யாழ்ப்பாண மாவட்ட ஒருங்கிணைப்புக் குழுக் கூட்டம் கடற்தொழில் அமைச்சரும் யாழ் மாவட்ட ஒருங்கிணைப்புக் குழுவின் தலைவருமான கௌரவ டக்ளஸ் தேவானந்தா அவர்களின் தலைமையில் 26.10.2023 காலை 9.00 மணிக்கு மாவட்ட செயலக கேட்போர் கூடத்தில் நடைபெற்றது.

இக் கலந்துரையாடலில் யாழ்ப்பாண மாவட்ட சட்ட ஒழுங்குகள், விவசாயம் தொடர்பாக எடுக்கப்பட வேண்டிய நடவடிக்கைகள், சமூக பாதுகாப்பு நலன்புரி நன்மைகள், மாவட்ட ஒருங்கிணைப்பு குழுக் கூட்டத்தில் அனுமதி பெறும் செயற்திட்டங்கள், சட்டவிரோத மதுபான விற்பனையை கட்டுப்படுத்தல், விவசாய மற்றும் வயல் நிலங்களில் கட்டடங்கள் அமைத்தலை தடுத்தல், சட்டவிரோத மணல் அகழ்வை கட்டுப்படுத்தல், தீவகங்களுக்கிடையிலான கடல் கடந்த போக்குவரத்து சேவைகள் உள்ளிட்ட விடயங்கள் கலந்துரையாடப்பட்டன.

மேலும், சிகையலங்கார தொழிற்ச்சங்கத்தின் கோரிக்கைகள் மற்றும் தனியார் போக்குவரத்து சங்கத்தினரின் கோரிக்கைகளும் ஆராயப்பட்டன. இதில் கௌரவ வட மாகாண ஆளுநர் திருமதி பி.எஸ்.எம்.சார்ள்ஸ், ஜனாதிபதி செயலகத்தின் வடக்கு கிழக்கு அபிவிருத்திக்கு பொறுப்பான மேலதிக செயலாளர் எல்.இளங்கோவன், பாராளுமன்ற உறுப்பினர் கௌரவ த.சித்தார்த்தன், பாராளுமன்ற உறுப்பினர் கௌரவ சிவஞானம் ஸ்ரீதரன், பாராளுமன்ற உறுப்பினர் கௌரவ எம்.எ.சுமந்திரன், பாராளுமன்ற உறுப்பினர் கௌரவ அங்கஜன் இராமநாதன், பாராளுமன்ற உறுப்பினர் கௌரவ கஜேந்திரகுமார் பொன்னம்பலம், பாராளுமன்ற உறுப்பினர் கௌரவ சி.வி.விக்னேஸ்வரன் அவர்களின் பிரதிநிதி, வடக்கு மாகாணசபையின் அவைத்தலைவர் சி.வி.கே.சிவஞானம், மாவட்ட அரசாங்க அதிபர் அம்பலவாணர் சிவபாலசுந்தரன் மற்றும் மேலதிக அரசாங்க அதிபர்கள், மத்திய மற்றும் மாகாண திணைக்களத்தலைவர்கள், வடக்கு மாகாண அமைச்சின் செயலாளர்கள், யாழ் மாவட்ட இராணுவக் கட்டளை தளபதியின் பிரதிநிதி, முப்படையினர், விஷேட பொலிஸ் அதிரடிப்படை அதிகாரி, பொலிஸ் நிலைய பொறுப்பதிகாரிகள், மாவட்ட செயலக பதவிநிலை உத்தியோகத்தரகள், பிரதேச செயலாளர்கள், அரச மற்றும் அரசாா்பற்ற நிறுவனங்களின் பிரதிநிதிகள், பொது அமைப்புக்களின் பிரதிநிதிகள், ஊடகவியலாளர்கள், மாவட்ட செயலக உத்தியோகத்தர்களும் கலந்து கொண்டனர்.

வெளிநாட்டு வேலைவாய்ப்பு அமைச்சினால் அபிவிருத்தி உத்தியோகத்தர்களுக்கான (வெளிநாட்டு வேலைவாய்ப்பு)பயிற்சி நெறி மாவட்ட மேலதிக அரசாங்க அதிபர் ம.பிரதீபன் அவர்களின் தலைமையில் 27.10.2023 மு.ப 8.30 மணி முதல் பி.ப 4.15 வரை மாவட்ட செயலக மாநாட்டு மண்டபத்தில் இடம்பெற்றது.

இப்பயிற்சி நெறியில் பிரதேச செயலக அபிவிருத்தி உத்தியோகத்தர்களுக்கான குடும்ப அபிவிருத்தி்த் திட்டம் , நிதி முகாமைத்துவம் தொடர்பான விடயங்கள் பயிற்சியளிக்கப்பட்டன.

பருத்தித்துறை பிரதேச செயலாளர் ஆழ்வாப்பிள்ளை சிறி அவர்கள் பொது நிர்வாக உள்நாட்டு அலுவல்கள் அமைச்சினால் இலங்கை நிர்வாக சேவையின் விசேட தரத்துக்கு தெரிவுசெய்யப்பட்டுள்ளதோடு, வடக்கு மாகாண அமைச்சுக்கு பதவியுயர்வு பெற்று தனது கடமைகளை பொறுப்பேற்கவுள்ளார்.

இவர் 1999 ஆம் ஆண்டு அபிவிருத்தி உத்தியோகத்தத்தராக மண்முனை வடக்கு பிரதேச செயலகத்தில் அரச நியமனத்தை பெற்று, 2002 ஆம் ஆண்டு உதவித்திட்டமிடல் பணிப்பாளராக பணிபுரிந்து, 2003 ஆம் ஆண்டு இலங்கை நிர்வாக சேவை போட்டிப்பரீட்சையில் சித்தியடைந்து, இலங்கை நிர்வாக சேவை அதிகாரியாக நியமனம் பெற்றாா். நானாட்டான் மற்றும் வவுனியா பிரதேச செயலகங்களில் உதவி பிரதேச செயலாளராக பணிபுரிந்து பின் நெடுந்தீவு மற்றும் நல்லூர் பிரதேச செயலகங்களின் பிரதேச செயலாளராக சிறப்பாக சேவை செய்து 2017 ஆம் ஆண்டு தொடக்கம் இன்று வரை வடமராட்சி வடக்கு பருத்தித்துறை பிரதேச செயலகத்தின் பிரதேச செயலாளராக கடமையாற்றி வருகின்றமையும் குறிப்பிடத்தக்கது.