யாழ்ப்பாண மாவட்ட ஒருங்கிணைப்பு குழுக் கூட்டம் கடற்றொழில் அமைச்சரும் யாழ் மாவட்ட அபிவிருத்தி குழுத் தலைவருமான கௌரவ டக்ளஸ் தேவானந்தா அவர்களின் தலைமையிலும் வடக்கு மாகாண கௌரவ ஆளுநர் திருமதி.பி.எஸ்.எம்.சார்ள்ஸ் அவர்களின் இணைத்தலைமையிலும் இன்றைய தினம் (28.08.2024) காலை 9.00 மணிக்கு யாழ் மாவட்ட செயலக கேட்போர் கூடத்தில் நடைபெற்றது.

குறித்த மாவட்ட ஒருங்கிணைப்புக்குழு கூட்டமானது யாழ்ப்பாண மாவட்ட பதில் அரசாங்க அதிபர் திரு.மருதலிங்கம் பிரதீபன் அவர்களின் வரவேற்புரையுடன் ஆரம்பித்து வைக்கப்பட்டது.

கடந்த மாவட்ட அபிவிருத்திக் குழுக் கூட்டத்தில் எடுக்கப்பட்ட தீர்மானங்களின் முன்னேற்றங்கள் தொடர்பாக ஆராயப்பட்டு, மாவட்ட ஒருங்கிணைப்பு குழுக் கூட்டத்தில் அனுமதியை பெறவேண்டிய திட்ட முன்மொழிவுகள், பன்முகப்படுத்தப்பட்ட வரவுசெலவுத்திட்ட முன்மொழிவுகள் தொடர்பாகவும் ஆராயப்பட்டன.

மேலும் பன்முகப்படுத்தப்பட்ட வரவு செலவுத்திட்டத்தில் யாழ்ப்பாண மாவட்டத்திற்காக 826 திட்டங்களுக்காக 322 மில்லின் ரூபா நிதி ஒதுக்கீடு செய்யப்பட்டுள்ளமை குறிப்பிடத்தக்கது.

இக் கலந்துரையாடலில் பாராளுமன்ற உறுப்பினர் கௌரவ தர்மலிங்கம் சித்தார்த்தன், பாராளுமன்ற உறுப்பினர் கௌரவ செல்வராஜா கஜேந்திரன், வடக்கு மாகாண சபையின் அவைத்தலைவர் சி.வி.கே.சிவஞானம், வடக்குமாகாண அமைச்சின் பிரதம செயலாளர் திரு.இளங்கோவன், மாவட்ட மேலதிக அரசாங்க அதிபர் (காணி) திரு.க.ஸ்ரீமோகனன், பிரதேச செயலாளர்கள், மாவட்ட செயலக பதவிநிலை உத்தியோகத்தர்கள், பிரதி பொலிஸ்மா அதிபர், யாழ் மாவட்ட கட்டளை தளபதியின் பிரதிநிதி, மத்திய மற்றும் மாகாண அமைச்சின் செயலாளர்கள், திணைக்களத்தலைவர்கள், முப்படையினர், அரச மற்றும் அரச சார்பற்ற நிறுவனங்களின் பிரதிநிதிகள், பொது அமைப்புக்களின் பிரதிநிதிகள், கமநல சேவை அமைப்புக்களின் பிரதிநிதிகள், கடற்றொழிலாளர் சங்க பிரதிநிதிகள், ஊடகவியலாளர்கள் மற்றும் மாவட்ட செயலக உத்தியோகத்தர்களும் கலந்து கொண்டனர்

 

         

எதிர்வரும் செப்ரெம்பர் மாதம் 21 ஆம் திகதி நடைபெறவுள்ள சனாதிபதித் தேர்தல் தொடர்பாக சிரேஷ்ட தலைமை தாங்கும் அலுவலர்களுக்கான முன்னாயத்த செயலமர்வானது யாழ்ப்பாண மாவட்ட பதில் அரசாங்க அதிபரும் தெரிவத்தாட்சி அலுவலருமான திரு.மருதலிங்கம் பிரதீபன் அவர்கள் தலைமையில் யாழ் மாவட்ட செயலக கேட்போர் கூடத்தில் இன்றைய தினம் (27.08.2024) காலை 09.30 மணிக்கு நடைபெற்றது.

இதன் போது தலைமையுரையாற்றிய தெரிவத்தாட்சி அலுவலர் அவர்கள்

ஒவ்வொரு வாக்களிப்பு நிலையங்களிலும் தேர்தல் கடமைகளுக்காக நியமிக்கப்படும் உத்தியோகத்தர்கள் தேர்தல் சுமுகமாகவும், நீதியாகவும் நடைபெற ஒத்துழைப்பு நல்குமாறு கேட்டுக்கொண்டதுடன், அந்த வகையில் சிரேஷ்ட தலைமை தாங்கும் அலுவலர்களின் பங்களிப்பானது மிகவும் பொறுப்புவாய்ந்ததாகும். யாழ்ப்பாண மாவட்டத்தில் 511 வாக்களிப்பு நிலையங்களுக்கு பொறுப்பாக நியமிக்கப்படும் சிரேஷ்ட தலைமை தாங்கும் அலுவலகர்கள் ஒவ்வொருவரும் வாக்களிப்பு நிலையங்களுக்குரிய பொறுப்பு மற்றும் அதிகாரம் கொண்டவர்களாகவிருப்பதால் இத் தேர்தலில் சிரேஷ்ட தலைமை தாங்கும் அலுவலகர்களின் பங்கானது மிகக் காத்திரமானது எனத் தெரிவித்தார்.

சனாதிபதித் தேர்தல் தொடர்பாக வாக்களிப்பு நிலையங்களில் சிரேஷ்ட தலைமை தாங்கும் அலுவலர்களின் கடமைகள் மற்றும் பொறுப்புக்கள் தொடர்பாக உதவித் தேர்தல் ஆணையாளர் திரு. இ.கி.அமல்ராஜ் அவர்களால் விளக்கமளிக்கப்பட்டது.

இச் செயலமர்வில் சிரேஷ்ட தலைமைதாங்கும் அலுவலகர்களாக நியமிக்கப்படவுள்ள உத்தியோகத்தர்கள் கலந்து கொண்டனர்.

 

    

மாவட்டச் செயலகத்தின் உற்பத்தி திறன் பிரிவின் ஏற்பாட்டில், சிறிய மற்றும் நடுத்தர அளவிலான தொழில் முனைவோர்களுக்கான சந்தைப்படுத்தல் மற்றும் அனுபவப் பகிர்வு செயலமர்வானது இன்றைய தினம் (27.08.2024) காலை 09.00 மணிக்கு மாவட்டச் செயலக மாநாட்டு மண்டபத்தில் நடைபெற்றது.

இச் செயலமர்வில் கலந்துகொண்டு கருத்து தெரிவித்த யாழ்ப்பாண மாவட்ட பதில் அரசாங்க அதிபர் திரு. மருதலிங்கம் பிரதீபன் அவர்கள் உற்பத்தித் திறன்சாா் நடவடிக்கைகளை சரியான முறையில் நடைமுறைப்படுத்துவதன் ஊடாக தொழில் முனைவோர்கள் சிறந்த பயனைப் பெறலாம் எனவும், உற்பத்தித் திறன்சாா் உத்தியோகத்தர்கள் உற்பத்தித் திறன் செயற்பாடுகளை தொடர்ச்சியாக மேற்கொண்டு தொழில் முயற்சியாளர்களின் முன்னேற்றகரமான பின்னூட்டல்களை அறிக்கையிடுமாறும் தெரிவித்தார்.

இந்நிகழ்வு திட்டத்துடன் தொடர்புடைய தொழில் முனைவோர் மற்றும் உற்பத்தித்திறன் அபிவிருத்தி உத்தியோகத்தர்களின் அறிவை. மேம்படுத்துதல் , வணிகத்தை அபிவிருத்தி செய்தல் , தொழில் முனைவோருடைய வணிக நடைமுறைகளை பகிர்ந்து கொள்தல் போன்ற விடயங்களை நோக்கமாகக் கொண்டு இச் செயலமர்வு நடைபெற்றது.

இந்நிழ்வில் உதவி மாவட்ட செயலாளர் செல்வி உ. தர்சினி, முயற்சியாண்மை அபிவிருத்திக்கான பயிற்சி உத்தியோகத்தர் T. தனஞ்சயன், மாவட்ட செயலக, பிரதேச செயலக உற்பத்தி திறன் உத்தியோகத்தர்கள் மற்றும் 25 தொழில் முனைவோா் ஆகியோா் கலந்து கொண்டனர்.

 

    

சனாதிபதித் தேர்தலில் ஊடகவியலாளர்களின் கடமை பொறுப்புக்கள் தொடர்பான செயலமர்வானது யாழ்ப்பாண மாவட்ட மேலதிக அரசாங்க அதிபர் திரு. க. ஸ்ரீமோகனன் அவர்களின் தலைமையில் இன்று (24.08.2024) மு. ப 10.00 மணிக்கு மாவட்டச் செயலக கேட்போா் கூடத்தில் நடைபெற்றது.

ஊடகவியலாளர்களின் வகிபாங்கினை அர்த்தமுள்ள வகையில் அதிகரிக்கச் செய்யும் நோக்கில் தேர்தல் கண்கானிப்பு தொடர்பான தன்னார்ந்த முயற்சி (VIEW) அமைப்பினதும், AFRIEL நிறுவனத்தினதும் அனுசரனையில் இச் செயலமர்வு நடைபெற்றது.

ஊடகவியலாளர்களின் கடமைகள் மற்றும் பொறுப்புக்கள் தொடர்பில் விழிப்புணர்வூட்டுதலுடன் அறிக்கையிடலை மேம்படுத்துவதே இதன் நோக்கமாகும்.

இந் நிகழ்வில் VIEW அமைப்பின் ஆலோசனை சபை பிரதானி திரு. மஹிந்த தேசப்பிரிய (முன்னாள் தலைவர்,தேர்தல்கள் ஆணைக்குழு மற்றும் எல்லை நிர்ணய ஆணைக்குழு) அவர்களும் மற்றும் VIEW அமைப்பின் ஆலோசனை சபை உறுப்பினர் திரு. எம்.எம்.மொஹமட் (தேர்தல் ஆணைக்குழுவின் முன்னாள் உறுப்பினர்) அவர்களும் நிகழ்வின் வளவாளர்களாக கலந்து கொண்டு தெளிவூட்டல்களை வழங்கினார்கள்.

இந் நிகழ்வில் 35 ஊடகவியலாளர்கள் கலந்து கொண்டனர்.