வட பிராந்திய கடற்படைத்தளபதி திரு.காஞ்சன பானகொட அவர்கள் கிழக்கு பிராந்திய கடற்படைத் தளபதியாக இடமாற்றம் பெற்றுச் செல்வதனை முன்னிட்டு யாழ்ப்பாண மாவட்ட பதில் அரசாங்க அதிபர் திரு.மருதலிங்கம் பிரதீபன் அவர்களை இன்றையதினம் (10.05.2024) யாழ் மாவட்ட செயலகத்தில் சந்தித்து கலந்துரையாடினார்.

யாழ்ப்பாண மாவட்ட விவசாய குழுக் கூட்டம் மாவட்ட பதில் அரசாங்க அதிபர் திரு.மருதலிங்கம் பிரதீபன் அவர்கள் தலைமையில் யாழ் மாவட்ட செயலக கேட்போர் கூடத்தில் 30.04.2024 காலை 9.30 மணிக்கு நடைபெற்றது.

மாவட்ட விவசாயம் சார்ந்த பிரச்சினைகளை இனங்கணல் மற்றும் மாவட்ட விவசாயிகள் எதிர்நோக்கும் பிரச்சினைகள் தொடர்பாக கலந்துரையாடி அவற்றிற்கு தீர்வுகண்டு மாவட்ட விவசாயத்தை மேம்படுத்தும் நோக்கில் இக் கூட்டம் ஒழுங்குபடுத்தப்பட்டுள்ளது.

பிரதேச மட்ட விவசாய கூட்டத்தில் எடுக்கப்பட்ட தீர்மானங்களின் மேலதிக தீர்மானங்கள் குறித்தும் பிரதேச செயலாளர்களால் கலந்துரையாடப்பட்டது.

கடந்த வருடம் நடைமுறைப்படுத்தப்பட்ட விவசாய நவீன மயப்படுத்தல் திட்டம் குறித்தும் விவசாய நவீன மயப்படுத்தலினால் எதிர்கொண்ட நன்மை மற்றும் சவால்கள் குறித்தும்,
தற்போது அதிகரித்து வரும் தென்னை மரத்தை பாதிக்கும் வெண் ஈ தாக்கம் குறித்தும் அதனை கட்டுப்படுத்தும் செயற்றிட்டங்கள் குறித்தும், விவசாய துறையின் புள்ளிவிபரங்களை துல்லியமாக மேற்கொள்ளல் குறித்தும் கலந்துரையாடப்பட்டது.

இதன்போது யாழ் பல்கலைக்கழக கிளிநொச்சி வளாக சிரேஷ்ட விரிவுரையாளர் திரு.அரசகேசரி,மாவட்ட விவசாய பணிப்பாளர், பிரதேச செயலாளர்கள், கமநல அபிவிருத்தி ஆணையாளர், கால்நடை வளர்ப்பு அபிவிருத்தி ஆணையாளர், அனர்த்த முகாமைத்து பிரிவின் பிரதிப் பணிப்பாளர், மீன்பிடி உதவிப் பணிப்பாளர், நீர்ப்பாசன பொறியியலாளர், மாவட்ட புள்ளிவிபரவியலாளர், விவசாய அமைப்புக்களின் பிரதிநிதிகள், வங்கி மற்றும் காப்புறுதி சேவை வழங்குநர்கள் உள்ளிட்ட பலர் கலந்துகொண்டனர்.

உணவு பாதுகாப்பு தொடர்பான செயலமர்வு யாழ் மாவட்ட பதில் அரசாங்க அதிபர் மருதலிங்கம் பிரதீபன் அவர்கள் தலைமையில் மாவட்ட செயலக மாநாட்டு மண்டபத்தில் 30.04.2024 காலை, மதியம் என இரு அமர்வுகளாக நடைபெற்றது.

இதன்போது கருத்து தெரிவித்த மாவட்ட பதில் அரசாங்க அதிபர் திரு.மருதலிங்கம் பிரதீபன் அவர்கள் இலங்கையில் முதன் முதலில் எமது மாவட்டத்திலேயே உணவு பாதுகாப்பு தொடர்பான திட்டம் நடைமுறைப்படுத்தப்பட்டதாக குறிப்பிட்டார்.

உணவு பாதுகாப்பு தொடர்பாக புள்ளி விவரங்களை சேகரித்து வைத்திருப்பதன் மூலம் எமது மாவட்டத்தில் உணவு பாதுகாப்பில் பின்தங்கிய கிராமம் மற்றும் போசனையற்ற உணவு பழக்கவழக்கமுள்ள பிரதேசத்தை இனங்கண்டு அதற்கான நடவடிக்கைகளை மேற்கொள்ள முடியும்.

உணவு பாதுகாப்பு தொடர்பான திட்டங்களை மேற்கொள்ள உத்தியோகத்தர்களாகிய உங்களின் ஒத்துழைப்பு அவசியம் தேவை என்றும் பதில் அரசாங்க அதிபர் இதன்போது தெரிவித்தார்.

இதன்போது ஜனாதிபதியின் உணவு பாதுகாப்பு ஆலோசகர் திரு.Dr.Buddagoda, உலக உணவு திட்ட அதிகாரிகள் திரு. நியூமத் மற்றும் திரு. அபேஷ், மாவட்ட செயலக பிரதி திட்டமிடல் பணிப்பாளர், பிரதேச செயலாளர்கள், மாவட்ட செயலக பதவிநிலை உத்தியோகத்தர்கள், பிரதேச செயலக உதவி திட்டமிடல் பணிப்பாளர்கள், அபிவிருத்தி உத்தியோகத்தர்கள், புள்ளிவிபர திணைக்கள உத்தியோகத்தர்கள், மாவட்ட செயலக உத்தியோகத்தர்கள் உள்ளிட்ட பலர் கலந்து கொண்டனர்.