- ඔබ මෙතැනය:
-
මුල් පිටුව
- News
சர்வதேச மகளிர் தினத்தினை முன்னிட்டு - பெண் தொழில் முயற்சியாளர்களின் உற்பத்திப் பொருட்கள் கண்காட்சி மற்றும் விற்பனையும் யாழ்ப்பாண மாவட்ட அரசாங்க அதிபர் திரு மருதலிங்கம் பிரதீபன் அவர்கள் தலைமையில் இன்றைய தினம் (28.03.2025) காலை 09.30 மணிக்கு மாவட்டச் செயலக வளாகத்தில் நடைபெற்றது.
இந் நிகழ்வில் தலைமையுரையாற்றியஅரசாங்க அதிபர் அவர்கள், சர்வதேச மகளிர் தினத்தினை முன்னிட்டு மகளிர் தின நிகழ்வுடன் நின்று விடாது மாவட்டச் செயலக பெண்கள் பிரிவினால் மாவட்டச் செயலக பெண் உத்தியோகத்தர்களுக்கான யோகாசன வகுப்பு, மோட்டார் சைக்கிள் திருத்தும் பயிற்சி நடைபெற்றதன் தொடர்ச்சியாக இன்று பெண் தொழில் முயற்சியாளர்களின் உற்பத்திப் பொருட்கள் விற்பனையும் கண்காட்சியும் இடம் பெற்றுவருவதாகவும், பாலம் நிறுவனத்தின் அனுசரனையில் ஒவ்வொரு பிரதேச செயலாளர் பிரிவு ரீதியாக தெரிவு செய்யப்பட்ட 15 பெண் முயற்சியாளருக்கான வாழ்வாதார திட்டத்திற்காக மொத்தமாக ரூபா 15 இலட்சம் வழங்கப்படவுள்ளதும் சிறப்பான விடயம் எனக் குறிப்பிட்டார். மேலும், இன்றைய காலகட்டத்தில் அரசாங்க சேவைகளில் அதாவது நிர்வாக மட்டத்தில் மற்றும் பல்கலைக்கழகங்களிலும் பெண்கள் அதிகளவில் உள்ளதாகவும் இதன் மூலம் சமுதாய வளர்ச்சிக்கு பெண்கள் காத்திரமான பங்களிப்பினை வழங்கிவருவதாகவும், பெண்கள் முன்னோக்கிய நிலைமையில் வளர்ச்சி அடைந்து செல்வதாக குறிப்பிட்டதுடன், சர்வதேச ரீதியாகவும் மேம்பட்ட நிலைமையே காணப்படுகிறது எனவும் குறிப்பிட்டார். மேலும், பெண்களின் வேலைச் சுமைகளுக்கு மத்தியிலும், தற்போது பிள்ளை வளர்ப்பில் குறிப்பாக பிள்ளைகளின் கல்வியின் முன்னேற்றத்தில் தயார்மார்களின் அக்கறை மற்றும் பங்களிப்பு அதிகமாக காணப்படுகிறது எனவும் குறிப்பிட்டார். மேலும், எமது மாவட்டத்தின் பெண்கள் அபிவிருத்தியில் அனைவரும் ஒன்றிணைந்து செயற்பட வேண்டும் எனவும் கேட்டுக் கொண்டார்.
பிரதேச செயல ரீதியாக தெரிவு செய்யப்பட்ட பெண் தொழில் முயற்சியாளர்களின் வாழ்வாதாரத் திட்டத்திற்கான கொடுப்பனவு வழங்கப்பட்டதுடன், 40 ற்கு மேற்பட்ட பெண் முயற்சியாளர்களின் உற்பத்திப் பொருட்கள் காட்சிப்படுத்தப்பட்டு விற்பனையும் மாலை 04.00 மணி வரை நடைபெற்றது.
இந் நிகழ்வில் மேலதிக அரசாங்க அதிபர் (காணி), திட்டமிடல் பணிப்பாளர், காரைநகர் பிரதேச செயலாளர், உதவி மாவட்டச் செயலாளர், பிரதேச செயலகங்களைச் சேர்ந்த உதவிப் பிரதேச செயலாளர்கள், பாலம் நிறுவனத்தின் முகாமையாளர், வேல்ட் விஷன் திட்ட முகாமையாளர், Chrysali நிறுவன சிரேஸ்ட திட்ட இணைப்பாளர்,மாவட்ட பிரதி புள்ளிவிபர பணிப்பாளர், நிர்வாக உத்தியோகத்தர், மாவட்ட மற்றும் பிரதேச செயலக பெண்கள் அபிவிருத்தி உத்தியோகத்தர்கள் மற்றும் மாவட்டச் செயலக உத்தியோகத்தர்கள் பங்குபற்றினார்கள்.
பால்நிலை வன்முறை மற்றும் 1938,1929 உதவித் தொலைபேசி சேவைகள் தொடர்பாக அரசாங்க உத்தியோகத்தர்களுக்கான விழிப்புணர்வுச் செயலமர்வு மேலதிக அரசாங்க அதிபர் (காணி) திரு.க.ஸ்ரீமோகனன் அவர்கள் தலைமையில் இன்றைய தினம் (26.03.2025) காலை 09.30 மணிக்கு மாவட்டச் செயலக கேட்போர் கூடத்தில் நடைபெற்றது.
இச் செயலமர்வில் தலைமையுரையாற்றியமேலதிக அரசாங்க அதிபர் அவர்கள், எமது சமுதாயமானது கூட்டுக் குடும்ப வாழ்க்கையிலிருந்து விடுபட்டுக்கொண்டிருக்கிறது எனவும், கூட்டுக் குடும்ப வாழ்க்கை முறையில் தாய், தந்தை, பேரன், பேர்த்தி போன்ற குடும்ப அங்கத்தவர்களின் கண்காணிப்பு, காத்திரமான பாதுகாப்பு மற்றும் அன்பான கட்டளை இருந்ததால் சிறந்த குடும்பம் இருந்தது எனவும், தற்போது கூட்டுக்குடும்பம் வாழ்க்கை முறையில்லாமலிருப்பதும், குடும்பத்தில் அமைதியின்மை மற்றும் வன்முறைகள் இடம்பெற்றுவருவதாகவும் தெரிவித்ததுடன், இதற்கு தொழில்நுட்ப அதீத பாவனையும் கூட காரணமாக அமைந்துள்ளதாவும், எமது பண்பாடுகள் மற்றும் கலாசாரத்தினைவிட்டு நாம் விலகிச் செல்வதும் இதற்கு காரணமாக அமைவதாகவும் தெரிவித்தார். மேலும், அரசாங்க உத்தியோகத்தர்களுக்கான இவ் விழிப்புணர்வுச் செயற்பாட்டின் மூலம் சமுதாயத்தில் நடக்கும் பால்நிலை வன்முறைகளுக்கு எதிரான கருத்தினையும் அதற்கான 1938,1929 இலக்க உதவித் தொலைபேசி சேவைகளையும் அறிந்து கொள்ளவும் ஏனையவர்களுக்கு எடுத்துச் சொல்லவும் உதவும் எனத் தெரிவித்தார்.
இச் செயலமர்வானது மகளிர் மற்றும் சிறுவர் விவகார அமைச்சின் ஏற்பாட்டில் மாவட்ட பெண்கள் மற்றும் சிறுவர் பிரிவின் ஒழுங்கமைப்பில் நடைபெற்றது.
இச் செயலமர்வில் பெண்களுக்கு எதிரான வன்முறை தொடர்பாகவும், பால்நிலை வன்முறைகள் மற்றும் பாதுகாப்பு, சிறுவர்களுக்கு எதிராக வன்முறைகள் தொடர்பாகவும் மற்றும் பால்நிலை வன்முறைகள், குடும்ப வன்முறை மற்றும் பெண்கள் உரிமைகள் தொடர்பான சட்ட ஏற்பாடுகள் தொடர்பாக வளவாளர்கள் கருத்துரைகள் வழங்கினார்கள். இச் செயலமர்வில் வளவாளர்களாக யாழ்ப்பாணம் பல்கலைக்கழக மெய்யியல் மற்றும் உளவியல் துறையின் சிரேஷ்ட விரிவுரையாளர் திரு. ரி. திலீபன், சட்டப் பீடத் தலைவர் திருமதி கோசலை மதன், மகளிர் மற்றும் சிறுவர் விவகார அமைச்சின் உத்தியோகத்தர் திரு. ரி. ஜெகானந்தன் மற்றும் மாவட்ட உளவள உத்தியோகத்தர் திரு. பி. கோபி ஆகியோர் கருத்துரை வழங்கினார்கள்.
இச் செயலமர்வின் ஆரம்ப நிகழ்வில் உதவி மாவட்டச் செயலாளர் செல்வி உ.தா்சினி, மகளிர் மற்றும் சிறுவர் விவகார அமைச்சின் நிகழ்ச்சித் திட்ட இணைப்பாளர் திருமதி எம். ஏ. பி. மஞ்சரி, உளவளத் துணை உத்தியோகத்தர் திரு. எஸ். விஜயகுமார, அபிவிருத்தி உத்தியோகத்தர் திரு. ரி. ஜெகானந்தன் ஆகியோர் பங்குபற்றினார்கள் என்பது குறிப்பிடத்தக்கது.
யாழ்ப்பாண மாவட்ட சிறுவர் அபிவிருத்தி குழுவின் முதலாம் காலாண்டு குழுக் கூட்டமானது யாழ்ப்பாண மாவட்ட அரசாங்க அதிபர் திரு.மருதலிங்கம் பிரதீபன் அவர்களின் தலைமையில் இன்றைய தினம் (21.03.2025) பி.ப 2.00 மணிக்கு மாவட்டச் செயலக கேட்போர் கூடத்தில் நடைபெற்றது.
இக் கூட்டத்தில் அரசாங்க அதிபர் அவர்களால் பின்வரும் விடயங்கள் தெரிவிக்கப்படது.
1.அரசாங்கத்தால் ஓர் தாயின் கருவில் குழந்தை கருவுற்றதிலிருந்து அக்குழந்தை முதியவராகும்வரை அவர்களின் செயற்பாடுகளை கண்காணிப்பதற்காக பிரதேச செயலகங்களில் முன்பள்ளி பருவ அபிவிருத்தி உத்தியோகத்தர்கள் முதல் முதியோர் உரிமைமேம்பாட்டு உத்தியோகத்தர்கள் வரையான பல் வேறு தரப்பட்ட உத்தியோகத்தர்கள் நியமிக்கப்பட்டுள்ளனர். அவர்கள் தம் பணியை சிறப்பாக மேற்கொண்டு வருகின்றனர். எனினும் அவர்கள் மேலும் வினைத்திறனாக செயற்பட பிரதேச செயலாளர்கள் வழிப்படுத்த வேண்டும் என கேட்டுக் கொண்டார்.
2.மாவட்ட செயலகத்தில் எதிர்வரும் ஆனி 18 ஆம் திகதி பிறப்புப் பதிவு செய்யாத பிள்ளைகளுக்கான நடமாடும் சேவை நடைபெறவுள்ளதாவும் அதற்கு முன்பாக பருத்தித்துறை, கரவெட்டி, மருதங்கேணி ஆகிய பிரதேச செயலகங்களை உள்ளடக்கியதாக பிறப்புப் பதிவு செய்யாத பிள்ளைகளுக்கான நடமாடும் சேவை மே 16ஆம் திகதி பருத்தித்துறை பிரதேச செயலகத்தில் நடாத்துவற்கான ஏற்பாடுகளை மேற்கொள்ளுமாறு உரிய தரப்பினருக்கு அரசாங்க அதிபர் அவர்களால் அறிவுறுத்தப்பட்டது.
3.பிரதி வெள்ளிக்கிழமை மற்றும் ஞாயிற்றுக்கிழமைகளில் ஆண்டு 9 மற்றும் ஆண்டு 9 ற்கு கீழும் உள்ள பிள்ளைகளுக்கான அறநெறி வகுப்புக்கள், இணைப் பாடவிதானச் செயற்பாடுகள் மற்றும் ஒய்வுகளைக் கருதி தனியார் கல்வி நிறுவனங்களின் கல்விச் செயற்பாடுகளை நிறுத்திவைத்தல் என்ற தீர்மானத்திற்கு அமைய, பெற்றோர்கள் மற்றும் தனியார் கல்வி நிறுவன உரிமையாளர்களின் ஒத்துழைப்புடன் சீரான கட்டுப்பாட்டில் பேணுவதற்கு பிரதேச செயலக உத்தியோகத்தர்களின் கண்காணிப்பு அவசியம் எனத் தெரிவித்தார்.
4.ஊர்காவற்றுறை பொலிஸ் நிலையத்தில் பெண்கள் சிறுவர் பிரிவு இயங்காமல் உள்ளதாகவும், அதற்கான சேவைகள் முறைப்பாட்டுப் பிரிவுடன் இயங்குவதாகவும் கூட்டத்தில் பிரதேச செயலாளரால் சுட்டிக்காட்டப்பட்டதற்கு அமைய, உடனடியாக சிரேஷ்ட பொலிஸ் அத்தியட்சகருடன் தொடர்பு கொண்ட அரசாங்க அதிபர் சித்திரை மாதம் முதல் வாரத்திலிருந்து செயற்பட நடவடிக்கை எடுப்பதாக சிரேஷ்ட பொலிஸ் அத்தியட்சகர் தெரிவித்ததாக தெரிவிக்கப்பட்டு அதன் முன்னேற்றத்தினை பிரதேச செயலாளர் அறிக்கையிடுமாறும் கேட்டுக் கொண்டார்.
5.மாணவர்களின் இடைவிலகல் தொடர்பில் உடனுக்குடன் நடவடிக்கை எடுக்கப்பட்டுவருவதனை பாராட்டிய அரசாங்க அதிபர் அவர்கள் மேலும் வினைத்திறனாக செயற்படுமாறும் சம்பந்தப்பட்ட உத்தியோகத்தர்களைக் கேட்டுக் கொண்டார்.
6.பதிவு செய்யப்படாத பிள்ளைகளின் பிறப்புச் சான்றிதழ் தொடர்பாக சில பிறப்புச் சான்றிதழ்களை பதிவிடவே முடியாத நிலை நீடித்துவருவதற்கு ஓர் தீர்க்கமான முடிவு காணுமுகமாக மாவட்டச் செயலகத்தில் ஆனி மாதம் 18 ஆம் திகதி நடைபெறவுள்ள நடமாடும் சேவைக்கு முன்பதாக, ஆனி மாதம் முதலாம் திகதி அச் சிறுவர்களின் சகல விபரங்களையும் பிரதி பதிவாளர் நாயகத்திடம் கையளித்து, அதன் பிரதியினையும் தனக்கும் அனுப்பி வைக்குமாறும், நடமாடும் சேவையில் அப் பிள்ளைகளின் பிறப்புச் சான்றிதழை பதிவதற்கு சம்பந்தப்பட்ட திணைக்கள உத்தியோகத்தர்கள் பிரசன்னமும் இருத்தல் வேண்டும் எனவும் சம்பந்தப்பட்ட உத்தியோகத்தர்களுக்கு அரசாங்க அதிபரால் அறிவுறுத்தல் வழங்கப்பட்டது.
7.மாணவர்கள் பச்சை குத்தினால் பாடசாலைக்கு செல்லமுடியாது என்ற விழிப்புணர்வு செயற்பாட்டை மீண்டும் மாணவர்களுக்கு தெளிவுபடுத்த வலயக் கல்விப் பணிப்பாளர்கள் நடவடிக்கை எடுக்க வேண்டும் எனவும் தெரிவித்தார்.
8.தற்போது நடைபெற்றுக்கொண்டிருக்கும் க. பொ. த சாதாரணப் பரீட்சைக்கு தோற்றம் நகர்புற பாடசாலை மாணவர்கள் பரீட்சை நிறைவடைந்து வெளிவரும் போது அவர்களுக்கு இடையூறு செய்யும் வகையில் தனியார் கல்வி நிறுவனங்கள் துண்டுப் பிரசுரங்களை திணிப்பதாக கூட்டத்தில் தெரிவிக்கப்பட்டதற்கு அமைய, பொலிஸ் நடவடிக்கைக்கு ஆவன செய்வதாக அரசாங்க அதிபரால் தெரிவிக்கப்பட்டது.
9.யாழ்ப்பாணம், நல்லூர், மல்லாகம் மற்றும் பருத்தித்துறை ஆகிய பிரதேசத்தில் உள்ள சில தனியார் கல்வி நிறுவனங்களுக்கு முன்பதாக பெற்றோர்கள் கூடுதலாக தரித்து நிற்பதால் பொது மக்கள் போக்குவரத்திற்கு இடையூறு ஏற்படுவதாக கூட்டத்தில் சுட்டிக்காட்டப்பட்டதற்கு அமைய, போக்குவரத்து பொலிஸாரின் நடவடிக்கைக்காக ஆவன செய்வதாக அரசாங்க அதிபரால் தெரிவிக்கப்பட்டது.
10.தாய் தந்தை இழந்து பிள்ளைகளை பராமரிப்போருக்கு மாதாந்தக் கொடுப்பனவு மாகாணத்தால் 3000.00 ரூபா வழங்கப்படுவதாகவும், தொண்டு நிறுவனங்கள் 5000.00 ரூபா வழங்குவதாகவும் தெரிவித்த மாகாண சிறுவர் நன்னடத்தை ஆணையாளர் அவர்கள் பராமரிப்பாளர்கள் இக் கொடுப்பனவினை பெறுவதற்கு நீதிமன்ற கட்டளை பெறவேண்டும் எனவும் தெரிவித்தத்திற்கு அமைய, சம்பந்தப்பட்ட உத்தியோகத்தர்கள் இதற்கு பூரண ஒத்துழைப்பு வழங்குமாறு அரசாங்க அதிபரால் தெரிவிக்கப்பட்டடு, சிறுவர்கள் மற்றும் பெண்கள் அபிவிருத்திக்கு உறுதுணையாகவிருக்கும் சிறுவர்கள் மற்றும் பெண்கள் அபிவிருத்தி உத்தியோகத்தர்கள் தமக்குரிய சேவையினை வினைத்திறனாக வழங்குவதன் ஊடக தமது வாழ்க்கையிலும் சிறப்படைய முடியும் எனவும் அரசாங்க அதிபரால் தெரிவிக்கப்பட்டது.
இக் கலந்துரையாடலில், மாகாண சிறுவர் நன்னடத்தை ஆணையாளர், உதவி மாவட்ட செயலாளர், திட்டமிடல் பணிப்பாளர், பிரதேச செயலாளர்கள், உதவிப் பிரதேச செயலாளர்கள், வலயக் கல்விப் பணிப்பாளர்கள், மதுவரித்திணைக்கள உத்தியோகத்தர்கள், மாவட்ட செயலக மற்றும் பிரதேச செயலக சிறுவர் மேம்பாட்டு உத்தியோகத்தர்கள், சிறுவர் நன்னடத்தை உத்தியோகத்தர்கள், அரசசார்பற்ற நிறுவன பிரதிநிதிகள் உள்ளிட்ட பலர் கலந்து கொண்டனர்.
கச்சதீவு புனித அந்தோனியார் ஆலயத் திருவிழா கடமையாற்றிய நெடுந்தீவு பிரதேச செயலாளர் உள்ளிட்ட உத்தியோகத்தர்கள் இன்றைய தினம் (21.03.2025) அரசாங்க அதிபர் திரு.மருதலிங்கம் பிரதீபன் அவர்களால் கெளரவிக்கப்பட்டார்கள்.
இதன் போது கருத்து தெரிவித்த அரசாங்க அதிபர் அவர்கள், கடல்வழி போக்குவரத்து ஊடாக மேற்கொள்ளப்பட்ட திருவிழா ஒழுங்கமைப்பிற்கும் அங்கு நான்கு நாட்கள் தங்கியிருந்து அர்ப்பணிப்புடன் கடமையாற்றிய நெடுந்தீவு பிரேதச செயலாளர் உள்ளிட்ட உத்தியோகத்தர்களை ஊக்கப்படுத்துகின்ற செயற்பாடாக இது அமையும் எனவும், அந்தவகையில் நெந்தீவு பிரதேச செயலாளர், கணக்காளர் உள்ளிட்ட உத்தியோகத்தர்களுக்கு தமது நன்றியினைத் தெரிவித்தார். இச் சந்தர்ப்பத்தில் கடற்படையிரின் ஒத்துழைப்பு சிறப்பாக அமைந்திருந்தனையும் குறிப்பிட்டதுடன், இந்திய துணைத் தூதரக அதிகாரிகள், பொலிஸ் உத்தியோகத்தர்கள், நெடுந்தீவு பிரதேச சபையினர், வேலணை பிரதேச செயலக உத்தியோகத்தர்கள், போக்குவரத்து மற்றும் சுகாதாரத் துறை உத்தியோகத்தர்களின் ஒத்துழைப்பிற்கும் தமது நன்றியினைத் தெரிவித்தார்.
மேலும், மேலதிக அரசாங்க அதிபர் (காணி), பிரதம கணக்காளர், உதவி மாவட்டச் செயலாளர், அனர்த்த முகாமைத்துவ பிரதிப்பணிப்பாளர் உள்ளிட்ட உத்தியோகத்தர்களின் பங்களிப்பிற்கும் தமது நன்றியினை அரசாங்க அதிபர் தெரிவித்தார்.
நெடுந்தீவு பிரதேச செயலாளர் உள்ளிட்ட உத்தியோகத்தர்களுக்கு அரசாங்க அதிபர் அலுவர்களினால் மெச்சுரை வழங்கப்பட்டது.
இந் நிகழ்வில் பிரதம கணக்காளர், பிரதம உள்ளகக் கணக்காய்வாளர், உதவி மாவட்டச் செயலாளர், அனர்த்த முகாமைத்துவ பிரதிப்பணிப்பாளர், நெடுந்தீவு பிரதேச செயலாளர், கணக்காளர் மற்றும் உத்தியோகத்தர்கள் கலந்துகொண்டனர்.
பெண்களுக்கான மோட்டாா் சைக்கிள் பழுது பாா்க்கும் பயிற்சி நிகழ்வு
சர்வதேச மகளிர் தினத்தினை முன்னிட்டு மாவட்டச் செயலக பெண் உத்தியோகத்தர்களுக்கான மோட்டாா் சைக்கிள் பழுது பாா்க்கும் பயிற்சி நிகழ்வு
யாழ்ப்பாண மாவட்ட அரசாங்க அதிபர் திரு மருதலிங்கம் பிரதீபன் அவர்கள் தலைமையில் இன்றைய தினம் (21.03.2025) காலை 10.30 மணி தொடக்கம் 12.30 மணிவரை மாவட்டச் செயலக மாநாட்டு மண்டபத்தில் நடைபெற்றது.
இதன்போது தலைமையுரையாற்றிய அரசாங்க அதிபர் அவர்கள், தற்போதைய காலகட்டத்தில் பெண்களின் வளர்ச்சியில் பாரிய பங்காற்றுவதில் மோட்டாா் சைக்கிள் முக்கியமானதாக மாறிவிட்டது எனவும், ஏனைய மாவட்டங்களை விட யாழ்ப்பாண மாவட்டத்தில் மோட்டாா் சைக்கிள் பயன்படுத்துவோரில் பெண்களே அதிகமாகக் காணப்படுவதாகவும் தெரிவித்தாா். மேலும், இது தொடர்பிலாக ஓரளவு தெளிவு இருந்தாலும் இந்த மோட்டாா் சைக்கிள் பழுது பாா்த்தல் தொழில்நுட்ப பயிற்சி தொடர்பாக மேலதிக தெளிவுகளை முழுமையாக பெற்றுக்கொள்ள இவ்வாறான சந்தர்ப்பங்களை வினைத்திறனாக பயன்படுத்தி பயன்பெற வேண்டும் என்றும் தெரிவித்தார்.
பெண்களுக்கான மோட்டாா் சைக்கிள் உதிரிப்பாகங்கள், தினசரி பாதுகாப்பு முறை, பரிசோதனை முறை, காலத்திற்கேற்ப பராமரிப்பு, மாற்றங்களால் ஏற்படும் பாதிப்பு எரிபொருள் மீதப்படுத்தல் என்பன தொடர்பாக விளக்கமளிக்கப்பட்டது.
இச் செயலமர்வில் உதவி மாவட்ட செயலாளர் , டேவிட் பீரிஸ் நிறுவனத்தின் ஆலோசகர் மற்றும் குழுமத்தினர், மாவட்ட பெண்கள் அபிவிருத்தி இணைப்பாளர் மற்றும் மாவட்ட செயலக பெண் உத்தியோகத்தர்களும் கலந்து கொண்டனர்.
