- ඔබ මෙතැනය:
-
මුල් පිටුව
- News
சனாதிபதி செயலகத்தின் அனுசரணையில் யாழ்ப்பாண மாவட்ட செயலகமும் ஊர்காவற்துறை பிரதேச செயலகமும் இணைந்து நடாத்தும் நடமாடும் சேவையானது பிரதேச செயலாளர் திருமதி. வனஜா செல்வரட்ணம் அவர்களின் தலைமையில், யாழ்ப்பாண மாவட்ட அரசாங்க அதிபர் திரு மருதலிங்கம் பிரதீபன் அவர்களின் பங்குபற்றுதலுடன் இன்றைய தினம் (23.12.2025) மு.ப 09.00 மணிக்கு அனலைதீவு சதாசிவ மகாவித்தியாலயத்தில் நடைபெற்றது. இவ் நடமாடும் சேவையில் உரையாற்றிய அரசாங்க அதிபர் சனாதிபதி செயலகத்தின் ஏற்பாட்டில் நாடளாவிய ரீதியாக நடைபெற்றுக் கொண்டிருக்கும் கிளீன் ஸ்ரீலங்கா வேலைத்திட்டத்தின் இவ்வருடத்திற்குரிய இறுதி நிகழ்வாக இவ் நிகழ்வு அமைந்துள்ளதாகவும் யாழ்ப்பாண மாவட்டத்திற்குரிய பல பிரதேச செயலாளர் பிரிவுகளை உள்ளடக்கிய வகையில் இச் செயற்றிட்டம் முன்னெடுக்கப்பட்டிருந்தது எனவும், குறிப்பாக தீவுப்பகுதி நோக்கிய பயணம் வெற்றியளிக்கக்கூடிய ஒன்றாக இருப்பதாகவும் தீவுப் பகுதியில் கடமையாற்றும் பிரதேச செயலாளர்கள் முழுமையாக ஒத்துழைப்பை வழங்கியதன் அடிப்படையில் இவ் வேலைத்திட்டத்தை சிறப்பாக முன்னெடுக்க முடிந்ததாகவும் தெரிவித்தார். மேலும், தீவுப்பகுதி மக்களின் தேவைப்பாடுகளை பூர்த்தி செய்வதற்குரிய செயற்பாடுகளை முன்னெடுக்க வேண்டியவர்களாக இருக்கின்றோம் எனவும், இலங்கையிலேயே கடல்கடந்த பிரதேசங்களையும் கொண்ட மாவட்டமாக எமது மாவட்டம் காணப்படுகிறது எனவும், குறிப்பாக நெடுந்தீவு, எழுவைதீவு, நயினாதீவு மற்றும் அனலைதீவு மக்கள் பல்வேறுபட்ட அடிப்படைத் தேவைப்பாடுகளை உடையவர்களாக காணப்படுகின்றனர் எனவும் அரசாங்க அதிபர் தெரிவித்தார். மேலும், இப் பிரதேசத்தை சேர்ந்த பலர் புலம்பெயர்ந்த பிரதேசத்தில் நல்ல நிலைமைகளில் வாழ்ந்துகொண்டிருக்கின்றார்கள் எனவும், இப் பிரதேசத்தை சேர்ந்த பலர் தங்களின் விடாமுயற்சி, அயராத உழைப்பின் பயனாக பொருளாதார ரீதியாக பலம் பொருந்தியவர்களாக இருக்கின்றனர் எனவும், இப் பாடசாலையில் கல்வி கற்கும் மாணவர்கள் பொருத்தமான தளபாடம் மின்மை, பொருத்தமான ஆசிரிய ஆளணி வளமின்மை என பல பிரச்சினைகளை எதிர்நோக்குகின்றனர் எனவும், ஒரு மனிதனை முழு மனிதனாக ஆக்கும் கல்விச்சாலைகள் முன்னேற்றப்பபட வேண்டியவை எனவும், ஆதலால் புலம்பெயர்ந்த நாடுகளில் வசிப்பவர்கள் இதற்கான தமது அர்ப்பணிப்பை மேற்கொள்வார்களாக இருந்தால் ஒரு ஆரோக்கியமான சமுதாயத்தை உருவாக்க முடியும் எனவும் அரசாங்க அதிபர் தெரிவித்தார். மேலும், நெடுஞ்சாலை கப்பல் போக்குவரத்து துறை அமைச்சர் கௌரவ பிமல் ரத்நாயக்க அவர்கள் தீவுப்பகுதி வீதி புனரமைப்பிற்காக ரூபா 250 மில்லியன் நிதி ஒதுக்கியுள்ளார் எனவும், மிக கஷ்டத்தின் மத்தியில் கடல் கடந்த தீவுக்கான திட்டங்களை நிறைவேற்ற கௌரவ தவிசாளர், பிரதேச செயலாளர், பாராளுமன்ற உறுப்பினர்கள் மற்றும் அனைவரதும் ஒத்துழைப்புடன் இப்பிரதேசத்தில் ரூபா 40 மில்லியன் வீதி புனரமைப்பு வேலைத்திட்டத்திற்காக நடைமுறைப்படுத்தி வருவதாகவும் தெரிவித்தார்.மேலும், எமது மாவட்டத்தில் கடமையாற்ற கிடைத்திருக்கின்ற சந்தர்ப்பம் எமக்கு கடவுளால் கிடைத்திருக்கும் சந்தர்ப்பம் எனவும், இந்த வருடம் இன்றைய நாளில் அரசாங்க அதிபராக கடமையாற்றும் பாக்கியம் எனக்கு கிடைத்திருக்கிறது எனவும், அதேபோல் சகல உத்தியோகத்தர்களுக்கும்கிடைத்த இச் சந்தர்ப்பத்தை பயன்படுத்தி எங்கே கஷ்டப்பட்ட, தேவைப்பாடுடைய மக்கள் இருக்கிறார்கள் என்பதை உணர்ந்து அனைவரும் ஒன்றிணைந்து கடமையாற்ற வேண்டும் எனவும் தெரிவித்தார். மேலும் அனலைதீவுப் பிரதேசம் கல்வி, பொருளாதார , சமூக பண்பாட்டு விழுமியங்களிலே ஒரு சிறந்த பிரதேசமாக காணப்படுகிறது எனவும், அந்த வகையில் இங்குள்ள பிள்ளைகள் எதிர்காலத்தில் ஆரோக்கியமான சமுதாயமாக மிளிர வேண்டும் எனவும், எனவே அபிவிருத்தி செயற்றிட்டங்கள் மூலமாக ஊக்குவிப்பை வழங்கி ஆரோக்கியமான சமுதாயத்தை உருவாக்க முடியும் எனவும், அண்மையில் ஏற்பட்ட அனர்த்தத்தால் பல குடும்பங்கள் பாதிக்கப்பட்டனர் எனவும், எமக்கு கிடைத்த உதவிப் பொருட்களை தீவுப் பிரதேசங்களுக்கும் அனுப்பி வைத்திருந்ததாகவும், வறுமையானவர்களை ஊக்கப்படுத்தி ஆரோக்கியமான சமுதாயமாக மாற்ற வேண்டிய தேவை உள்ளது எனவும், இந் நடமாடும் சேவை மூலம் அதனை ஓரளவு நிவர்த்தி செய்ய முயற்சித்திருக்கின்றோம் எனவும் தெரிவித்தார். மேலும், இரண்டு மாதங்களுக்கு ஒருமுறை பிரதேச செயலக உத்தியோகத்தர்கள் இங்கு வந்து இங்குள்ளவர்களுக்கு சேவையாற்றி செல்வதன் மூலம் இங்குள்ள அனைவரும் தமது தேவைப்பாடுகளை பூர்த்தி செய்ய முடியுமென தெரிவித்ததுடன், அனலைதீவுப் பிரதேச வளர்ச்சியில் தொடர்ந்து பங்கெடுப்போம் எனவும் அரசாங்க அதிபர் தெரிவித்தார். இந் நடமாடும் சேவையில் ஆட்களைப் பதிவுசெய்யும் திணைக்களத்தினால் வழங்கப்படும் சேவைகள் (தேசிய அடையாள அட்டை), ஓய்வூதியம் தொடர்பான சேவைகள், பிறப்பு, இறப்பு மற்றும் உத்தேச வயது சான்றிதழ்கள் தொடர்பான சேவைகள்,மோட்டார் வாகன பதிவு மற்றும் வாகன வருமான அனுமதிப்பத்திரம் தொடர்பானசேவைகள், பிரதேச சபைகளால் வழங்கப்படும் சேவைகள், பொலிஸ் திணைக்களத்தினால் வழங்கப்படும் சேவைகள், மனிதவள அபிவிருத்தி தொடர்பான சேவைகள் மற்றும் தொழில் வழிகாட்டல்கள்,திறன் அபிவிருத்தி தொடர்பான சேவைகள் மற்றும் தொழிற்கல்வி வழிகாட்டல்கள், சமூக சேவைகள் திணைக்களத்தினால் வழங்கப்படும் சேவைகள், முதியோர் தேசிய செயலகத்தினால் வழங்கப்படும் சேவைகள், காணி தொடர்பான சேவைகள், மருத்துவ முகாம் போன்ற சேவைகள் வழங்கப்பட்டன. மேலும் பொதுமக்களுக்கு கண்புரை பரிசோதனை இடம்பெற்று இலவச மூக்குக்கண்ணாடிகள் வழங்குதற்கான நடவடிக்கைகள் எடுக்கப்பட்டன.
மேலும், துணி பை, முதியவர்களுக்கான அத்தியாவசியப் பொதிகள், மரக்கன்றுகள் என்பன வழங்கப்பட்டதுடன், அரசாங்க அதிபரினால் மரக்கன்றும் நாட்டப்பட்டது. இந் நிகழ்வில், யாழ்ப்பாண மாவட்ட ஊர்காவற்றுறை பிரதேச சபை கெளரவ தவிசாளர், ஒருங்கிணைப்புக்குழுவின் பிரதேச இணைப்பாளர், உதவி மாவட்ட செயலாளர், கிராம அலுவலர்கள், மற்றும் பிரதேச செயலகத்தினுடைய பதவிநிலை உத்தியோகத்தர்கள், மாவட்ட செயலக மற்றும் பிரதேச செயலக உத்தியோகத்தர்கள் மற்றும் சேவைகளைப் பெற்றுக் கொள்ள வந்த பொதுமக்கள் எனப் பலரும் கலந்து கொண்டனர்.
"எண்ணம் நிறைந்த ஓவியம் - சித்துவிலி சித்தம்" தேசிய ரீதியான போட்டியில் மாவட்ட மட்டத்தில் சித்திரம், பதாதை மற்றும் காா்ட்டூன் போட்டிகளில் வெற்றி பெற்ற வெற்றியாளா்களுக்கு பதக்கம் மற்றும் சான்றிதழ் வழங்கும் நிகழ்வு மேலதிக அரசாங்க அதிபர் திரு. கே. சிவகரன் அவர்களின் தலைமையில் இன்றைய தினம் (18.12.2025) மு. ப. 10.30 மணிக்கு யாழ் மாவட்ட செயலக மாநாட்டு மண்டபத்தில் நடைபெற்றது. இந் நிகழ்வில் பிரதம விருந்தினராக கலந்து கொண்ட யாழ்ப்பாண மாவட்ட அரசாங்க அதிபர், திரு. மருதலிங்கம் பிரதீபன் அவர்கள் கருத்து தெரிவிக்கையில், தேசிய சிறுவர் பாதுகாப்பு அதிகார சபையினால் 2025 ஆம் ஆண்டு நடாத்தப்பட்ட போட்டிகளுக்கான கௌரவிப்பு நடைபெறுவது மகிழ்சிக்குரிய விடயம் எனவும், மாணவர்களின் கலை ஆர்வம் குறைவடைந்துவருவதாகவும், இவ்வாறான ஓவியப் போட்டிகள் மாணவர்களின் திறமைகளை வெளிப்படுத்துவதுடன், அவர்களின் உணர்வுகளை வெளிப்படுத்துகின்றது எனவும், குறிப்பிட்டார். மேலும், இன்றைய சூழலின் போக்கு மாற்றமடைந்து வருவதாகவும், ஆதலால், சிறுவர்களை நாளை நல்ல மனிதர்களாக உருவாக்க வேண்டிய பொறுப்பு அனைவரிடமும் உள்ளது எனவும், பெற்றோர்கள் தமது பிள்ளைகளை கலைத்துறைகளில் ஈடுபடுத்த வேண்டும் எனவும், இதன் ஊடாக மாணவர்களின் மனம் இயல்பாகவே ஆற்றுப்படுத்தப்பட்டு, எதிர்காலத்தில் ஒளிமயமான வாழ்க்கையினை நோக்கிச் செல்ல கலைகள் முதன்மையாக விளங்குவதாகவும் தெரிவித்ததுடன், இத்தகைய போட்டிகள் நல்ல சிந்தனைகளையும், நல்ல உணர்வுகளையும் ஏற்படுத்தும் செயற்பாடாக அமையும் எனவும் தெரிவித்தாா்.மேலும், தற்போதைய சமூகம் எதனைச் செய்தாலும் எதிர்க்கும் மனோபாவம் ஓங்கியிருப்பதாகவும், முட்டுக்கட்டை போடுவதும் கவலையளிப்பதாகவும், பிள்ளைகளின் உணர்வுகளுக்கும் மதிப்பளிக்க வேண்டியது அவசியம் எனவும் தெரிவித்து பிள்ளைகளின் எதிர்காலம் காலம் ஒளிமயமாக இருக்க தமது வாழ்த்துக்களையும் தெரிவித்தார். துஸ்பிரயோகங்களிலிருந்து பாதுகாப்பு பெறுவதற்கு சிறுவர்களுக்கு உரித்தான உரிமைகள், பாதுகாப்பு மற்றும் துர்நடத்தைகளை தடுக்கும் முறைகள் பற்றி மக்களுக்கு தகவல்களைப் பெற்றுக் கொடுத்தல் மற்றும் கல்வியறிவூட்டல் ஆகிய பிரிவுகளை அமுல்படுத்துவதற்காக சித்துவலி சித்தம் போட்டியில் சித்திரம், பதாதை மற்றும் கார்ட்டூன் வருடாந்தம் தேசிய சிறுவர் பாதுகாப்பு அதிகார சபையினால் நடாத்தப்படுகின்றது, அந்த வகையில் 05 ஆவது தடவை யாக இவ் போட்டி நிகழ்வில் வெற்றியீட்டியவர்களுக்கான கெளரவிப்பு நிகழ்வு நடைபெறுவது குறிப்பிடத்தக்கது.
இந் நிகழ்வில் தேசிய சிறுவர் பாதுகாப்பு அதிகார சபையினால் நடாத்தப்பட்ட அகில இலங்கை சித்திரம், பதாதை மற்றும் காா்ட்டூன் போட்டிகளில் பங்கு பற்றி மாவட்ட மட்ட சித்திரப் போட்டியில் 24 மாணவர்களும், பதாதை போட்டியில் 11 மாணவர்களும் மற்றும் கார்ட்டூன் போட்டியில் 01 மாணவரும் வெற்றி பெற்றிருந்தார்கள் என்பதுடன், போட்டியில் வெற்றி பெற்ற பல்கலைக் கழக மாணவர்கள் மற்றும் ஆசிரியர்களுக்கும் பதக்கம் அணிவித்து, சான்றிதழ்களும் வழங்கப்பட்டு அரசாங்க அதிபர் அவர்களினால் கெளரவிக்கப்பட்டனர். இந் நிகழ்வில் மாகாண கல்வித் திணைக்கள உதவிக் கல்விப் பணிப்பாளர் என்.ராஜன், உதவி மாவட்டச் செயலாளர் செல்வி உ.தா்சினி, மாவட்ட, பிரதேச செயலக சிறுவர் பாதுகாப்பு உத்தியோகத்தர்கள், ஆசிரியர்கள் வெற்றி பெற்ற பாடசாலை மாணவர்கள், மற்றும் பெற்றோா்கள் கலந்து கொண்டார்கள்.
அதிமேதகு ஜனாதிபதி அவர்களின் எண்ணக்கருவில் கொழும்பு- பத்தரமுல்லயில் ஆரம்பிக்கப்பட்ட 1000 இளம்தொழில் முனைவோரை உருவாக்குவதற்கான 4ஐ (4 I project) தேசிய நிகழ்ச்சித்திட்டத்தில் இணைந்து கொண்ட இளம் தொழில்முனைவோரை உருவாக்குவதற்கான அபிவிருத்தி நிகழ்ச்சித் திட்டத்தின் விழிப்புணர்வுச் செயலமர்வு யாழ்ப்பாண மாவட்ட மேலதிக அரசாங்க அதிபர் திரு.கே. சிவகரன் அவர்களின் தலைமையில் இன்றைய தினம் (17.12.2025) காலை 9.30 மணிக்கு மாவட்ட செயலக மாநாட்டு மண்டபத்தில் இடம்பெற்றது. இந் நிகழ்வில் கருத்து தெரிவித்த மேலதிக அரசாங்க அதிபர் அவர்கள், ஒவ்வொரு தொழில் முயற்சிகளையும் மேற்கொள்ளும் சந்தர்ப்பங்களில் உற்பத்தித் திறனுடன் இணைந்து மேற்கொள்ளும் போது அதன் இலாபத்தை அதிகரிக்கும் அதேவேளை தேசிய உற்பத்தியிலும் அதன் பங்கை அதிகரிக்க கூடியதாக இருக்கும் என்பதை நோக்காக கொண்டு இத் திட்டம் உருவாக்கபட்டுள்ளதாகவும், தெரிவித்தார். மேலும், மூன்று ஆண்டுகளுக்குள் (2025 - 2028 வரை) தேசிய பொருளாதாரத்தை உயர்த்துவதை நோக்கமாக கொண்டு ஆரம்பிக்கப்பட்டுள்ள இத் தேசிய 4 ஐ திட்டத்தில் யாழ்ப்பாண மாவட்டத்தில் முதற்கட்டமாக 26 நிறுவனங்கள் இணைக்கப்பட்டுள்ளன எனவும், இலங்கை ரீதியில் 1000 தொழில் முற்சியாளர்களை உற்பத்தி திறன் மற்றும் தொழில் வழங்குகின்ற அனைத்து அமைச்சுக்களும் இணைந்ததாக தொழில் முற்சியாளர்கள் தேசிய உற்பத்தியில் தங்களுடைய பங்களிப்பை அதிகரிக்க வேண்டும் என்ற அடிப்படையில் இத்திட்டம் உருவாக்கபட்டுள்ளதாகவும் அந்த வகையிலே இந்த பயிற்சி வகுப்பு ஒழுங்குபடுத்தப்பட்டுள்ளதாகவும் குறிப்பிட்டார்.
இந்த பயிற்சிப் பட்டறையின் வளவாளர்களாக தேசிய உற்பத்தித் திறன் செயலகத்தின் 4 ஐ திட்ட வளவாளர் திரு. ஹர்ஷன அரங்கவெல்ல, 4 ஐ திட்ட நிபுணர் திரு. தர்ஷன குலதுங்க அகியோர் கலந்து கொண்டனர். இவ் விளக்கவுரை விழிப்புணர்வில் தெரிவு செய்யப்பட்ட தொழில் முயற்சியாளர்கள், தேசிய உற்பத்தித் திறன் மாவட்ட பிரதேச செயலக உத்தியோகத்தர்கள் மற்றும் கைத்தொழில் மற்றும் முயற்சியாண்மை அபிவிருத்தி அமைச்சின் உத்தியோகத்தர்கள் உள்ளிட்ட பலர் கலந்து கொண்டனர்.
சனாதிபதி செயலகத்தின் அனுசரணையில் யாழ்ப்பாண மாவட்டச் செயலகமும் வேலணை பிரதேச செயலகமும் இணைந்து நடாத்திய நடமாடும் சேவையானது பிரதேச செயலாளர் திரு. தனபாலசிங்கம் அகிலன் அவர்களின் தலைமையில் யாழ் மாவட்ட அரசாங்க அதிபர் திரு. மருதலிங்கம் பிரதீபன் அவர்களின் பங்குபற்றுதலுடன், வேலணை பிரதேச செயலகத்தில் இன்றைய தினம் (18.12.2025) காலை 8.30 மணிக்கு நடைபெற்றது. இவ் நடமாடும் சேவையில் கலந்து கொண்டு கருத்து தெரிவித்த அரசாங்க அதிபர் அவர்கள், மக்களுக்கு உரிய சேவையை உரிய நேரத்திலே வழங்க வேண்டியது அரசாங்க உத்தியோகத்தராகிய எமது கடப்பாடு எனவும், அதிமேதகு ஜனாதிபதியின் கிளீன் ஸ்ரீலங்கா வேலைத்திட்டத்திற்கமைவாக இவ் நடமாடும் சேவையை தயார்ப்படுத்திய பிரதேச செயலாளர், பிரதேச செயலக பதவிநிலை மற்றும் ஏனைய உத்தியோகத்தர்களுக்கு தனது நன்றிகளையும் பாராட்டுக்களையும் தெரிவித்தார். மேலும், இவ் நடமாடும் சேவையானது யாழ் மாவட்ட பிரதேச செயலகங்களில் நடைபெற்று வருவதாகவும் அதன் ஒரு அங்கமாக தீவுப்பகுதிகளில் நடாத்தப்பட்டு வருவதாகவும், இவ் நடமாடும் சேவையை நடாத்தும் போது மக்களின் பிரச்சினைகளை ஒரே இடத்தில் தீர்த்துக் கொள்ள முடியும் எனவும் தெரிவித்ததுடன், இப் பிரதேச செயலகத்தின் பல உத்தியோகத்தர்கள் யாழ் நகர்ப்பகுதிக்கு அப்பால் இருந்து தொடர்ச்சியாக பல வருடங்களாக அர்ப்பணிப்பான சேவையை ஆற்றி வருவதாகவும் அதற்காக தனது நன்றிகளையும் தெரிவித்தார்.கடல் கடந்த தீவிலே இருக்கின்ற மக்கள், தங்களுடைய அரச சேவைகளை அல்லது அரசாங்கத்தினால் வழங்கப்படுகின்ற சேவைகளை பெற்றுக்கொள்வதற்காக, அவர்கள் பிரதேச செயலகத்தை அல்லது மாவட்ட செயலகத்தை நாடி செல்ல வேண்டிய தேவைப்பாடுகளை தவிர்க்கும் முகமாக நடமாடும் சேவை ஏற்பாடு செய்யப்பட்டதாகவும், பிரதேச செயலக உத்தியோகத்தர்கள் மற்றும் மாவட்ட உத்தியோகத்தர்களை மூன்று மாதங்களுக்கு ஒரு தடவை அங்கே சென்று இச் சேவைகளை வழங்குகின்ற போது, சேவைகளை அவர்கள் இலகுவாக பெற்றுக்கொள்ளக்கூடியதாக இருக்குமென்றும் அந்த வகையில் நயினாதீவில் நடைபெற்ற நடமாடும் சேவையில் மக்கள் கலந்து கொண்டு பயனடைந்தார்கள் எனவும் குறிப்பிட்டார். மேலும், கிராம மட்டத்திலே கடமையாற்றுகின்ற கிராம உத்தியோகத்தர்கள், பொருளாதார அபிவிருத்தி உத்தியோகத்தர்கள், மற்றும் சமுர்த்தி உத்தியோகத்தர்கள் தற்போது வெள்ள அனர்த்தம் நிலையில் தங்களுடைய பணிகளை எவ்வளவு சிறப்பாக ஆற்றினாலும், சமூகத்திலே அதற்குரிய எதிர் விமர்சனங்கள் சில கிடைக்கத்தான் செய்கின்றன எனவும், ஆதலால் கடமைகளில் மிக தெளிவாக இருக்க வேண்டியது அவசியம் எனவும் தெரிவித்தார். மேலும், மாவட்டத்தை பொறுத்தவரையிலே, வெள்ள அனர்த்தத்தினால் பாதிக்கப்பட்டவர்களுக்கான உதவி வழங்குவதற்காக 365.6 மில்லியன் ரூபாய் கிடைக்கப்பெற்றுள்ளது எனவும், பாதிக்கப்பட்ட மக்களுக்கு சரியான முறையிலே சேவைகளையும் உரிய கொடுப்பனவுகளையும் வழங்க வேண்டும் எனவும், பாதிக்கப்பட்ட மக்கள் அரசாங்க உத்தியோகத்தர்களை நம்பி இருப்பதால், கிராம மட்ட உத்தியோகத்தர்கள் நிவாரணம் கொடுப்பனவுகளை மக்களுக்கு, மக்கள் நலன் சார்ந்ததாக வழங்குவதில் நீண்ட கால அனுபவம் கொண்டவர்களாக இருப்பதால் இவ் நிவாரண கொடுப்பனவுகள் சரியான முறையிலே மேற்கொள்ள வேண்டும் எனவும் தெரிவித்தார். மேலும், மக்களின் மனங்களில் நிலைத்திருக்கக்கூடிய வகையில் மக்களுக்கு சேவையாற்ற வேண்டும் எனவும் அரசாங்க அதிபர் தெரிவித்தார்.
இந் நடமாடும் சேவையில் ஆட்களைப் பதிவு செய்யும் திணைக்களத்தினால் வழங்கப்படும் சேவைகள் (தேசிய அடையாள அட்டை), ஓய்வூதியம் தொடர்பான சேவைகள், பிறப்பு, இறப்பு மற்றும் உத்தேச வயது சான்றிதழ்கள் தொடர்பான சேவைகள், மோட்டார் வாகன பதிவு மற்றும் வாகன வருமான அனுமதிப்பத்திரம் தொடர்பான சேவைகள், பிரதேச சபைகளால் வழங்கப்படும் சேவைகள், பொலிஸ் திணைக்களத்தினால் வழங்கப்படும் சேவைகள், மனிதவள அபிவிருத்தி தொடர்பான சேவைகள் மற்றும் தொழில் வழிகாட்டல்கள், திறன் அபிவிருத்தி தொடர்பான சேவைகள் மற்றும் தொழிற்கல்வி வழிகாட்டல்கள், சமூக சேவைகள் திணைக்களத்தினால் வழங்கப்படும் சேவைகள், முதியோர் தேசிய செயலகத்தினால் வழங்கப்படும் சேவைகள், காணி தொடர்பான சேவைகள், மருத்துவ முகாம் போன்ற சேவைகள் வழங்கப்பட்டன. மேலும் பொதுமக்களுக்கு கண்புரை பரிசோதனை இடம்பெற்றதுடன் இலவச மூக்குக்கண்ணாடிகள் வழங்குதற்கான நடவடிக்கைகள் எடுக்கப்பட்டன. மேலும், காணி உறுதிப்பத்திரம், கடற்றொழில் உபகரணங்கள் முதியவர்களுக்காக சக்கர நாற்காலி, தென்னங்கன்றுகள் என்பன தெரிவு செய்யப்பட்ட தகுதியான பொதுமக்களுக்கு இலவசமாக வழங்கப்பட்டன.
இந் நிகழ்வில் மாவட்ட மேலதிக அரசாங்க அதிபர், வேலனை பிரதேச சபையின் கௌரவ உறுப்பினர்கள், வேலனை பிரதேச செயலாளர், மாவட்ட செயலக பிரதம கணக்காளர், மாவட்ட செயலக உதவி மாவட்டச் செயலாளர், பதவிநிலை உத்தியோகத்தர்கள், பிரதேசத்தினுடைய சுகாதார வைத்திய அதிகாரி, மாவட்டச் செயலக மற்றும் பிரதேச செயலக உத்தியோகத்தர்கள் மற்றும் சேவைகளைப் பெற்றுக் கொள்ள வந்த பொதுமக்கள் எனப் பலரும் கலந்து கொண்டனர்.
யாழ்ப்பாண மாவட்ட காணிப் பயன்பாட்டுக் குழுக் கூட்டம் யாழ்ப்பாண மாவட்ட அரசாங்க அதிபர் திரு.மருதலிங்கம் பிரதீபன் அவர்களின் தலைமையில் இன்றைய தினம் (17.12.2025) 12.30 மணிக்கு மாவட்ட செயலக மாநாட்டு மண்டபத்தில் நடைபெற்றது. இக் கூட்டத்தில் அரசாங்க அதிபர் அவர்களால் ஒவ்வொரு பிரதேச செயலக ரீதியான காணி பயன்பாட்டு விடயங்கள் ஆராயப்பட்டு, பின்வரும் அறிவுறுத்தல்கள் வழங்கப்பட்டதுடன், பின்வரும் தீர்மானங்களும் எடுக்கப்பட்டன.
1.மாவட்ட காணி பயன்பாட்டு குழுவினால் வழங்கப்பட்ட அரச காணிகள் வழங்கப்பட்ட திகதியில் இருந்து 06 மாத காலம் தொடக்கம் ஒரு வருடம் வரையில் பயன்படுத்தப்படாத நிலையில் இருந்தால் - அக் காணிகளுக்கு அனுமதியை ரத்து செய்யுமாறும் அரசாங்க அதிபரினால் தெரிவிக்கப்பட்டது.
2.காணிகள் தொடர்பாக பிரதேச மட்ட காணிப்பயன்பாட்டுக்குழுவில் விண்ணப்பங்களை சமர்ப்பித்து பிரதேச மட்ட காணிப்பயன்பாட்டுக்குழுவில் அனுமதியைப் பெற்ற பின்னர் பிரதேச மட்ட ஒருங்கிணைப்புக்குழுவின் அனுமதியைப் பெற்று பின்னர் மாவட்ட காணிப் பயன்பாட்டுக் குழுவில் சமர்ப்பிக்க வேண்டும் எனத் தெரிவித்தார்.
3.வன வளத் திணைக்களம் மற்றும் வன ஜீவராசிகள் திணைக்களம் ஆளுகைக்கு உட்பட்டதும் வெவ்வேறு தேவைகளுக்காக பயன்படுத்தப்படும் காணிகளை விடுவிப்பது தொடர்பாக தீர்மானம் எடுப்பதற்கு சம்பந்தப்பட்ட அமைச்சுக்களுடன் கலந்துரையாடி முடிவெடுப்பதாகவும் கூட்டத்தில் தீர்மானிக்கப்பட்டது.
4.பிரதேச செயலாளர் பிரிவுகளில் அரசகாணிகளில் குடியிருக்கும் மக்களுக்கு காணிகளை வழங்குவதற்குரிய நடவடிக்கைகளை மேற்கொள்ளுமாறு அறிவுறுத்தப்பட்டது.
5.அரச காணிகளை பொதுமக்களுக்கு அல்லது பொதுத்தேவைகளுக்காக அவசியத் தேவைக்கான காணிகளை மட்டும் வழங்குமாறும் அரசாங்க அதிபர் கூறியதுடன், அவசியமற்ற விடயங்களுக்கு வழங்குவதை தவிர்க்குமாறும் உரிய முறையில் உறுதிப்படுத்தப்பட்ட பின்னர் தீர்மானங்களை மேற்கொள்ளுமாறும் தெரிவித்தார்.
இக் கலந்துரையாடலில் மேலதிக அரசாங்க அதிபர் (காணி), பிரதேச செயலாளர்கள், மாவட்ட காணி பயன்பாட்டு திட்டமிடல் உதவிப்பணிப்பாளர், கடற்றொழில் திணைக்கள அதிகாரி, கமநல சேவைகள் அபிவிருத்தி திணைக்கள அதிகாரிகள், நீர்ப்பாசன பொறியியலாளர், தேசிய நீர் வழங்கல் மற்றும் வடிகாலமைப்பு சபை பொறியியலாளர், மாகாண காணி ஆணையாளர் திணைக்கள அதிகாரிகள், நகர அபிவிருத்தி அதிகார சபை உத்தியோகத்தர்கள், மத்திய சுற்றாடல் அபிவிருத்தி திணைக்கள அதிகாரிகள், விவசாயத்ததிணைக்கள அதிகாரிகள்,நில அளவைகள் திணைக்கள அதிகாரிகள், கால்நடை அபிவிருத்தி சுகாதார திணைக்கள அதிகாரிகள், பிரதேச செயலகங்களில் கடமையாற்றும் காணிப் பயன்பாட்டு உத்தியோகத்தர்கள் உள்ளிட்ட பலர் கலந்து கொண்டனர்.
