இலங்கையின் 75 வது சுதந்திர தின நிகழ்வு தொடர்பான ஆரம்பகட்ட கலந்துரையாடல் யாழ் மாவட்ட அரசாங்க அதிபர் கணபதிப்பிள்ளை மகேசன் அவர்களின் தலைமையில் (28.12.2022) காலை 10.00 மணிக்கு யாழ்மாவட்ட செயலகத்தில் இடம்பெற்றது.
மாண்புமிகு ஜனாதிபதி ரணில் விக்கிரமசிங்க அவர்களின் பங்குபற்றலுடன் இலங்கையின் 75 வது சுதந்திர தின தேசிய நிகழ்வை ஒட்டிய நிகழ்வுகளை இம் முறை யாழ்ப்பாணத்தில் அமைக்கப்பட்ட இந்திய கலாசார மண்டபத்தில் ஜனவரி மாதம் 11ம் திகதி நடாத்தப்படுவதற்கான முன்னேற்பாடுகள் தொடர்பாக கலந்துரையாடப்பட்டன.

உத்தியோகத்தர்களுக்கான CBR வலுவூட்டல்திறன் விருத்தி பயிற்சி நெறியின் ஆரம்ப நிகழ்வு யாழ்ப்பாண மாவட்ட செயலக உதவி மாவட்ட செயலாளர் எஸ்.சி.என். கமலராஜன் அவர்களின் தலைமையில் 27.12.2022 காலை 9.00 மணிக்கு மாவட்ட முகாமைத்துவ திறன் அபிவிருத்தி பயிற்சி நிலையத்தில் நடைபெற்றது.
fairmed நிறுவனத்தின் நிதி அனுசரணையில் உத்தியோகத்தர்களை சமூக மட்டத்திலான புனர்வாழ்வு நிகழ்ச்சி திட்டங்களை வெற்றிகரமாக முன்னெடுத்துச் செல்லும் வகையில் இப்பயிற்சி இடம்பெற்றது. அத்துடன் இப்பயிற்சி நெறியானது மூன்று நாள் பயிற்சி நெறியாக 27.12.2022 ஆம் திகதி தொடக்கம் 29.12.2022 திகதி வரை நடைபெறவுள்ளமை குறிப்பிடத்தக்கது.
இந் நிகழ்வில் பிரதம விருந்தினராக மாவட்ட மேலதிக அரசாங்க அதிபர் திரு. மருதலிங்கம் பிரதீபன் கலந்து கொண்டு கருத்துத் தெரிவிக்கும்போது "அரச உத்தியோகத்தர்களிடம் அறிவு மற்றும் அனுபவங்கள் காணப்படுகிறது. இச் செயலமர்வு மூலம் அரச உத்தியோகத்தர்களின் திறன்களை வளர்த்துக் கொள்ளமுடிவதோடு, பாதிக்கப்பட்ட பொதுமக்களுக்கு சிறப்பான சேவைகளை வழங்கமுடியும் ஏனெனில் பொதுமக்களின் எதிர்பார்ப்பும் அதுவாகவே காணப்படுகிறது எனவும் தெரிவித்தார்.

யாழ்ப்பாண மாவட்டச் செயலக புள்ளிவிபரப்பிரிவின் பிரதிப் பணிப்பாளர் பாலசுந்தரம் பாலச்சந்திரன் அவர்களின் 36வருட அரச சேவையின் பணிஓய்வு பிரிவுபசார வைபவம் நேற்றையதினம் (26.12.2022) மாவட்டச் செயலக மாநாட்டு மண்டபத்தில் நடைபெற்றது.
இந் நிகழ்வில் அரசாங்க அதிபர், மேலதிக அரசாங்க அதிபர், பிரதம கணக்காளர், தொகைமதிப்பு புள்ளிவிபர திணைக்கள பிரதிப்பணிப்பாளர்கள், புள்ளிவிபரவியலாளர்கள், புள்ளிவிபர உத்தியோகத்தர்கள், மற்றும் யாழ் மாவட்ட புள்ளிவிபர பிரிவின் உத்தியோகத்தர்கள் கலந்து கொண்டனர்.

மாவட்ட மட்ட சுகாதார மேம்பாட்டுக் குழு கூட்டம் யாழ்.மாவட்ட மேலதிக அரசாங்க அதிபர் மருதலிங்கம் பிரதீபன் தலைமையில் யாழ் மாவட்ட செயலக கேட்போர் கூடத்தில் (27.12.2022) 1.30 மணியளவில் நடைபெற்றது.
இதன்போது தற்போது சடுதியாக அதிகரித்துவரும் டெங்கு நோய் பரவலை கட்டுப்படுத்துவதற்கு மேற்கொள்ளவேண்டிய நடவடிக்கைகள் தொடர்பாக கலந்துரையாடப்பட்டது.கடந்த 10 வருடங்களுடன் ஒப்பிடுகையில் இந்த வருடம் (2022) டெங்கு நோயினால் இறந்தவர்களின் எண்ணிக்கை சடுதியாக அதிகரித்துள்ளதாக யாழ் பிராந்திய சுகாதார சேவைகள் வைத்திய அதிகாரி ஆ. கேதீஸ்வரன் தெரிவித்துள்ளார்.
இந்த வருடம் டெங்கு நோய் தாக்கத்திற்குள்ளானவர்களாக 3294 பேர் பதிவாகியுள்ளதுடன் 09 இறப்புக்களும் பதிவாகியுள்ளன.தற்போது பருவப்பெயர்ச்சி மழை காலம் என்பதால் டெங்கு நோய் பரவல் அதிகமாகவுள்ளது, இதனை கட்டுப்படுத்தும் நடவடிக்கைகளை உடனடியாக மேற்கொள்ள வேண்டும் என்றும் குறிப்பிட்டார்.யாழ் மாவட்டத்தில் எதிர்வரும் ஜனவரி மாதம் 3,4,5 ஆம் திகதிகளை விசேட டெங்கு ஒழிப்பு தினங்களாக அறிவித்து டெங்கு ஒழிப்பு நடவடிக்கைகள் மேற்கொள்ளப்படவுள்ளதாகவும் சுகாதார வைத்திய அதிகாரி குறிப்பிட்டார்.

யாழ்.மாவட்டச் செயலக மாவட்ட அனர்த்த முகாமைத்துவ பிரிவின் ஏற்பாட்டில் அனர்த்த முகாமைத்துவ பிரிவின் உதவிப் பணிப்பாளர் சி.என். சூரியராஜா தலைமையில் தேசிய பாதுகாப்பு தின நிகழ்வு (26.12.2022) காலை 9 மணிக்கு மாவட்ட செயலக கேட்போர் கூடத்தில் அனுஷ்டிக்கப்பட்டது.
இந்நிகழ்விற்கு பிரதமவிருந்தினராக மாவட்ட அரசாங்க அதிபர் கணபதிப்பிள்ளை மகேசன் அவர்களும் சிறப்பு விருந்தினராக மேலதிக அரசாங்க அதிபர் மருதலிங்கம் பிரதீபன் அவர்களும் கலந்து கொண்டிருந்தார்கள். அத்தோடு , சர்வமத தலைவர்கள் பிரதம கணக்காளர், திட்டமிடல் பணிப்பாளர், சமுர்த்தி கணக்காளர் மற்றும் மாவட்ட செயலக உத்தியோகத்தர்கள் ஆகியோரும் கலந்துகொண்டிருந்தனர்.
இத் தேசிய பாதுகாப்பு தினத்தில் 2004.12.26 ஆம் திகதி சுனாமி ஆழிப்பேரலையால் மரணமடைந்த உறவுகளுக்காக ஆத்மசாந்திப் பிரார்த்தனை இடம்பெற்றது

  1. வறுமைக்கு உட்பட்ட பெண்களுக்கான உலருணவுப்பொதி வழங்கும் நிகழ்வு
  2. யாழ்ப்பாண மாவட்ட சிறுவர் அபிவிருத்திக் குழுக் கூட்டம்
  3. கைத்தொழில் அபிவிருத்தி சபையின் செழிப்பான தேசத்தை உருவாக்குவதற்கு தயார்ப்படுத்தலும் ஆரம்பித்தலும் என்னும் தேசிய நிகழ்ச்சித்திட்ட முன்வைத்தல் தொடர்பான கலந்துரையாடல்
  4. தேசிய உற்பத்தித்திறன் போட்டியில் யாழ்ப்பாண மாவட்ட செயலகம் முதலாம் இடத்தைப் பெற்றுக் கொண்டமைக்கான கௌரவிப்பு விழா.