- இருக்குமிடம்:
-
முகப்பு
- News
வடமாகாண சுகாதார சேவைகளை மேலும் வலுப்படுத்தும் நோக்கில், சாவகச்சேரி ஆதார வைத்தியசாலையில் 336 மில்லியன் ரூபா பெறுமதியான மருந்துக் களஞ்சியம், பணியாளர் குடியிருப்பு வளாகம் மற்றும் உட்கட்டமைப்பு வசதிகளை மேம்படுத்தும் திட்டங்களுக்கான அடிக்கல் நாட்டும் நிகழ்வு இன்று (19.09.2026) சனிக்கிழமை முற்பகல் 11.00 மணியளவில் வைத்தியசாலை வளாகத்தில் நடைபெற்றது. சுகாதார மற்றும் வெகுசன ஊடகத்துறை அமைச்சர் கௌரவ மருத்துவர் நளிந்த ஜயதிஸ்ஸ அவர்கள் பிரதம அதிதியாகக் கலந்து கொண்டு, அபிவிருத்தித் திட்டங்களுக்கான அடிக்கல்லை நாட்டி வைத்து அவற்றை உத்தியோகபூர்வமாக ஆரம்பித்து வைத்தார். இதன்போது கெளரவ அமைச்சர் மரக்கன்றொன்றையும் நாட்டி வைத்தார். மேலும், 282.52 மில்லியன் ரூபா செலவில் மருந்துக் களஞ்சியம் மற்றும் பணியாளர் குடியிருப்பு வளாகம் நிர்மாணிக்கப்படவுள்ளது. இதன் நிர்மாணப் பணிகள் 2027ஆம் ஆண்டு ஓகஸ்ட் மாதத்தில் நிறைவு செய்ய திட்டமிடப்பட்டுள்ளது. அதேவேளை, 53 மில்லியன் ரூபா செலவில் வைத்தியசாலையின் மின்தூக்கி மற்றும் ஏனைய உட்கட்டமைப்பு வசதிகளை மேம்படுத்தும் திட்டம் முன்னெடுக்கப்பட்டு வருவதுடன், அதன் பணிகள் 2027ஆம் ஆண்டு மே மாதத்தில் நிறைவு செய்ய திட்டமிடப்பட்டுள்ளது.
இதனைத் தொடர்ந்து, வைத்தியசாலையின் விடுதிகளுக்கு கண்காணிப்பு விஜயம் மேற்கொண்ட அமைச்சர், வைத்தியசாலையின் தற்போதைய செயற்பாடுகள், உட்கட்டமைப்பு வசதிகள் மற்றும் எதிர்காலத் தேவைகள் தொடர்பில் அதிகாரிகளிடம் கேட்டறிந்து கொண்டார். தொடர்ந்து மருத்துவ நிபுணர்கள், மருத்துவர்கள் மற்றும் தாதிய உத்தியோகத்தர்களுடனான கலந்துரையாடலும் அமைச்சர் தலைமையில் நடைபெற்றது. இதன்போது வைத்தியசாலையின் சேவைகளை மேலும் வலுப்படுத்துவதற்கான தேவைகள், மனித மற்றும் பௌதீக வளத் தேவைகள், தொழில்சார் சிக்கல்கள் உள்ளிட்ட பல்வேறு விடயங்கள் தொடர்பில் கருத்துக்கள் பரிமாறப்பட்டன. இதன்போது, 2017ஆம் ஆண்டுக்குப் பின்னர் மேற்கொள்ளப்படாத சுகாதார சேவையின் உத்தியோகபூர்வ ஆளணி மீளாய்வு (Cadre Revision) பணிகளை இந்த ஆண்டிற்குள் நிறைவு செய்ய எதிர்பார்ப்பதாக கெளரவ அமைச்சர் தெரிவித்தார். மேலும், வடமாகாணத்திற்கு புதிதாக நியமிக்கப்பட்டுள்ள 350 சுகாதாரப் பணி உதவியாளர்களில் 10 பேரை சாவகச்சேரி ஆதார வைத்தியசாலைக்கு வழங்குவதற்கான நடவடிக்கைகள் மேற்கொள்ளப்படும் என்றும் அமைச்சர் தெரிவித்தார்.
அத்துடன், யாழ்ப்பாணம் போதனா வைத்தியசாலையில் நிலவும் நோயாளர் நெரிசலுக்கு தற்காலிகத் தீர்வாக, அதன் தாதியர் மற்றும் மகப்பேற்றுப் பிரிவு சேவைகளில் ஒரு பகுதியை கிளிநொச்சி மற்றும் சாவகச்சேரி வைத்தியசாலைகளில் தற்காலிகமாக முன்னெடுப்பதற்கான நடவடிக்கைகள் மேற்கொள்ளப்படும் என்றும் அமைச்சர் குறிப்பிட்டார். இந்நிகழ்வில் பாராளுமன்ற உறுப்பினர் வைத்திய கலாநிதி கௌரவ எஸ். ஸ்ரீ பவானந்தராஜா, வடக்கு மாகாண பிரதம செயலாளர் திருமதி தனுஜா முருகேசன், யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன், ஆளுநர் செயலாளர் திரு. சத்தியசீலன், வடக்கு மாகாண சுகாதார அமைச்சின் செயலாளர் திருமதி ப. ஜெயராணி, வடக்கு மாகாண சுகாதார சேவைகள் பணிப்பாளர் வைத்திய கலாநிதி வி.பி.எஸ்.டி. பத்திரண, சாவகச்சேரி பிரதேச செயலாளர், யாழ்ப்பாணம் பிராந்திய சுகாதார சேவைகள் பணிப்பாளர், யாழ்ப்பாண மாவட்ட ஒருங்கிணைப்புக் குழுவின் இணைப்பாளர், சாவகச்சேரி ஆதார வைத்தியசாலையின் அத்தியட்சகர், துறைசார் அரச அதிகாரிகள், மருத்துவ நிபுணர்கள், மருத்துவர்கள், தாதிய உத்தியோகத்தர்கள், சுகாதார சேவை உதவியாளர்கள், நோயாளர் நலன்புரிச் சங்கத்தின் பிரதிநிதிகள் உள்ளிட்ட பல்வேறு தரப்பினரும் கலந்து கொண்டனர்.
யாழ்ப்பாணம், கைதடியில் ரூ.28 மில்லியன் செலவில் நவீன வசதிகளுடன் நிர்மாணிக்கப்பட்ட புதிய தபால் நிலையம் இன்று(19.09.2026) காலை உத்தியோகபூர்வமாக மக்கள் பயன்பாட்டுக்காக திறந்து வைக்கப்பட்டது. சுகாதார மற்றும் வெகுஜன ஊடக அமைச்சர் வைத்திய கலாநிதி கெளரவ நளிந்த ஜயதிஸ்ஸ அவர்கள் பிரதம விருந்தினராகக் கலந்து கொண்டு குறித்த புதிய தபால் நிலையக் கட்டடத்தை உத்தியோகபூர்வமாக திறந்து வைத்தார். கடந்த 2025ஆம் ஆண்டு ஒக்டோபர் 02ஆம் திகதி கடற்றொழில், நீரியல் மற்றும் கடல் வளங்கள் அமைச்சரும் யாழ்ப்பாண மாவட்ட ஒருங்கிணைப்புக் குழுவின் தலைவருமான கெளரவ இராமலிங்கம் சந்திரசேகரன் அவர்களின் பங்கேற்புடன் அடிக்கல் நாட்டப்பட்டு நிர்மாணப் பணிகள் ஆரம்பிக்கப்பட்டன. இந் நிலையில், 11 மாதங்களுக்குள் கட்டுமானப் பணிகள் நிறைவுசெய்யப்பட்டு புதிய தபால் நிலையம் மக்கள் பயன்பாட்டுக்காக திறந்து வைக்கப்பட்டுள்ளமை குறிப்பிடத்தக்கது. கைதடி பிரதேசத்தில் வசித்த அமரர் ஆறுமுகம் சூரியகுமார் தபால் நிலையம் அமைப்பதற்காக காணியை வழங்குவதற்கு இணக்கம் தெரிவித்திருந்த நிலையில், அவரது மனைவி சூரியகுமார் தயாபரி மற்றும் பிள்ளைகளான சூரியகுமார் ரமணன், சூரியகுமார் மயூரன் ஆகியோரால் கடந்த வருடம் காணி அன்பளிப்பாக வழங்கப்பட்டது. நிகழ்வில் அமைச்சர் உள்ளிட்ட அதிதிகள் வரவேற்கப்பட்டதைத் தொடர்ந்து, அமைச்சர் நளிந்த ஜயதிஸ்ஸ அவர்களால் நினைவுக்கல் திரைநீக்கம் செய்யப்பட்டு, நாடா வெட்டப்பட்டு தபால் நிலையம் உத்தியோகபூர்வமாக திறந்து வைக்கப்பட்டது.
தொடர்ந்து தபால் நிலையத்தின் பணிகளும் உத்தியோகபூர்வமாக ஆரம்பித்து வைக்கப்பட்டன. அமரர் ஆறுமுகம் சூரியகுமாரின் சேவையை நினைவுகூரும் வகையில், தபால் திணைக்களத்தின் முத்திரைப் பணியகத்தின் யாழ்ப்பாண உப அலுவலகத்தினால் வெளியிடப்பட்ட தனிப்பயனாக்கப்பட்ட முத்திரைத்தாள் நினைவுச் சின்னமாக அவரது மனைவி மற்றும் இளைய மகனிடம் அமைச்சர் நளிந்த ஜயதிஸ்ஸ அவர்களால் வழங்கிக் கௌரவிக்கப்பட்டனர். இந் நிகழ்வில் யாழ்ப்பாண மாவட்ட பாராளுமன்ற உறுப்பினர் வைத்தியர் கெளரவ எஸ்.ஸ்ரீ பவானந்தராஜா, யாழ்ப்பாண மாவட்ட அரசாங்க அதிபர் மருதலிங்கம் பிரதீபன், பிரதேச சபை கெளரவ தவிசாளர், தபால் திணைக்களத்தின் பிரதி தபால் மா அதிபர்களான துஷித ஹுலங்கமுவ மற்றும் ஹேமசந்திர ஹேரத், வடமாகாண பிரதி தபால் மா அதிபர் கே. நிவேதிகா, யாழ்ப்பாண பிராந்திய தபால் அத்தியட்சகர் கே. செந்தில் குமார், சாவகச்சேரி பிரதேச செயலாளர் திரு F. C. சத்தியசோதி, யாழ்ப்பாண மாவட்ட ஒருங்கிணைப்புக் குழுவின் இணைப்பாளர் திரு எஸ் கபிலன், உள்ளிட்ட தபால் திணைக்கள அதிகாரிகள், கைதடி தபால் நிலைய ஊழியர்கள் மற்றும் பிரதேச மக்கள் எனப் பலரும் கலந்து கொண்டனர். நவீன வசதிகளுடன் நிர்மாணிக்கப்பட்டுள்ள இப்புதிய தபால் நிலையத்தின் ஊடாக, கைதடி மற்றும் அதனைச் சூழவுள்ள பகுதிகளில் வாழும் மக்களுக்கு மேலும் மேம்படுத்தப்பட்ட தபால் சேவைகளைப் பெற்றுக்கொள்ளும் வாய்ப்பு ஏற்படுத்தப்பட்டுள்ளமை குறிப்பிடத்தக்கது.
வடமாகாண பண்பாட்டலுவல்கள் அலகின் அனுசரணையுடன், வலிகாமம் மேற்கு பிரதேச செயலகமும் பிரதேச கலாசாரப் பேரவையும் இணைந்து நடத்திய “தமிழின் பாரம்பரியம் – நம் பெருமை” எனும் தொனிப்பொருளிலான பண்பாட்டுப் பெருவிழா இன்றைய தினம் (18.09.2026) வெள்ளிக்கிழமை யா/சுழிபுரம் விக்ரோறியாக் கல்லூரி மண்டபத்தில் சிறப்பாக நடைபெற்றது. நிகழ்விற்கு வலிகாமம் மேற்கு பிரதேச செயலாளரும் பிரதேச கலாசாரப் பேரவைத் தலைவருமான திருமதி கவிதா உதயகுமார் தலைமை தாங்கினார். யாழ்ப்பாண மாவட்ட அரசாங்க அதிபர் திரு. மருதலிங்கம் பிரதீபன் பிரதம அதிதியாகவும், வடக்கு மாகாண பண்பாட்டலுவல்கள் அலகின் பிரதிப் பணிப்பாளர் திருமதி தர்சினி நிதர்ஷன் சிறப்பு அதிதியாகவும் கலந்து சிறப்பித்தனர். நிகழ்வில் மாவட்டச் செயலக சிரேஷ்ட கலாசார உத்தியோகத்தர் திருமதி மாலினி கிருஸ்ணானந்தன், யா/சுழிபுரம் விக்ரோறியாக் கல்லூரி அதிபர் திருமதி கணேசமூர்த்தி சுலபாமதி, தொல்புரம் மிருதங்கக் கலைஞர் கலாபூஷணம் திரு. மாரிமுத்து சிதம்பரநாதன் ஆகியோர் கெளரவ விருந்தினர்களாக கலந்து கொண்டனர்.
பிரதம விருந்தினர் உரை :
பிரதம விருந்தினராக கலந்து கொண்ட அரசாங்க அதிபர் திரு.மருதலிங்கம் பிரதீபன் அவர்கள், அழிந்து வரும் கலைகளைப் பாதுகாத்து, எமது தமிழர்களின் பாரம்பரிய கலை, கலாசார விழுமியங்களை அடுத்த தலைமுறைக்கு கடத்துவது அனைவரினதும் பொறுப்பு என தெரிவித்தார். சுழிபுரம் மேற்கு பெரிய புலோ கிராமத்தில் ஆலய வழிபாட்டுடன் ஆரம்பிக்கப்பட்ட இவ்விழா, கிராம மக்களின் முழுமையான பங்கேற்புடன் முன்னெடுக்கப்பட்டமை சிறப்பானதாகும் எனக் குறிப்பிட்ட அரசாங்க அதிபர், ஒரு பிரதேச செயலகத்தின் நிகழ்வாக மட்டுமன்றி, கிராம மக்கள் தங்களுடைய சொந்த நிகழ்வாக இதனை முன்னெடுத்தமை பாராட்டுக்குரியது எனத் தெரிவித்தார். மேலும், பெரிய புலோ முதல் விழா நடைபெற்ற இடம் வரையான பயணத்தின்போது வீதியின் இருமருங்கிலும் பொதுமக்கள், இளைஞர்கள் மற்றும் பல்வேறு தரப்பினரும் ஆர்வத்துடன் பங்கேற்றமை, பண்பாட்டு விழா மக்கள் மத்தியில் எவ்வாறு கொண்டு செல்லப்பட வேண்டும் என்பதற்கான சிறந்த எடுத்துக்காட்டாக அமைந்துள்ளது எனவும குறிப்பிட்டார். “ஒரு பண்பாட்டு விழா மேடைக்குள் மட்டும் மட்டுப்படுத்தப்படக்கூடாது. அது மக்களிடம் சென்று, கிராமங்களின் கலை, கலாசாரம் மற்றும் பாரம்பரியங்களை வெளிப்படுத்த வேண்டும்” என அரசாங்க அதிபர் வலியுறுத்தினார்.
பிரதேசத்தின் இயற்கை வளங்களான பனை, தென்னை உள்ளிட்டவற்றை பயன்படுத்தி அமைக்கப்பட்ட மேடை அலங்காரங்கள், பாரம்பரிய இசைக்கருவிகள், ஊர்திகள், ஆடல் மற்றும் இசை நிகழ்வுகள் என விழாவின் ஒவ்வொரு அம்சமும் தமிழர்களின் பண்பாட்டு மரபுகளை வெளிப்படுத்தியதாக பாராட்டினார். மேலும், பல்வேறு கிராமங்களைச் சேர்ந்தவர்கள், இளைஞர்கள், பொதுமக்கள் மற்றும் பல்வேறு வயதினரை ஒன்றிணைத்து விழா நடத்தப்பட்டமை அதன் முக்கியமான வெற்றியாகும் எனவும் தெரிவித்தார். விழாவில் முன்னாள் பிரதி கல்விப் பணிப்பாளர் சங்கீதபூஷணம் அமரர் எஸ். கணபதிப்பிள்ளை நினைவுகூரப்பட்டமையும், பிரதேச செயலக சமூர்த்தி உத்தியோகத்தர் அமரர் தர்சன் அவர்களின் சமூக மற்றும் கலை, கலாசாரப் பணிகள் பாராட்டப்பட்டு அவரது குடும்பத்தினர் கௌரவிக்கப்பட்டமையும் பண்பாட்டு விழுமியங்களை மதிக்கும் சிறந்த செயற்பாடுகள் என அரசாங்க அதிபர் குறிப்பிட்டார். எமது முன்னோர்களிடமிருந்து கிடைத்த கலை, கலாசார பாரம்பரியங்களைப் பாதுகாப்பதுடன் அவற்றை அடுத்த தலைமுறைக்கு எடுத்துச் செல்ல வேண்டிய பொறுப்பு எமக்கு உள்ளது. இதற்காக இத்தகைய பண்பாட்டு விழாக்கள் தொடர்ந்து பல்வேறு கிராமங்களில் நடத்தப்பட வேண்டும் எனவும் அவர் தெரிவித்தார். வலிகாமம் மேற்கு பிரதேசத்தின் நகர்ப்புற மற்றும் கிராமப்புற மக்களை கலை, கலாசாரத்தின் ஊடாக ஒன்றிணைத்துள்ள இவ்விழா மாவட்டத்தில் நடைபெற்ற சிறப்பான பண்பாட்டு விழாக்களில் ஒன்றாக அமைந்துள்ளதாகவும் அரசாங்க அதிபர் பாராட்டுத் தெரிவித்தார்.
நிகழ்வுகள் :
இந் நிகழ்வு சுழிபுரம் மேற்கு பெரிய புலோ கிராமத்திலிருந்து பண்பாட்டு ஊர்வலத்துடன் ஆரம்பமானது. தொடர்ந்து விருந்தினர்கள் வரவேற்கப்பட்டனர். அதனைத் தொடர்ந்து மங்கல விளக்கேற்றல் இடம்பெற்று, இறை வணக்கத்துடன் நிகழ்வுகள் முறைப்படி ஆரம்பமானது. பெரியோர்களின் ஆசியுரையைத் தொடர்ந்து, யா/வட்டு இந்துக் கல்லூரி மாணவர்களின் தமிழ்த்தாய் வாழ்த்துடன் அரங்கம் தெய்வீகமாகியது. பிரதேச செயலக உத்தியோகத்தர்களால் பேரவை கீதம் இசைக்கப்பட்டதைத் தொடர்ந்து, செயற்குழு உறுப்பினர் திருமதி நாகராணி சீதரன் அவர்கள் அரங்குத் திறப்புரையை நிகழ்த்தினார். தொடர்ந்து யா/விக்ரோரியாக் கல்லூரி மாணவர்களின் வரவேற்பு நடனம் அனைவரையும் கவரும் வகையில் அமைந்திருந்தது. இதனையடுத்து செயற்குழு உறுப்பினர் திருமதி சிறிதேவி கண்ணதாசன் அவர்கள் வரவேற்புரை ஆற்றினார். அடுத்ததாக யா/வட்டு இந்துக் கல்லூரி மாணவர்களால் கிராமிய பாடல் பாடப்பட்டது. இதனைத் தொடர்ந்து பிரதேச செயலாளரும் கலாசாரப் பேரவை தலைவருமான திருமதி கவிதா உதயகுமார் அவர்கள் தலைமையுரை ஆற்றினார். நிகழ்வின் சிறப்பு அம்சமாக பொன்னாலை சந்திர பரத கலாலய மாணவர்களின் 'முரளீதர கௌரத்துவம்' எனும் பரத நாட்டிய நிகழ்வு இடம்பெற்றது. இதனைத் தொடர்ந்து சிறப்பு விருந்தினர் உரை இடம்பெற்றதுடன், கலைத்துறையில் சாதனை படைத்த கலைஞர்களை கௌரவிக்கும் வகையில் 'கலை வாரிதி' விருது வழங்கல் நிகழ்வு இடம்பெற்றது. அதனைத் தொடர்ந்து பதஞ்சலி கேத்திரா மாணவர்களின் 'சண்முகார்ப்பணம்' நாட்டிய நிகழ்வு அரங்கேற்றப்பட்டது. தொடர்ந்து இளம் கலைஞர்களை ஊக்குவிக்கும் வகையில் 'இளம் கலைஞர் விருது' வழங்கல் இடம்பெற்றது. இதனையடுத்து பிரதம விருந்தினர் உரை இடம்பெற்றது.
நிகழ்வின் இறுதி அம்சமாக முத்தமிழ் கலை மன்ற கலைஞர்களால் 'இனாவணேஸ்வரன் கூத்து' மிகவும் சிறப்பாக ஆடப்பட்டு அனைவரின் பாராட்டையும் பெற்றது. இறுதியாக நன்றியுரையுடன் விழா இனிதே நிறைவடைந்தது. தமிழ் கலாசாரம் – நம் அடையாளம் என்ற உணர்வை வலியுறுத்தும் வகையில் நடைபெற்ற இப்பண்பாட்டுப் பெருவிழா, தமிழர்களின் பாரம்பரிய கலை, பண்பாடு மற்றும் மரபுகளை அடுத்த தலைமுறையினரிடம் கொண்டு செல்லும் முக்கிய நிகழ்வாக அமைந்தது. இந் நிகழ்வில் கலைஞர்கள், பொதுமக்கள், மாணவர்கள், அரச உத்தியோகத்தர்கள் மற்றும் கலா ரசிகர்கள் என ஏராளமானோர் கலந்துகொண்டனர்.
“அத்தம” நிகழ்ச்சித் திட்டத்துடன் இணைந்த வகையில் - சர்வதேச கரையோரத் தூய்மைப்படுத்தல் தினத்தை முன்னிட்டு (19 செப்டம்பர்) , யாழ்ப்பாணம் பண்ணைக் கடற்கரையைத் தூய்மைப்படுத்தும் மாவட்ட நிகழ்வு இன்று யாழ். மாவட்ட அரசாங்க அதிபர் திரு. மருதலிங்கம் பிரதீபன் அவர்கள் தலைமையில் மிகச் சிறப்பாக நடைபெற்றது. இந் நிகழ்வில் தலைமை உரையாற்றிய யாழ். மாவட்ட அரசாங்க அதிபர் திரு. மருதலிங்கம் பிரதீபன் அவர்கள், அதிமேதகு ஜனாதிபதி அவர்களின் எண்ணக்கருவில் உருவாக்கப்பட்ட “அத்தம” வேலைத்திட்டத்தின் ஒரு அங்கமாகவும், சர்வதேச கடற்கரைத் தூய்மைப்படுத்தல் தினத்தை முன்னிட்டு யாழ்ப்பாண மாவட்டத்தில் முன்னெடுக்கப்படும் கடற்கரைத் தூய்மைப்படுத்தும் நடவடிக்கை அமைந்துள்ளதாக தெரிவித்தார். யாழ்ப்பாண மாவட்டத்தில் 36 கிராம அலுவலர் பிரிவுகளை உள்ளடக்கிய 28 கிலோமீற்றர் நீளமான கடற்கரைப் பகுதி இத்திட்டத்தின் கீழ் தூய்மைப்படுத்தப்படவுள்ளதாக அவர் தெரிவித்தார். தூய்மையான கடற்கரை, ஆரோக்கியமான கடல் வாழ்வுகள், நிலையான எதிர்காலம்" எனும் கருப்பொருளின் கீழ், யாழ்ப்பாண மாவட்டச் செயலகம், கடல்சார் சுற்றுச்சூழல் பாதுகாப்பு அதிகாரசபையின் (MEPA) கொகமர்சியல் வங்கி, முப்படையினர் மற்றும் பொலிஸார் உள்ளிட்ட பல்வேறு தரப்பினரின் ஒருங்கிணைப்பில் இந் நிகழ்ச்சித் திட்டம் முன்னெடுக்கப்படுவதாகவும் அரசாங்க அதிபர் குறிப்பிட்டார். கடற்கரைகளை தூய்மைப்படுத்துவது மட்டுமன்றி, மக்கள் மத்தியில் சுற்றுச்சூழல் பாதுகாப்பு மற்றும் கழிவு முகாமைத்துவம் தொடர்பான விழிப்புணர்வை ஏற்படுத்துவதும் இத்திட்டத்தின் முக்கிய நோக்கமாக அமைய வேண்டும் என அவர் வலியுறுத்தினார்.
பொதுமக்கள் கடற்கரைகளில் கழிவுகளை வீசுவதும், பின்னர் அவற்றை தொடர்ச்சியாக தூய்மைப்படுத்துவதுமான நிலை நீடிக்கக் கூடாது. கழிவுகளை முறையாக அகற்றுவது தொடர்பில் மக்களிடையே விழிப்புணர்வு ஏற்படுத்தப்படாவிட்டால், தூய்மைப்படுத்தும் நிகழ்ச்சிகள் வெறும் தொடர்ச்சியான நிகழ்வுகளாகவே மாறிவிடும்” என அரசாங்க அதிபர் தெரிவித்தார். “இன்று எமது கண்ணுக்கெட்டிய தூரம் வரை பிளாஸ்டிக், பொலித்தீன் உள்ளிட்ட பல்வேறு கழிவுகள் காணப்படுகின்றன. இந்நிலையை மாற்றுவதற்கு தேசிய ரீதியில் மக்கள் மத்தியில் விழிப்புணர்வை ஏற்படுத்துவது மற்றும் மாணவர்களுக்கு கழிவு முகாமைத்துவத்தின் விழிப்புணர்வு அவசியம்” எனவும் அவர் மேலும் தெரிவித்தார். இந்நிகழ்வில் யாழ். மாவட்ட மேலதிக அரசாங்க அதிபர் திரு. கே. சிவகரன், உதவி மாவட்டச் செயலாளர் செல்வி உ தர்சினி, கொமர்ஷல் வங்கியின் வட பிராந்திய முகாமையாளர் திரு. R. கஜதீபன் மற்றும் கடல்சார் சுற்றுச்சூழல் பாதுகாப்பு அதிகார சபையின் (MEPA) மாவட்ட ஒருங்கிணைப்பாளரும் கடல் சுற்றுச் சூழலாளருமான திரு. M. கேசவன் ஆகியோர் கலந்துகொண்டு கொண்டனர். இப்பாரிய தூய்மைப்படுத்தல் பணியில் இலங்கை கடற்றொழில் பல்கலைக்கழகம் (Ocean University of Sri Lanka), கடல்சார் சுற்றுச்சூழல் பாதுகாப்பு அதிகாரசபை (MEPA), மத்திய சுற்றாடல் அதிகாரசபை (CEA), கொமர்ஷல் வங்கியின் ஊழியர்கள், இராணுவம் மற்றும் கடற்படைப் பிரிவினர், சிவில் சமூக அமைப்புகள், அரச உத்தியோகத்தர்கள் மற்றும் பொதுமக்கள் எனப் பல தரப்பினரும் ஆர்வத்துடன் இணைந்து பண்ணைக் கடற்கரைப் பகுதிகளைத் தூய்மைப்படுத்தினர்.
இதேவேளை, அத்தம நிகழ்ச்சித் திட்டத்தின் கீழ் நாவாந்துறை தெற்கு கரையோரப் பகுதி சுத்தப்படுத்தல்! சனாதிபதி செயலகத்தின் அறிவுறுத்தலுக்கு அமைவாக முன்னெடுக்கப்படும் “அத்தம” நிகழ்ச்சித் திட்டத்தின் செப்டம்பர் மாதத்திற்கான மாவட்ட நிகழ்வு இன்று (19.09.2026) நாவாந்துறை தெற்கு J/84 கிராம சேவையாளர் பிரிவுக்குட்பட்ட இறங்குதுறை ஆண்டிய கரையோரப் பகுதியில் நடைபெற்றது. இதன்போது கரையோரப் பகுதி தூய்மைப்படுத்தப்பட்டதுடன், அரசாங்க அதிபர், மேலதிக அரசாங்க அதிபர், பிரதேச செயலாளர், பிரதி திட்டமிடல் பணிப்பாளர், கடற்றொழில் மற்றும் கூட்டுறவு சங்கங்களின் பிரதிநிதிகள், பொதுமக்கள் உள்ளிட்ட பலரும் கலந்து கொண்டு தூய்மைப் பணிகளில் ஈடுபட்டனர். கரையோரச் சூழலைப் பாதுகாத்து தூய்மையாகப் பேணுவதற்கும், பொதுமக்களிடையே சுற்றுச்சூழல் பாதுகாப்பு தொடர்பான விழிப்புணர்வை ஏற்படுத்துவதற்கும் இந் நிகழ்வு முக்கியத்துவம் பெற்றதாக அமைந்தது.
அரச திணைக்களங்களில் மேம்பட்ட டிஜிட்டல் ஊடகங்களைப் பயன்படுத்தி மும்மொழிச் சேவை வழங்கலை மேலும் வினைத்திறனுடனும் இலகுவாகவும் முன்னெடுப்பதற்கான பயிற்சிப் பட்டறை யாழ்ப்பாண மாவட்ட அரசாங்க அதிபர் திரு மருதலிங்கம் பிரதீபன் அவர்களின் தலைமையில் இன்றைய தினம் (17.09.2026) யாழ்ப்பாண மாவட்டச் செயலக கேட்போர் கூடத்தில் நடைபெற்றது. இந் நிகழ்வில் நீதி மற்றும் தேசிய ஒருங்கிணைப்பு அமைச்சின் தேசிய ஒருங்கிணைப்பு மற்றும் மொழிகள் பிரிவின் மேலதிக செயலாளர் திருமதி மதுமதி வசந்தகுமார், நிர்வாக அலுவலர் திருமதி A.A.F. நதிமியா, திட்ட அலுவலர் திருமதி Gnananie Wickramasinghe உள்ளிட்ட அதிகாரிகளும் கலந்துகொண்டனர். செயலமர்வின் ஆரம்ப நிகழ்வில் தலைமையுரையாற்றிய அரசாங்க அதிபர் அவர்கள், அரசாங்கத்தின் முக்கிய கொள்கை முன்னுரிமைகளில் டிஜிட்டல் பமயமாக்கலும் ஒன்றாகும். அரச சேவையை நவீனமயப்படுத்தி, பொதுமக்களுக்கு விரைவானதும் இலகுவானதுமான சேவைகளை வழங்குவதற்கு டிஜிட்டல் தொழில்நுட்பத்தை முழுமையாகப் பயன்படுத்துவது அவசியம் எனத் தெரிவித்தார். மேலும், தற்போது பல அரச நிறுவனங்களில் டிஜிட்டல் நடைமுறைகள் அறிமுகப்படுத்தப்பட்டுள்ள போதிலும், அவற்றுடன் பழைய கையேடு நடைமுறைகளும் தொடர்கின்றன. டிஜிட்டல் மயமாக்கலை முழுமையாக நடைமுறைப்படுத்துவதற்கு புதிய தொழில்நுட்பத்தின் மீது நம்பிக்கை கொண்டு, தேவையற்ற பழைய நடைமுறைகளை படிப்படியாகக் கைவிட வேண்டும் என குறிப்பிட்டார்.
பிறப்புச் சான்றிதழ், கடவுச்சீட்டு சேவை, காணி சேவைகள், வாகன வரி செலுத்துதல் மற்றும் வங்கிச் சேவைகள் உள்ளிட்ட பல துறைகளில் டிஜிட்டல் மயமாக்கல் ஏற்கனவே மக்களுக்கு பயனளித்து வருவதாகவும் சுட்டிக்காட்டினார். மேலும், தொழில்நுட்பம் வேகமாக வளர்ந்து வரும் நிலையில், அரச நிறுவனங்களின் இலத்திரனியல் உபகரணங்கள், பணியாளர்களின் டிஜிட்டல் அறிவு மற்றும் தொழில்நுட்பத் திறன்கள் காலத்திற்கேற்ப மேம்படுத்தப்பட வேண்டும் எனத் தெரிவித்தார். செயற்கை நுண்ணறிவு உள்ளிட்ட புதிய தொழில்நுட்பங்களை அரச உத்தியோகத்தர்கள் புரிந்துகொண்டு, அவற்றை அரச சேவையின் வினைத்திறனை அதிகரிக்கப் பயன்படுத்த வேண்டும். இந்தப் பயிற்சியில் பங்கேற்கும் உத்தியோகத்தர்கள் பெற்றுக்கொள்ளும் அறிவை தமது அலுவலகங்களிலுள்ள ஏனைய உத்தியோகத்தர்களுடனும் பகிர்ந்து, அரசாங்கத்தின் டிஜிட்டல் மயமாக்கல் கொள்கையை நிறுவன மட்டத்தில் வலுப்படுத்த வேண்டும் என அரசாங்க அதிபர் கேட்டுக்கொண்டார்.
பயிற்சி பட்டறை :
யாழ்ப்பாண மாவட்டச் செயலகம் மற்றும் யாழ்ப்பாண மாவட்டத்திலுள்ள பிரதேச செயலகங்களில் பணியாற்றும் அலுவலர்கள் இப்பயிற்சிப் பட்டறையில் கலந்துகொண்டனர். அரச சேவைகளை டிஜிட்டல் மயமாக்கி, சுமார் 80% அரச சேவைகளை மக்கள் கைபேசி ஊடாக வீட்டிலிருந்தே பெற்றுக்கொள்ளும் வகையில் புதிய டிஜிட்டல் கட்டமைப்பு உருவாக்கப்படவுள்ளது. இதற்கமைவாக, அரச சேவையின் நவீனமயமாக்கல், டிஜிட்டல் மாற்றம் மற்றும் அனைத்து மக்களுக்கும் சமமான முறையில் அரச சேவைகளை வழங்குதல் ஆகிய நோக்கங்களை அடிப்படையாகக் கொண்டு இப்பயிற்சிப் பட்டறை முன்னெடுக்கப்பட்டது. பயிற்சிப் பட்டறையில் “நல்லாட்சிக்கான செயற்கை நுண்ணறிவு (AI)” உள்ளிட்ட மேம்பட்ட டிஜிட்டல் ஊடகங்களின் பயன்பாடு தொடர்பில் விரிவான விளக்கங்கள் வழங்கப்பட்டன. மேலும், டிஜிட்டல் ஊடகம் தொடர்பான பொதுக் கணினி விழிப்புணர்வு, மும்மொழி Google Forms உருவாக்குதல், மொழிபெயர்ப்பு கருவிகளின் பயன்பாடு, Mail Merge உள்ளிட்ட நடைமுறைப் பயன்பாடுகள் தொடர்பிலும் அலுவலர்களுக்கு பயிற்சிகள் வழங்கப்பட்டன.
இப் பயிற்சிகளை திரு. சமிச அபேசிங்க, நிறுவனர் மற்றும் பிரதம நிறைவேற்று அதிகாரி (CEO), Idasara Digital (Pvt) Ltd மற்றும் ஜனாதிபதி செயலகத்தின் AI தொழில்நுட்பத்திற்கான சிரேஷ்ட ஆலோசகர், அத்துடன் திரு. தங்கராஜ் தவரூபன், பிரதம நிறைவேற்று அதிகாரி (CEO), Speed IT Net (Pvt) Ltd மற்றும் Govtech Sri Lanka வளவாளர் ஆகியோர் வழங்கினர். இறுதியில் கேள்வி–பதில் மற்றும் கருத்துப் பரிமாற்ற அமர்வு இடம்பெற்றதுடன், அரச நிறுவனங்களில் டிஜிட்டல் தொழில்நுட்பத்தைப் பயன்படுத்தி மும்மொழிச் சேவை வழங்கலை மேலும் வலுப்படுத்துவதற்கான நடைமுறை அணுகுமுறைகள் தொடர்பிலும் கலந்துரையாடப்பட்டது.
