்றுதலுடன் இன்றைய தினம் (12.11.2025) காலை 11.00 மணிக்கு மாவட்ட செயலக கேட்போர் கூடத்தில் நடைபெற்றது. யாழ் பல்கலைக்கழக பொருளியல் பீடத்தின் வேண்டுகோளுக்கிணங்க இலங்கை சுதந்திரமடைந்த (1948) காலப்பகுதிக்கு பின்னர் யாழ் மாவட்டத்தின் வறுமை ஒழிப்பு செயற்றிட்டத்தின் போக்குகள் தொடர்பிலான கலந்துரையாடலாக இக் கலந்துரையாடல் முன்னெடுக்கப்பட்டமை குறிப்பிடத்தக்கது. இக் கலந்துரையாடலில் கருத்து தெரிவித்த அரசாங்க அதிபர் அவர்கள், யாழ்ப்பாண மாவட்ட செயலகத்திற்கு வருகை தந்த விரிவுரையாளர்கள் மற்றும் பல்கலைக்கழக பொருளியல் பீட மாணவர்களை வரவேற்றதுடன், குறைந்த வயதில் பல்கலைக்கழகத்திற்குள் நுழைந்து இந்த பொருளியல் துறைசார்ந்த கல்வியை இளம் வயதில் பெற்றுக்கொள்ளக்கூடிய வாய்ப்பு மாணவர்களுக்கு கிடைத்துள்ளதாகவும் இதனை வினைத்திறனாகப் பயன்படுத்த வேண்டும் என்றும் குறிப்பிட்டதுடன், பொருளாதார ரீதியாக அல்லது பொருளியல் ரீதியாக இந்த கல்வியை கற்கின்ற போது வறுமையானது மிக முக்கியமான இடத்தை வகிப்பதாகவும், வறுமைச் சுட்டிகளை பலவாறு கற்றுக்கொண்டாலும் அதன் நடைமுறைகளை கவனத்தில் எடுக்க வேண்டும் எனவும், குறிப்பாக வறுமை என்பது ஒவ்வொருத்தருடைய சமூக பொருளாதார சூழல் என்ற அடிப்படையில் மாறுபடுவதுடன் நபருக்கு நபர் வேறுபடும் தன்மை கொண்டதாகவும் காணப்படுவதாகவும், யாழ்ப்பாண மாவட்டத்தில் சில பகுதிகளில் உள்ள மக்கள் பொருளாதார ரீதியில் வறுமையானர்களாக இருந்தாலும் சில விடயங்களில் வசதிவாய்ந்தவர்களாக உள்ளமையை அவதானிக்கக்கூடியதாகவுள்ளதாவும் குறிப்பிட்டார். மேலும்,